(ពោធិ៍សាត់)៖ លោក ម៉ៅ ធនិន អភិបាលខេត្តពោធិ៍សាត់ និងជាប្រធានអនុគណៈកម្មការចំពោះកិច្ចចាក់វ៉ាក់សាំងកូវីដ១៩ ក្នុងក្របខណ្ឌខេត្ត នៅថ្ងៃទី១៥ ខែកក្កដា ឆ្នាំ២០២១នេះ បានចុះត្រួតពិនិត្យ ដំណើរការចាក់វ៉ាក់សាំង សម្រាប់វគ្គទី៣ ដូសទី១ ជូនដល់ប្រជាពលរដ្ឋ តាមបណ្តាគោលដៅប្រឈមខ្លាំង ដែលអាជ្ញាធរបានកំណត់ ក្នុងភូមិសាស្រ្តក្រុងពោធិ៍សាត់ និងស្រុកតាលោសែនជ័យ នៃខេត្តពោធិ៍សាត់។

ថ្លែងក្នុងឱកាសចុះពិនិត្យទីតាំងនីមួយៗ លោក ម៉ៅ ធនិន បានឱ្យដឹងថា វ៉ាក់សាំងដែលចាក់ជូនប្រជាពលរដ្ឋនាពេលនេះ គឺមានចំនួនកំណត់ ពោលគឺសម្រាប់ចាក់តែប្រជាពលរដ្ឋ ដែលជាក្រុមគោលដៅប្រឈមខ្លាំង និងបន្តឈានដល់ការចាក់ជូនប្រជាពលរដ្ឋរបស់យើង ឱ្យបានគ្រប់គ្នាក្នុងពេលខាងមុខ។

លោកបានបន្តថា ទាំងនេះគឺជាការខិតខំប្រឹងប្រែងគ្រប់បែបយ៉ាង ពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដើម្បីរកវ៉ាក់សាំង និងបានដាក់ចេញវិធានការ សម្រាប់ចាក់ជូនប្រជាពលរដ្ឋរបស់យើងឱ្យបានគ្រប់ៗគ្នា នៅទូទាំងប្រទេស។

ជាមួយគ្នានេះដែរលោក ម៉ៅ ធនិន បានបន្ថែមថា វ៉ាក់សាំង១ គឺជាជីវិត១ ដូច្នេះ ហើយលោកបានដាក់ចេញនូវផែនការលម្អិត ដោយចាត់ក្រុមការងារយុវជន ក្រុមគ្រូពេទ្យ និងអាជ្ញាធរដែនដី ដើម្បីចាត់ចែងទទួលរៀបចំកិច្ចការនេះ ឱ្យមានសណ្តាប់ធ្នាប់ ស្របតាមវិធានការណ៍ «៣ការពារ និង៣កុំ» របស់សម្តេចតេជោ ព្រមទាំងការណែនាំរបស់ក្រសួងសុខាភិបាល ដើម្បីកាត់បន្ថយការឆ្លងជំងឺកូវីដ១៩ និងអាចជួយពន្លឿន ដល់ការចាក់វ៉ាក់សាំងបានកាន់តែលឿន និងបានជ្រាបចូលក្នុងខ្លួនប្រជាពលរដ្ឋបានឆាប់រហ័ស។

សូមជម្រាបជូនថា គិតមកដល់ពេលនេះ ខេត្តពោធិ៍សាត់ បានចាប់ដំណើរការចាក់វ៉ាក់សាំង (Sinopharm និងSinovac) របស់ប្រទេសចិន ចំនួន៣វគ្គរួចមកហើយ ដែលវគ្គទី១ ចំនួន២៤,៨០០ដូស ស្មើនឹង១២,៤០០នាក់, វគ្គទី២ ចំនួន៦ម៉ឺនដូស ស្មើនឹង ៣ម៉ឺននាក់ និងវគ្គទី៣នេះ ចំនួន១២ម៉ឺនដូស ស្មើនឹង៦ម៉ឺននាក់ ជូនប្រជាពលរដ្ឋតាមបណ្តាគោលដៅប្រឈមខ្លាំង តាមបណ្តាស្រុកក្រុងទាំង៧ ក្នុងខេត្តពោធិ៍សាត់៕