(ភ្នំពេញ)៖ រដ្ឋមន្ដ្រីក្រសួងសុខាភិបាល លោក ម៉ម ប៊ុនហេង នៅព្រឹកថ្ងៃទី១៩ ខែមីនា ឆ្នាំ២០១៦នេះ បានអញ្ជើញបើកមហាសន្និបាត សមាគមជំងឺត្រចៀក ច្រមុះ បំពង់ក សល្យសាស្ដ្រ ក្បាល និង ក កម្ពុជា និងទិវាវេជ្ជសាស្រ្ដ ORL សហប្រតិបត្ដិការ ជាមួយមន្ទីរពេទ្យ JIKEI  តូក្យូ ជប៉ុន ដែលប្រារព្ធធ្វើឡើងចំនួនពីរថ្ងៃនាសណ្ឋាគារភ្នំពេញ។

លោក រដ្ឋមន្ដ្រី ម៉ម ប៊ុនហេង បានថ្លែងថា ការបើកមហាសន្និបាតនេះ មានទិសដៅពីរ គឺទី១-ការពិនិត្យសមិទ្ធផល របស់សមាគមលោកគ្រូពេទ្យ និងការផ្លាស់ប្ដូរគណៈដឹកនាំនៃសមាគមផង  ទី២-ការផ្លាស់ប្ដូរបទពិសោធន៍ជាអន្ដរជាតិ ខាងវិស័យវេជ្ជសាស្រ្ដ ត្រចៀក ច្រមុះ បំពង់ក ដើម្បីមានពេទ្យជំនាញ មកពីបណ្ដាប្រទេសជិតខាង និងប្រទេសជប៉ុនផងដូច្នេះ នេះជាឱកាសមួយដ៏ល្អ ដើម្បីពង្រីកវិជ្ជាជីវៈរបស់ខ្លួន ក៏ដូចជាការផ្សារភ្ជាប់នៃទំនាក់ទំនងនេះ កាន់តែស្អិទរមួត ក្នុងន័យកិច្ចសហប្រតិបត្ដិការ ។

លោករដ្ឋមន្ដ្រីបន្ដថា «ថ្ងៃនេះ ខ្ញុំក៏បានជំរុញ ដល់សមាគមផងដែរ ឲ្យពង្រីកបន្ថែមទៀតលើ វិស័យនេះ ឲ្យកាន់តែទូលំទូលាយ និងរីកចម្រើនទាំងក្នុងតំបន់ និងសមាហរណ៍កម្មអាស៊ាន ហើយនឹងប្រទេសដទៃ ដូចជាអឺរ៉ុប អាមេរិក និងបណ្ដាប្រទេសជាច្រើន ដើម្បីនូវពង្រីកនូវពង្រឹងសមត្ថភាពរបស់ពេទ្យយើង ឲ្យធ្វើយ៉ាងម៉េច ឲ្យសមត្ថភាពពេទ្យរបស់យើងកាន់តែខ្ពស់ជំនាញច្បាស់លាស់ ដើម្បីជួយសង្រ្គោះប្រជាពលរដ្ឋយើងផង និង ឆ្លើយតបជាមួយយុទ្ធសាស្ដ្រចតុកោណ របស់រាជរដ្ឋាភិបាលកម្ពុជា ក្រោមការដឹកនាំរបស់ សម្ដេចតេជោ ហ៊ុនសែន»។

លោករដ្ឋមន្ដ្រីក៏បានអំពាវនាវ ដល់គ្រប់ស្ថាប័នពាក់ព័ន្ធទាំងអស់ ត្រូវតែបង្កើតសារអប់រំសុខភាពទូទៅ ដោយលក្ខណៈងាយស្រួលយល់ដឹងខ្លីៗ ដល់ប្រជាជនពលរដ្ឋកម្ពុជា ឲ្យយល់ដឹងពីវិធីសាស្ដ្រ នៃការការពារការឆ្លងជំងឺផ្សេងៗ និងទប់ស្កាត់កុំឲ្យមានមូសខ្លា បន្ដឲ្យមានជំងឺគ្រុនឈាម ឬគ្រុនចាញ់ជាដើម។

ទន្ទឹមនឹងនោះ លោកវេជ្ជបណ្ឌិត ថុង ម៉េងឡុង ប្រធានសមាគមគ្រូពេទ្យ ត្រចៀក ច្រមុះ បំពង់ក សល្យសាស្រ្ដ ក្បាល និង ក កម្ពុជា បានថ្លែងថា ការប្រារព្ធមហាសន្និសីទនេះ ក្នុងគោលបំណង ដើម្បីឲ្យសមាជិក សមាជិកា បានជួបជុំគ្នា ក្នុងន័យបង្ហាញពីសាមគ្គីភាព ផ្លាស់ប្ដូរនូវបទពិសោធន៍ ទៅវិញទៅមក ពង្រីកនូវសមាជិក ដែលនៅតាមបណ្ដាខេត្ដ រាជធានីបន្ថែមទៀត ជាធ្នុងមួយពីមួយអាណតិ្ដទៅ មួយអាណិត្ដ។

លោកបន្ដថា កម្មវិធីយើងតែងតែប្រារព្ធធ្វើ ជារៀងរាល់ឆ្នាំ មិនតែប៉ុណ្ណោះ សមាគមយើង ក៏បានបោះពុម្ពទស្សនារដ្ដីស្ដីពី ត្រចៀក ច្រមុះ បំពង់ក និងកំពុងរៀបចំដំណើរការ វេបសាយដើម្បីសំរួលដល់សមាជិករបស់យើង ក្នុងការទួលព័ត៌មាន ឯកសារ ស្រាវជ្រាវ លើវិស័យ ត្រចៀក ច្រមុះ បំពង់ សល្យសាស្ដ្រ ក្បាល និង ក ឲ្យកាន់តែទូលំទូលាយ បន្ថែមទៀត ធ្វើយ៉ាងបង្កើននូវសមត្ថភាពវិជ្ជាជីវៈលោកគ្រូ ពេលពេទ្យនៅកម្ពុជាកាន់តែបោះជំហានទៅមុខ ដោយជោគជ័យ ពិសេស ដើម្បី បំពេញសេចក្ដីត្រូវការរបស់ប្រជាពលរដ្ឋទាំងម្ដង៕