(ភ្នំពេញ)៖ ផលិតកម្ម Wonder Film បានសម្ពោធស្នាដៃទី១របស់ខ្លួន បញ្ចាំងជាផ្លូវការ នៅរោងភាពយន្ត Major Cineplex by Cellcard ដែលបានចំណាយទុនប្រមាណជាង ១០ម៉ឺនដុល្លារ ក្នុងការផលិត ក្រោមការចូលរួមពីប្រធាននាយកដ្ឋានភាពយន្ត លោក ស៊ិន ចាន់សាយ៉ា ផលិតករ អ្នកដឹកនាំសម្ដែង និងសិល្បករ-សិល្បការិនី ជាច្រើនរូប។
លោក សែន វិសាល ប្រធានគ្រប់គ្រង និងជាអ្នកនិពន្ធរឿង «ប្រាសាទកំបាំងមុខ» ប្រចាំក្នុងផលិតកម្ម Wonder Film Entertainment បាននិយាយថា ក្នុងរឿងនេះ ថ្វីបើជាស្នាដៃទី១របស់ផលិតកម្ម ហើយបានចំណាយទុនផលិត អស់ច្រើនបន្តិចក្ដី ប៉ុន្តែលោកធ្វើនេះ គឺចង់ឲ្យភាពយន្តមានលក្ខណៈពិសេស មានគុណភាពល្អ ខុសប្លែកពីភាពយន្តដទៃ ជាស្នាដៃរបស់កូនខ្មែរពិតៗ ហើយលក្ខណៈពិសេស នៃស្នាដៃរបស់លោក គឺមិនបានចម្លងសាច់រឿងពីគេនោះទេ។ ជាមួយគ្នានេះ ការដាក់បញ្ចាំងភាពយន្តនេះឡើង លោកមិនផ្តោតសំខាន់ និងរំពឹងខ្ពស់ថា ទទួលបានប្រាក់ចំណេញ ឬខាតនោះទេ ពោលលោកចង់ឲ្យកូនខ្មែរទទួលស្គាល់ ស្នាដៃរបស់កូនខ្មែរ ស្គាល់ពីវប្បធម៌របស់ខ្មែរ ដើម្បីឲ្យអន្តរជាតិដឹងថា ខ្មែរក៏មានវប្បធម៌ និងអរីយធម៌ ដ៏អស្ចារ្យ តាំងពីយូរលង់ណាស់មកហើយ។
លោកនិយាយបន្តថា ក្នុងរឿង «ប្រាសាទកំបាំងមុខ» របស់ផលិតកម្ម Wonder Film បានផ្ដោតសំខាន់ ក្នុងការដាក់បញ្ចូលនូវឫសគល់ក្បាច់គុនខ្មែរ តាំងពីជំនាន់មុន មានដូចជាក្បាច់ល្បុក្កតោ ក្បាច់គុណបុរាណ ដែលត្រូវបានគេមើលរំលង ដោយក្បាច់គុនទាំងនោះ បានស្រាវជ្រាវពីយ័ន្តបុរាណ និងសិលាចារិកនានា តាមប្រាសាទបុរាណ មុនចងក្រងជាសាច់រឿង ហើយដើម្បីបង្ហាញ ឲ្យមនុស្សជំនាន់ថ្មីដឹងថា ក្បាច់គុណខ្មែរពីបុរាណ ពិតជាអស្ចារ្យ និងបង្ហាញពីអត្ថសញ្ញាណ នៃវប្បធម៌តាំងពីសម័យដើម។
អ្វីដែលកាន់តែអស្ចារ្យជាងនេះ ត្រូវបានលោក សែន វិសាល សង្កត់ធ្ងន់ថា ស្នាដៃដំបូងរបស់លោកបាន ចំណាយទុនក្នុងការផលិតចន្លោះពី១០ម៉ឺន ទៅ១២ ម៉ឺនដុល្លារអាមេរិក និងចំណាយពេលជាង ១ ឆ្នាំសម្រាប់ដំណើរការផលិត ដើម្បីនាំមកនូវគុណភាពល្អ សម្រាប់ទស្សនិកជន ហើយជោគជ័យរបស់លោក មិនបានគិតទៅលើប្រាក់ចំណេញទេ តែជោគជ័យលើគុណភាពភាពយន្ត សម្រាប់ទស្សនិកជន៕
