(ភ្នំពេញ)៖ រឿងអាស្រូវស្នេហាផ្លូវភេទតាមទូរស័ព្ទរបស់ ប្រធានស្តីទីគណបក្សសង្គ្រោះជាតិ លោក កឹម សុខា ដែលត្រូវបានទម្លាយចេញដោយ Facebook ស្រីស្នេហ៍ និងតាមរយៈ Account Facebook របស់សកម្មជនគណបក្សសង្គ្រោះជាតិនៅសហរដ្ឋអាមេរិកឈ្មោះ «រឿងពិត CNRP» មកដល់ពេលនេះ នៅតែបន្តបែកធ្លាយ ថែមទាំងមានភាគពិសេសលាយឡំមួយៗផង។
បើតាមអ្វីដែល រឿងពិត CNRP ទម្លាយចេញ គឺដៃគូសន្ទនាស្នេហារបស់លោក កឹម សុខា មិនមែនមានតែស្រ្តីម្នាក់ឈ្មោះ អាមុំ នោះទេ គឺមានជាបន្តបន្ទាប់ដូចជា អាចិន នាងយេស ឬម៉ាក់នីតា ជាជនជាតិវៀតណាម អាពីន អាលីន និងអាលក្ខណ៍ជាដើម។
ទាក់ទិនបញ្ហានេះ គេមិនឃើញមានការឆ្លើយតបណាមួយពី គណបក្សសង្គ្រោះជាតិ និងបុគ្គល លោក កឹម សុខា ផ្ទាល់នោះទេ ក៏ប៉ុន្តែគេឮសូរសម្លេងស្រែកទាមទារឲ្យប្រធានស្ដីទីរូបនេះធ្វើការឆ្លើយបំភ្លឺ។ ការទាមទាររបស់មហាជនឲ្យ លោក កឹម សុខា ធ្វើការបំភ្លឺរឿងអាស្រូវផ្លូវភេទនេះ ក៏ដោយសារតែលោក កឹម សុខា ជាមេដឹកនាំបក្សនយោបាយ និងជាបុគ្គលសាធារណៈដែលគួរតែផ្តល់ភាពជាគំរូល្អដល់មហាជន មិនគួរប្រព្រឹត្តិអំពើអានាចារ អសីលធម៌បែបនេះនោះទេ។
ស្របពេលដែលប្រធានស្តីទីគណបក្សសង្គ្រោះជាតិ មិនតប កញ្ញា ឃុម ចាន់តារាទី ឬ ស្រីមុំ ជាស្រីស្នេហ៍ម្នាក់ក្នុងចំណោមជាច្រើននាក់របស់លោក កឹម សុខា បានចេញមុខបដិសេធតាមវិទ្យុអាស៊ីសេរី និង VOA ដោយបានអះអាងថា រូបនាងមិនជាប់ពាក់ព័ន្ធស្នេហាអូនបងជាមួយលោក កឹម សុខា នោះទេ។ បើទោះជាស្រីមុំ ខំប្រកែកយ៉ាងណាក៏ដោយមជ្ឈដ្ឋានទូទៅបានធ្វើការវាយតម្លៃថា សម្លេងស្រីមុំ សាសងគ្នាក្នុងខ្សែអាត់សម្លេងរឿងអាស្រូវស្នេហាជាមួយ លោក កឹម សុខា និងសម្លេងស្រីមុំ និយាយក្នុងវិទ្យុអាស៊ីសេរី និង VOA គឺជាសម្លេងមនុស្សតែមួយ។
បើផ្នែកទៅលើខ្លឹមសារសាសងគ្នាទៀតសោត គឺមិនអាចនិយាយថា ជាសម្លេងកាត់តនោះទេ។ អ្វីដែលជាភ័ស្តុតាំងរឹងមាំមិនអាចប្រកែកបានទៀតនោះ គឺម្ចាស់ហាងកាត់សក់ខ្មែរអង្គរ លោក ទួន សុជាតិ ដែលជាថៅកែផ្ទាល់របស់អាមុំ បានបញ្ជាក់យ៉ាងច្បាស់ថា សម្លេងបែកធ្លាយក្នុងខ្សែអាត់រឿងអាស្រូវផ្លូវភេទរបស់លោក កឹម សុខា គឺជាសម្លេងរបស់អាមុំ ១០០% មិនអាចប្រកែកបាន។ ប៉ុន្តែទោះជាបានឃើញ បានឮនូវសំឡេងច្បាស់ពិតរបស់ខ្លួនប៉ុណ្ណឹងទៅហើយក្តី ក៏ប្រធានស្តីទីបក្សសង្គ្រោះជាតិលោក កឹម សុខា នៅតែបន្តសម្ងំលាក់ខ្លួន មិនហ៊ានចេញមុខធ្វើការបកស្រាយបំភ្លឺជូនសាធារណជននៅឡើយទេ។
