(ភ្នំពេញ)៖ ភាគីពាក់ព័ន្ធដែលរួមមានប្រធានគណៈកម្មការជំនាញនៃរដ្ឋសភា រដ្ឋមន្ត្រីក្រសួងពាណិជ្ជកម្ម និងមន្ត្រីមកពីក្រសួងពាក់ព័ន្ធមួយចំនួនទៀត នៅថ្ងៃទី២៨ ខែកក្កដា ឆ្នាំ២០២១នេះ បានបើកកិច្ចរួមគ្នាមួយតាមប្រព័ន្ធវីដេអូ ពិនិត្យ និងពិភាក្សាលើវឌ្ឍនភាពការងារនៃកិច្ចសហប្រតិបត្តិការអភិវឌ្ឍន៍តំបន់ត្រីកោណកម្ពុជា-ឡាវ-វៀតណាម (CLV) ដើម្បីត្រៀមរៀបចំសន្និសីទលើកទី៨ នៃគណៈកម្មការកិច្ចការបរទេសនៃសភាកម្ពុជា-ឡាវ-វៀតណាម ដែលកម្ពុជានឹងធ្វើជាម្ចាស់ផ្ទះនាពេលខាងមុខ ឱ្យទទួលបានជោគជ័យ។
កិច្ចប្រជុំនាព្រឹកនេះតំណាងមកពីខាងរដ្ឋសភារួមមាន លោក ឈាង វុន ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន នៃរដ្ឋសភា និងមានការចូលរួមពីលោកស្រី មាន សំអាន ប្រធានក្រុមសមាជិកព្រឹទ្ធសភាទទួលបន្ទុកកិច្ចសហប្រតិបត្ដិការជាមួយអន្ដរសភាកម្ពុជា-ឡាវ-វៀតណាម។ រីឯភាគីរាជរដ្ឋាភិបាល ដឹកនាំដោយលោក ប៉ាន សូរស័ក្តិ រដ្ឋមន្រ្តីពាណិជ្ជកម្ម និងជាប្រធានគណៈកម្មាធិការសម្របសម្រួលការងារសហប្រតិបត្តិការអភិវឌ្ឍន៍តំបន់ត្រីកោណកម្ពុជា-ឡាវ-វៀតណាម។
ជាកិច្ចចាប់ផ្តើមនៃកិច្ចប្រជុំនេះ លោក ឈាង វុន ប្រធានអង្គប្រជុំ បានជម្រាបអំពីកិច្ចសហប្រតិបត្តិការរវាងសភា CLV ដែលរៀបចំក្នុងរយៈពេលពីរឆ្នាំម្តង និងតួនាទីដ៏សំខាន់របស់អង្គនីតិប្បញ្ញត្តិក្នុងការគាំទ្រអង្គនីតិប្រតិបត្តិ ដើម្បីជំរុញការអភិវឌ្ឍន៍តំបន់ត្រីកោណតាមរយៈការពង្រឹងកិច្ចសហប្រតិបត្តិការរវាងសភា និងរដ្ឋាភិបាល។
ក្នុងឱកាសនោះក្នុងនាមជាប្រធានគណៈកម្មាធិការសម្រាប់សម្របសម្រួលការងារសហប្រតិបត្តិការអភិវឌ្ឍន៍តំបន់ត្រីកោណកម្ពុជា-ឡាវ-វៀតណាម លោក ប៉ាន សូរស័ក្តិ បានជម្រាបជូនអង្គប្រជុំអំពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ដែលបានធ្វើឱ្យបណ្តាខេត្តក្នុងតំបន់ត្រីកោណអភិវឌ្ឍន៍របស់កម្ពុជា ប្រែក្លាយមុខមាត់ថ្មីជាបន្តបន្ទាប់។ ក្នុងនោះរួមមានការកសាងហេដ្ឋារចនាសម្ព័ន្ធខ្វាត់ខ្វែង ការកៀរគរវិនិយោគក្នុង និងក្រៅប្រទេស ការបង្កើតឱកាសការងារ និងលើកកម្ពស់ជីវភាពប្រជាពលរដ្ឋកាន់តែមានភាពល្អប្រសើរឡើងពីមួយថ្ងៃទៅមួយថ្ងៃ ដែលបានរួមចំណែកយ៉ាងសំខាន់ក្នុងការកាត់បន្ថយភាពក្រីក្រជូនប្រជាពលរដ្ឋ។
