(វៀតណាម)៖ លោក គុជ ប៊ុណ្ណារ៉ា ដែលទទួលបានអាណិតអាសូរយ៉ាងខ្លាំងពីបណ្តាអ្នកលេង Facebook ទាក់ទងនឹងស្ថានភាពជំងឺកូនស្រី រលាកស្រោមខួរធ្ងន់ធ្ងរ ពេលនេះ​បានដឹកទៅ​ដល់ប្រទេសវៀតណាមនោះ គឺបានទទួលការឧបត្ថម្ភទាំងស្រុងជាកញ្ចប់ ទាំងការចាយវាយ ថ្លៃធ្វើដំណើរ និងថ្លៃព្យាបាលពីបងស្រីអគ្គនាយិការប្រតិបតិ្ត នៃក្រុមហ៊ុនទឹកពិសាវីតាល់ គឺលោកស្រី ជឹង សុគន្ធាវី។

ការផ្តល់ជាការឧបត្ថម្ភបែបនេះ ត្រូវបានទទួលការសាទរយ៉ាងខ្លាំងពីបងប្អូនតាមបណ្តាអ្នកលេង Facebook រាប់ម៉ឺននាក់ ដែលម្នាក់ៗបានសាទរដល់ក្រុមហ៊ុន វីតាល់ ក៏ដូចជាលោកស្រី ជឹង សុគន្ធាវី ដែលមានចិត្តសណ្តោសប្រណីដ៏ថ្លៃថ្លា រាល់សកម្មភាពសង្គមនានានៅប្រទេសកម្ពុជា។ លោកស្រីបានយកចិត្តទុកដាក់ និងទំនុកបម្រុងជូនគ្រួសារជនរងគ្រោះ។ លោក ប៊ុណ្ណារ៉ា បានអំណរគុណជាខ្លាំងដល់ លោកស្រី ជឹង សុគន្ធាវី ដោយលោកបានបង្ហោះនូវចំណាប់អារម្មណ៍មួយចំនួន ក្នុងទំព័រហ្វេសបុករបស់លោក មុននឹងលោកចាកចេញទៅប្រទេសវៀតណាមថា «ដោយ​មានការអាណិតអាសូរពីលោកជំទាវ ជឹង សុគន្ធាវី ក្រុមប្រឹក្សាភិបាល និងជានាយិកាប្រតិបត្តិរបស់ក្រុមហ៊ុន NVC Corporation (Vital) លោកជំទាវបានផ្តល់ជាថវិកា និងបានផ្តួចផ្តើមបញ្ជូន តីតី ទៅព្យាបាលជងឺនៅមន្ទីរពេទ្យប្រទេសវៀតណាម ជំនាញផ្នែកខួរក្បាល។ នេះជាទឹកចិត្តដ៏ថ្លៃថ្លា របស់លោកជំទាវ ដោយបានផ្តល់ឱកាសឲ្យខ្ញុំ បានធ្វើនូវរឿង​ដែលខ្ញុំប្រាថ្នាចង់បញ្ជូនកូន តី ទៅព្យាបាលនៅក្រៅប្រទេសជាយូរណាស់មកហើយ ។ សូមជូនពរដល់លោកជំទាវ ឲ្យជួបនូវភាពជោគជ័យជានិច្ច និងក៏សូមអរគុណដល់បងប្អូនប្រុសស្រី និងមិត្តៗនៅក្នុង Facebook ដែលមានចិត្តអាណិតអាសូរដល់ តីតី ដោយបាន Comment ជូនពរដល់ តីតី ជាហូរហែ។ លទ្ធផលយ៉ាងណានោះ ខ្ញុំនឹងផ្តល់ជាព័ត៌មាននៅពេលក្រោយទៀត សូមអរគុណ»។

សូមរំលឹកឡើងវិញដែរថា កូនស្រី តីតី កំសត់មួយនេះស្គាល់ការសប្បាយ ប្រឡែង សើចក្អាកក្អាយត្រឹមតែមួយរយៈខ្លីប៉ុណ្ណោះ គឺពេលដែល តីតី មានអាយុ ១ឆ្នាំ ៧ខែ តីតី ក៏ចាប់ឈឺ កើតជងឺរលាកស្រោម​ខួរក្បាលកំរិតធ្ងន់ ដែលគ្រប់រាងកាយទាំងអស់ គឺត្រូវពិការទាំងដៃជើង ទាំងភ្នែក ទាំងមាត់មិនអាចនិយាយបាន ត្រចៀកមិនអាចស្តាប់ឮ សតិក៏បាត់បង់ សូម្បីតែញ៉ាំក៏មិនអាចបញ្ជាមាត់ឲ្យទំពារបាន ដោយត្រូវសុងទុយោចូលក្នុងក្រពះ ដើម្បីបញ្ជូនអាហារជារៀងរាល់ថ្ងៃ៕