(ភ្នំពេញ)៖ មន្ត្រីជាន់ខ្ពស់គណបក្សសង្គ្រោះជាតិ (CNRP) លោក អេង ឆៃអ៊ាង បានបញ្ចេញអារម្មណ៍ អស់សំណើចយ៉ាងខ្លាំង ចំពោះសំណើរបស់ប្រធានស្តីទី រដ្ឋសភា លោក ងួន ញិល អញ្ជើញប្រធានស្តីទី គណបក្សសង្គ្រោះជាតិ លោក កឹម សុខា ទៅបំភ្លឺនៅចំពោះមុខរដ្ឋសភា ជុំវិញបញ្ហារឿងរ៉ាវស្នេហាស្រីក្មេង ។

យោងតាមបណ្ដាញ ទំនាក់ទំនងសង្គម (Facebook) លោក អេង ឆៃអ៊ាង បានលើកឡើងថា៖ «ថ្ងៃនេះ (២១-០៣-២០១៦) អគ្គលេខាធិការរដ្ឋសភា ឡេង ប៉េងឡុង បានចេញលិខិតមួយ គួរឲ្យអស់សំណើច»។

ការចេញបញ្ចេញយោបល់បែបនេះ ត្រូវបានលោក ឡេង ប៉េងឡុង ឆ្លើយតបទៅវិញថា ការចេញលិខិតរបស់រដ្ឋសភា ទៅកាន់តំណាងរាស្រ្តលោក កឹម សុខា គឺធ្វើឡើងតាមមាត្រា៣៥ នៃរដ្ឋធម្មនុញ្ញ ដោយយកចិត្តទុកដាក់ចំពោះពាក្យបណ្តឹងរបស់ប្រជាពលរដ្ឋ។

សូមបញ្ជាក់ថា លោក ឡេង ប៉េងឡុង អគ្គលេខាធិការនៃរដ្ឋសភា នៅថ្ងៃទី២១ ខែមីនា ឆ្នាំ២០១៦នេះ បានធ្វើលិខិតមួយផ្ញើជូន លោក កឹម សុខា ដើម្បីឱ្យបំភ្លឺទៅនឹងរឿងអាស្រូវស្នេហា​ របស់លោក បន្ទាប់ពីរដ្ឋសភាទទួលបានពាក្យបណ្តឹង របស់ក្រុមនិស្សិត ដឹកនាំដោយ លោក ស្រី ចំរើន។

លិខិតរបស់លោក ឡេង ប៉េងឡុង ចុះថ្ងៃទី២១មីនា បានសរសេរថា «យោងតាមលិខិតលេខ០០៨ ចុះថ្ងៃទី១៥ ខែមីនា ឆ្នាំ២០១៦ របស់គណៈកម្មការសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា ព្រឹទ្ធសភានៃរដ្ឋសភា ដើម្បីការពារកិត្យានុភាពរបស់រដ្ឋសភា ការពារកិត្តិយសជាតិនិងសេចក្តីថ្លៃថ្នូរ របស់តំណាងរាស្ត្រ ឯកឧត្តម ងួន ញ៉ិល ប្រធានរដ្ឋសភាស្តីទី បានប្រគល់ភារកិច្ចឲ្យអគ្គលេខាធិការដ្ឋានរដ្ឋសភា បញ្ជូនញត្តិនេះទៅឯកឧត្តម កឹម សុខា»។

លិខិតពីរដ្ឋសភាដដែល បានសរសេរប្រាប់លោក កឹម សុខា ថា រដ្ឋសភាបានទទួលញត្តិស្នើសុំពីតំណាងយុវជន និងនិស្សិត គឺលោក ស្រី ចំរើន ដែលបានស្នើសុំឲ្យលោក កឹម សុខា ឆ្លើយបំភ្លឺចំពោះខ្សែអាត់ សំឡេងស្នេហាអសីលធម៌ ដែលសង្ស័យថាជាសម្លេងរបស់លោក។

លិខិតពីរដ្ឋសភាដដែល បានសរសេរថា «សុំឱ្យ ឯកឧត្តម កឹម សុខា ពិនិត្យពិចារណា និងផ្តល់នូវការបំភ្លឺតាមសំណើ ឲ្យបានឆាប់តាមការគួរ»៕