លោករដ្ឋមន្រ្តី បន្តថា «ក្រសួងពាណិជ្ជកម្ម ក្នុងនាមជាក្រសួងសម្របសម្រួល បានខិតខំប្រឹងប្រឹងយ៉ាងខ្លាំងក្នុងការសហការជាមួយក្រសួង ស្ថាប័នពាក់ព័ន្ធនៅថ្នាក់ជាតិ និងថ្នាក់ខេត្តនៃប្រទេសទាំងបីដើម្បីអនុវត្តកិច្ចព្រមព្រៀង និង ការសម្រេចរបស់ប្រមុខដឹកនាំ CLV ឱ្យទៅជាសកម្មភាពជាក់ស្តែង»។
លោករដ្ឋមន្ត្រី ប៉ាន សូរស័ក្តិ បានជម្រាបជូនអង្គប្រជុំអំពីចំណុចសំខាន់ៗ ដែលប្រទេសទាំងបី ត្រូវខិតខំអនុវត្តបន្ត រួមមាន៖ ផែនការអភិវឌ្ឍន៍វិស័យទេសចរណ៍សម្រាប់ CLV DTA ដើម្បីប្រែក្លាយតំបន់ព្រំដែនទៅជាតំបន់អេកូទេសចរណ៍ និងទប់ស្កាត់ការបំផ្លាញបរិស្ថានដែលជាអាយុជីវិតរបស់យើងនៅអនាគត, ផែនការអភិវឌ្ឍន៍ឧស្សាហកម្មកៅស៊ូ CLV DTA ដោយខិតខំបង្កើតរោងចក្រកែច្នៃកៅស៊ូ និងពង្រឹងគុណភាពកៅស៊ូសម្រាប់លក់ចេញទៅទីផ្សារធំៗ, ការពង្រឹងកិច្ចសហប្រតិបត្តិការក្នុងវិស័យសុខភាពសាធារណៈ និងសមត្ថភាពបុគ្គលិកសុខាភិបាល ក៏ដូចជាការបង្កើតសាលាពហុជំនាញជូនយុវជន ដើម្បីពួកគេអាចស្នងការអភិវឌ្ឍ និងបន្តកេរ្តិ៍មរតកសាមគ្គីភាព និងកិច្ចសហប្រតិបត្តិការជាបងប្អូននៅក្នុងតំបន់។
ក្នុងកិច្ចប្រជុំរដ្ឋមន្ត្រីពាណិជ្ជកម្ម បានឆ្លើយសំណួរផ្សេងៗរបស់អង្គប្រជុំ និងបានបកស្រាយយ៉ាងក្បោះក្បាយ ដោយបានជម្រាបអង្គប្រជុំបន្ថែមអំពីការកែសម្រួលផែនការមេសម្រាប់ការអភិវឌ្ឍសេដ្ឋកិច្ច-សង្គមកិច្ច ក្នុង CLV DTA ដល់ឆ្នាំ២០៣០ ដោយបញ្ចូលការអភិវឌ្ឍតាមរបបជីវភាពថ្មីក្រោយសម័យកូវីដ (New Normal) តាមរយៈការធ្វើពាណិជ្ជកម្មតាមព្រំដែន និងប្រក្រតីភាពនៃសង្គមនិងសេដ្ឋកិច្ចរបស់យើង ក៏ដូចជាផែនការ និងគម្រោងជាក់លាក់ដើម្បីអនុវត្តផែនការសកម្មភាពសម្រាប់ការតភ្ជាប់សេដ្ឋកិច្ច CLV រហូតដល់ឆ្នាំ២០៣០ ដោយផ្តោតសំខាន់លើការធ្វើពាណិជ្ជកម្មតាមប្រព័ន្ធឌីជីថល ដើម្បីជំរុញការអភិវឌ្ឍសេដ្ឋកិច្ច និងលើកកម្ពស់ជីវភាពប្រជាពលរដ្ឋនៅតាមបណ្តាខេត្ត CLV។
ប្រធានអនុគណៈកម្មការជំនាញទាំង៤ ដែលស្ថិតក្រោមគណៈកម្មាធិការសម្រាប់សម្របសម្រួលការងារសហប្រតិបត្តិការអភិវឌ្ឍន៍តំបន់ត្រីកោណកម្ពុជា-ឡាវ-វៀតណាម ក៏បានសេចក្តីរាយការណ៍លំអិតអំពីវឌ្ឍនភាព បញ្ហាប្រឈម ក៏ដូចជាទិសដៅការងារនៃកិច្ចសហប្រតិបត្តិការក្រោមក្របខណ្ឌ CLV-DTA ក្រោមដែនសមត្ថកិច្ចរៀងៗខ្លួន។
លោក ឈាង វុន ដែលជាប្រធានអង្គប្រជុំ បានថ្លែងការកោតសរសើរ និងវាយតម្លៃខ្ពស់ដល់ក្រសួងពាណិជ្ជកម្ម ដែលបានខិតខំយកចិត្តទុកដាក់សម្របសម្រួលការងារក្នុងក្របខណ្ឌ CLV រហូតមក ដែលបានរួមចំណែកធ្វើឱ្យតំបន់អភិវឌ្ឍន៍ CLV កាន់តែរីកចម្រើនបន្ថែមទៀត៕