ការមិនឆ្លើយតបរបស់ លោក កឹម សុខា ត្រូវបានគេមើលឃើញថា ប្រធានស្តីទីគណបក្សសង្គ្រោះជាតិរូបនេះ ប្រើវិធីសាស្ត្រថ្មី គឺមិនឆ្លើយ មិនឆ្លង មិនឈ្លោះ និងមិនប្រកែកថា មានរឿងអាស្រូវនេះដែរ ប៉ុន្ដែយុទ្ធសាស្ត្រថ្មីនេះ ត្រូវបានអ្នកវិភាគនយោបាយលើកឡើងថា លោក កឹម សុខា បង្កើតឡើងដោយសារតែមិនហ៊ានប្រឈមការពិត។ បើហ៊ាននិយាយថា សម្លេងនេះមិនមែនជាសម្លេងខ្លួន គឺជាការកុហកគេ តែបើនិយាយថា សម្លេងនេះពិតជាសម្លេងខ្លួន គឺជារឿងអាម៉ាស់សម្រាប់អ្នកនយោបាយវ័យ ៦៣ឆ្នាំរូបនេះ ដែលនៅតែមានបំណងចង់ឆីស្រីក្មេងៗ។
បើសិនជាសម្លេងលោក កឹម សុខា មានតែមួយភាគមិនអីនោះទេ ប៉ុន្ដែសម្លេងមកដល់ថ្ងៃនេះ មានជាង ៣០ភាគទៅហើយ ភាគមួយណាក៏សម្លេងដូច កឹម សុខា ដែរ អញ្ចឹងហើយ មានតែមធ្យោបាយមិនឆ្លើយទេ ទើបជាមធ្យោបាយល្អ ព្រោះបើប្រាប់គេថា មិនមែនជាសម្លេងខ្លួន ក៏គ្មាននរណាគេជឿដែរ បូករួមទាំងចរិកចូលចិត្តស្រីក្មេងផងនោះ គ្មានអ្នកណាម្នាក់ជឿថា សម្លេងនោះមិនមែនជាលោក កឹម សុខា ឡើយ។ តែគេគ្រប់គ្នាគ្រាន់ហួសចិត្តថា លោក កឹម សុខា ហ៊ាននិយាយភាសាសាហាវដល់ថ្នាក់ហ្នឹងផង!! បើធ្លាប់ឃើញតែលោកកាន់ក្បាលមេក្រូ ឈរស្រែកសំដែងរិទ្ធនៅលើឆាក មិននឹកស្មានថា នៅក្រោយឆាក លោក កឹម សុខា ក៏សំបូរវោហា ញ៉ែស្រីមិនចាញ់ក្មេងៗដែរសោះ!!
ជារួមករណីរឿងអាស្រូវស្នេហាស៊ីជម្រៅរបស់ប្រធានស្តីទី គណបក្សសង្គ្រោះជាតិលោក កឹម សុខា ជាមួយនឹងស្រីៗចម្រុះមជ្ឈដ្ឋាន ជាពិសេសជាមួយអ្នកកាត់សក់ឈ្មោះស្រីមុំ ដែលត្រូវបានប្រព័ន្ធផ្សព្វផ្សាយជាច្រើនចាប់អារម្មណ៍ និងផ្សាយបន្តភ្លូកទឹកភ្លូកដី ប្រៀបដូចជាការចាប់សម្រាតខោអាវលោក កឹម សុខា កណ្ដាលហ្វូងមហាជនដូច្នេះដែរ។ ឆ្លើយតបទៅនឹងសភាពការតានតឹងនេះ លោក កឹម សុខា បានត្រឹមប្រកាសប្រកាន់ជំហរថ្មី គឺគ្មានអ្វីក្រៅ ពីការ «មិនឈ្លោះ មិនឆ្លើយ មិនឆ្លង» និងមិនប្រកែកតែប៉ុណ្ណោះ ព្រោះថា រឿងពិតប្រសិនបើហារទៅវាស្លាក់ ខ្ជាក់ទៅក៏វាស្លែង៕
