(ភ្នំពេញ)៖ សាលាដំបូងរាជធានីភ្នំពេញ នឹងប្រកាសសាលក្រម សំណុំរឿងតារា Facebook លោក ផែង វណ្ណ: និងលោកស្រី កែវ ម៉ាលី ម្ចាស់វិមានចរណៃ នៅរសៀលថ្ងៃទី២៤ ខែមីនា ឆ្នាំ២០១៦​នេះ ពាក់ព័ន្ធពីបទបរិហារកេរ្តិ៌ ដែលសមាជិកសភាព្រឹទ្ធសភា បានប្តឹងមន្រ្តីនគរបាលក្រសួងមហាផ្ទៃរូបនេះ។ នេះបើយោងតាមមន្រ្តី សាលាដំបូងរាជធានីភ្នំពេញ បានប្រាប់អង្គភាពព័ត៌មាន Fresh News នៅព្រឹកថ្ងៃនេះ។

សូមបញ្ជាក់ថា សាលាដំបូង​រាជធានី​ភ្នំពេញ នៅរសៀល​ថ្ងៃចន្ទ ទី ២១ ខែ មីនា ឆ្នាំ ២០១៦ បានបើកសវនាការជំនុំជម្រះ ទៅលើតារា Facebook ឈ្មោះ ផែង វណ្ណៈ និងឈ្មោះ ហង្ស បូរី ពីបទ «ផ្សាយ​ព័ត៌មាន​មិន​ពិត និង​បរិហាកេរ្តិ៍​ជា​សាធារណៈ» ទៅលើលោកស្រីឧកញ៉ា កែវ ម៉ាលី ជា​សមាជិក​ព្រឹ​ទ្ឋ​សភា និងជា​ម្ចាស់​ខុន​ដូ​វិមាន​ចរណៃ និង​ឧ​ត្ត​ម​សេនីយ៍​ឯក សៀក សុជាតិ តាម​ Facebook ប្រព្រឹត្ត​នៅក្នុងរាជធានីភ្នំពេញ កាលពីអំឡុងខែ កក្កដា និងសីហា ឆ្នាំ២០១៥។  

លោកចៅក្រម តុប ឈុនហេង បាន​ថ្លែង​ឲ្យដឹង​នៅក្នុង​អង្គ​សវនាការ​ថា៖ ជនជាប់ចោទ​​ទាំង២នាក់​នេះ មានឈ្មោះ ផែង វណ្ណៈ ភេទប្រុស អាយុ៤៥ឆ្នាំ និងឈ្មោះ ហង្ស បូរី ភេទស្រី អាយុ ៥៤ឆ្នាំ ។

ជនជាប់ចោទ​ទាំង២នាក់​នេះ ត្រូវបាន​តំណាង​អយ្យការ ចោទប្រកាន់​ពីបទ «ផ្សាយ​ព័ត៌មាន​មិន​ពិត និង​បរិហាកេរ្តិ៍​ជា​សាធារណៈ» តាមបញ្ញាតិមាត្រា ៣០៥ នៃ ក្រមព្រហ្មទណ្ឌ កម្ពុជា។ជន​ជាប់ចោទត្រូវបានប្តឹង​ដោយ លោកស្រី​ឧកញ៉ា កែវ ម៉ាលី ជា​សមាជិក​ព្រឹ​ទ្ឋ​សភា និងជា​ម្ចាស់​ខុន​ដូ​វិមាន​ចរណៃ ដែលមាន​សំណុំរឿង​ចុះបញ្ជី​នៅតុលាការ ថ្ងៃទី២៥ ខែសីហា ឆ្នាំ២០១៥។

សម្រាប់លោក ផែង វណ្ណៈ នៅតែអះអាងថា លោកមិនបានធ្វើអ្វីខុសនោះទេ ហើយលោកស្រី កែវ ម៉ាលី ក៏បានប្តឹងលោកម្តងរួចមកហើយ ប៉ុន្តែត្រូវបានតុលាការសម្រេចឲ្យកាត់របៀប ស្រាប់តែពេល​នេះគាត់ប្តឹងម្តងទៀត។

យ៉ាងណាក៏ដោយ អ្នកប្រើបណ្តាញសង្គមដ៏ល្បីឈ្មោះរូបនេះ មានជំនឿថា តុលាការនឹងសម្រេចប្រកបដោយសុភវិនិច្ឆ័យ ផ្តល់យុតិ្តធម៌ជូនលោកជាក់ជាតិមិនខានឡើយ៕