(ភ្នំពេញ)៖ លោករដ្ឋមន្រ្តី សាយ សំអាល់ នៅរសៀលថ្ងៃទី២២ ខែមីនា ឆ្នាំ២០១៦ បានអនុញ្ញាតឱ្យលោកស្រី Rhona Smith អ្នករាយការណ៍ពិសេស របស់អង្គការសហប្រជាជាតិ ទទួលបន្ទុកសិទ្ធិមនុស្ស ចូលជួបពិភាក្សាការងារ ដើម្បីស្វែងយល់អំពីស្ថានភាព អនុវត្តសិទ្ធិមនុស្ស នៅក្នុងក្របខណ្ឌតំបន់ការពារធម្មជាតិ។

ក្នុងជំនួបនោះ លោករដ្ឋមន្រ្តីបានជម្រាបជូនភ្ញៀវអំពីវឌ្ឍនភាពការងារ កំណែទម្រង់របស់ក្រសួងបរិស្ថាន តាមរយៈការធ្វើទំនើបកម្មស្ថាប័ន ដើម្បីប្រសិទ្ធភាពកិច្ចគាំពារបរិស្ថាន ការគ្រប់គ្រងធនធាន​ធម្មជាតិ ការអភិរក្សជីវៈចម្រុះ និងការអភិវឌ្ឍដោយចីរភាព។

លោករដ្ឋមន្ត្រី សាយ សំអាល់ បានបញ្ជាក់ថា ការពង្រឹងការត្រួតពិនិត្យវាយតម្លៃ គម្រោងវិនិយោគអភិវឌ្ឍន៍ សម្បទានដីសេដ្ឋកិច្ច និងការដោះស្រាយផលប៉ះពាល់ ទៅលើប្រជាពលរដ្ឋ ដោយសារ​គម្រោង​វិនិយោគ ក៏ដូចជា ការបង្កើតនិងអភិវឌ្ឍសហគមន៍ តំបន់ការពារធម្មជាតិ គឺពិតជាបានរួមចំណែកយ៉ាងសំខាន់ ដល់ការលើកកម្ពស់សិទ្ធិ របស់ប្រជាសហគមន៍ តំបន់ការពារធម្មជាតិ។

ជាងនេះទៅទៀត លោករដ្ឋមន្រ្តីក៏បានលើកឡើងអំពីវិធានការ របស់រាជរដ្ឋាភិបាល ក្នុងការទប់ស្កាត់ និងបង្រ្កាបបទល្មើសព្រៃឈើ និងការពង្រឹងរចនាសម្ព័ន្ធគ្រប់គ្រង ការបែងចែកតួនាទី​ភារកិច្ចឱ្យដាច់​ពីគ្នា រវាងស្ថាប័នអភិរក្ស និងស្ថាប័នអភិវឌ្ឍន៍ ដើម្បីធានាប្រសិទ្ធភាពការងារគ្រប់គ្រង ធនធានធម្មជាតិ ការអភិរក្សជីវៈចម្រុះ និងការអភិវឌ្ឍដោយចីរភាព ដោយបានរំលេចអំពីភាពចាំបាច់ ក្នុងការរៀប​ចំក្រមបរិស្ថាន សំដៅធានាការពារសិទ្ធិសេរីភាព គ្រប់សកម្មភាពអភិវឌ្ឍន៍សេដ្ឋកិច្ចសង្គម ក៏ដូចជាសិទ្ធិរបស់ប្រជាសហគមន៍ តំបន់ការពារធម្មជាតិ៕