(ភ្នំពេញ)៖ ទីបំផុត ចៅក្រមស៊ើបសួរសាលារាជធានីភ្នំពេញ លោក កី ម៉ានេរ៉ា បានសម្រេចចេញដីការបង្គាប់ឲ្យឃុំខ្លួន ជនសង្ស័យ៤នាក់ ដែលក្លែងធ្វើជានគរបាលប្រឆាំង បទល្មើសគ្រឿងញៀន ជម្រិតទារប្រាក់ពីពលរដ្ឋ។ នេះបើតាមដីការបង្គាប់ឲ្យឃុំខ្លួន ដែលបណ្ដាញព័ត៌មាន Fresh News ទទួលបាន នៅថ្ងៃទី២២ ខែមិថុនា ឆ្នាំ២០២១នេះ។

សូមរំលឹកថា ជនសង្ស័យទាំង៤នាក់នេះ ត្រូវបានកម្លាំងសមត្ថកិច្ចជំនាញ បើកប្រតិបត្តិការបង្ក្រាបបានទាំងព្រម នៅភូមិកំរៀង សង្កាត់ព្រៃវែង ខណ្ឌដង្កោ រាជធានីភ្នំពេញ បន្ទាប់ពីបានទទួលព័ត៌មានថា មានជនសង្ស័យមួយក្រុម មានគ្នា៤នាក់ បានក្លែងអត្តសញ្ញាណជានគរបាលប្រឆាំងគ្រឿងញៀន ប្រើប្រាស់រថយន្ត ម៉ូតូ ធ្វើសកម្មភាពចាប់ពលរដ្ឋសម្លុតយកប្រាក់។

ការបង្ក្រាបនេះ ធ្វើឡើងនៅថ្ងៃទី១៧ ខែមិថុនា ឆ្នាំ២០២១ ដោយកម្លាំងជំនាញ នៃមន្ទីរប្រឆាំងបទល្មើសគ្រឿងញៀន (ក៤) ដឹកនាំដោយលោកឧត្តមសេនីយ៍ទោ ឃឹង សារ៉ាត់ នាយករងមន្ទីរប្រឆាំងបទល្មើសគ្រឿងញៀន សហការជាមួយកម្លាំងជំនាញ នៃអធិការដ្ឋាននគរបាលខណ្ឌដង្កោ បានសហការស្រាវជ្រាវ ឈានទៅបង្រ្កាប ជាក់ស្តែងក្រុមក្លែងខ្លួន ជាសមត្ថកិច្ចនគរបាល នៃមន្ទីរប្រឆាំងបទល្មើសគ្រឿងញៀន កំពុងធ្វើសកម្មភាពចាប់ពលរដ្ឋសម្លុតយកប្រាក់។

ការអនុវត្តនេះតាមបញ្ជា នាយឧត្ដមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ និងនាយឧត្ដមសេនីយ៍ ម៉ក់ ជីតូ អគ្គស្នងការរង ទទួលផែនប្រឆាំងបទល្មើសគ្រឿងញៀន ក្រោមការបញ្ជាដឹកនាំផ្ទាល់របស់លោកឧត្ដមសេនីយ៍ឯក ឡឹក វណ្ណៈ នាយកមន្ទីរប្រឆាំងបទល្មើសគ្រឿងញៀន។

កម្លាំងសមត្ថកិច្ច បានឃាត់ខ្លួនជនសង្ស័យ ៤នាក់៖

១៖ ឈ្មោះ កេត វីរីយ៉ា ភេទប្រុស អាយុ៣៥ឆ្នាំ (មេក្លោងផ្តើមគំនិត)
២៖ ឈ្មោះ សយ តុលា ភេទប្រុស អាយុ៣២ឆ្នាំ
៣៖ ឈ្មោះ ផាន់ វីរៈភក្តី ភេទប្រុស អាយុ៣១ឆ្នាំ
៤៖ ឈ្មោះ សល់ ភារៈ ភេទប្រុស អាយុ៣១ឆ្នាំ។

វត្ថុតាងចាប់យករួមមានរថយន្ត ១គ្រឿង ម៉ូតូ ២គ្រឿង អាវុធខ្លី (ជ័រ) ១ដើម វិទ្យុទាក់ទង ១គ្រឿង ឯកសណ្ឋាននគរបាល ២ឈុត និងអាវ ១ មួកនគរបាល ១ ខ្សែក្រវាត់នគរបាល ១ អាវគ្រោះ ១ មានផ្លាកសញ្ញាគ្រឿងញៀន អាវកាក់ ១ មានផ្លាកសញ្ញាគ្រឿងញៀន កាបូកដៃមានសញ្ញានគរបាលគ្រឿងញៀន ១ កាតនគរបាលក្លែងក្លាយចំនួន ៣សន្លឹក កាតសារព័ត៌មានកំពង់សោមប៉ុស្តិ៍ ១សន្លឹក តេស្តទឹកមូត្ររកសារធាតុញៀន ១តេស្ត កាតកម្លាំងមូលដ្ឋានសម្ងាត់ក្លែងក្លាយ ២សន្លឹក (ក៧ ក៥) កាតសម្គាល់អាវុធខ្លី ១សន្លឹក អត្តសញ្ញាណប័ណ្ណសញ្ជាតិខ្មែរ ១សន្លឹក និងកាតចាក់វ៉ាក់សាំង ១សន្លឹក។

បើតាមឧត្តមសេនីយ៍ទោ ឃឹង សារ៉ាត់ នៅពេលនេះ កម្លាំងសមត្ថកិច្ចកំពុងបន្តស្វែងរកបក្ខពួក ជនសង្ស័យទាំង៤នាក់ខាងលើបន្ថែមទៀត ដើម្បីកសាងសំណុំរឿងបញ្ជូនទៅតុលាការ៕