(ភ្នំពេញ)៖ ប្រធានអង្គភាពប្រឆាំងអំពើពុករលួយ លោកទេសរដ្ឋមន្រ្តី ឱម យិុនទៀង បានប្រកាសថា នៅវេលាម៉ោង៩ ព្រឹកថ្ងៃទី២៤ ខែមីនា ឆ្នាំ២០១៦នេះ អង្គភាពរបស់លោក នឹងប្រកាសលទ្ធផល នៃខ្សែអាត់សំឡេង ដែលគេសង្ស័យថា ជាសំឡេងរបស់លោក កឹម សុខា ប្រធានស្តីទីគណបក្សសង្គ្រោះជាតិ ដែលត្រូវបានផ្សព្វផ្សាយលើបណ្តាញសង្គមFacebook ហើយត្រូវបាន​សារព័ត៌មានយក​មកចុះផ្សាយបន្ត។

នៅក្នុងសន្និសីទនាព្រឹកថ្ងៃទី២២ ខែមីនា ឆ្នាំ២០១៦នេះ ស្តីពីការពិភាក្សា​បណ្តឹងរបស់ក្រុមយុវជន និងនិស្សិតចំពោះលោក កឹម សុខានោះ  លោកទេសរដ្ឋមន្រ្តី បានបញ្ជាក់ថា នាយកដ្ឋាន​កោសល្យវិច័យ​របស់អង្គភាពប្រឆាំង​អំពើពុករលួយ នឹងប្រើរយ:ពេល​មួយថ្ងៃ (នៅថ្ងៃស្អែកទី២៣ ខែមីនា) ដើម្បីសើុបអង្កេត ខ្សែអាត់សំឡេង ដើម្បីប្រកាសលទ្ធផលជាផ្លូវការនៅថ្ងៃព្រហស្បតិ៍នេះ។

ប្រធានអង្គភាពប្រឆាំងអំពើពុករលួយ រូបនោះបានថ្លែងបញ្ជាក់ និងអះអាងថា ការផ្សព្វផ្សាយសម្លេងរឿងអាស្រូវផ្លូវភេទរបស់លោក កឹម សុខា អ្នកសារព័ត៌មានគ្មានទោសកំហុសនោះទេ ដោយសារ​សំឡេង​ទាំងនោះ ពួកគេទទួលបានពីប្រភពទី៣។

សូមជំរាបថា Facebook «រឿងពិត CNRP» រហូតដល់ពេលនេះបានបង្ហោះ​សារសំឡេងឆ្លងឆ្លើយ រហូតដល់វគ្គទី៣៤ ក្នុងនោះមានសំឡេងមួយ ដែលធ្វើឱ្យគេសង្ស័យថា លោក កឹម សុខា យកលុយ​៤០០០ដុល្លារ ដែលប្រមូល​បានពីអាមេរិក ឲ្យទៅស្រីស្នេហ៍​ឈ្មោះ ពៅ បើកហាងរកស៊ី៕