(ភ្នំពេញ)៖ ត្រឹមរយៈពេលពីរថ្ងៃ ពោលគឺនៅថ្ងៃទី១៥ និងថ្ងៃទី១៦ ខែមីនា កម្លាំងគយចល័ត ចាប់បានឡានសេរីទំនើបៗ ចំនួន៨គ្រឿងអត់ពន្ធទៀតហើយ នៅតាមគោលដៅ និងទីតាំងខុសៗគ្នា នៅទូទាំងរាជធានីភ្នំពេញ។

សម្រាប់ថ្ងៃទី១៥ ខែមីនា ឆ្នាំ២០១៦ កម្លាំងគយចល័ត ចុះចាប់បានរថយន្ត ៣គ្រឿង  រួមមានរថយន្តទី១៖ High Lander ពណ៌ខ្មៅ ចាប់បាន នៅចំណុចតុលាការយោធា។ រថយន្តទី២៖ ម៉ាក Land Cruiser 2014 ពណ៌ស ចាប់បាននៅម្តុំបឹងស្រឡាង ខណ្ឌទួលគោក និងទី៣៖​ ម៉ាក Rang Rover 2010 ពណ៌ខ្មៅ ចាប់បាននៅមុំកោះពេជ្រ កែ្បរផ្សារទំនើប Aeon។

ដោយឡែកនៅថ្ងៃទី១៦ ខែមីនា​ ឆ្នាំ២០១៦ កម្លាំងគយចល័តក៏ចាប់បានរថយន្ត ៥គ្រឿងបន្ថែមទៀត រួមមាន រថយន្តទី១៖ Lexus 570 ពណ៌ខ្មៅ នៅម្តុំសាលាភូមិន្ទរដ្ឋបាល, រថយន្តទី២៖ ម៉ាក Camry 2014 ចាប់បាននៅក្បែរវិទ្យាល័យបឹងកេងកង, រថយន្តទី៣៖ ម៉ាក Lexus 570 ស៊េរី 2009 ចាប់បាននៅមុខសណ្ឋាគារភ្នំពេញ រថយន្តទី៤៖  ម៉ាក Lexus 570 ស៊េរី 2013 ចាប់បាននៅសង្កាត់ភ្នំពេញថ្មី ខណ្ឌសែនសុខ និង​ រថយន្តទី៥៖ ម៉ាក Land Cruiser ពណ៌ខ្មៅ ចាប់បាននៅមុខមជ្ឈមណ្ឌលរ៉ក។

មន្រ្តីគយចល័តបានឲ្យដឹងថា ចំពោះរថយន្តម៉ាក Lexus 570 ស៊េរី 2013 ស្លាកលេខ៖ 2AB-1817 គឺមានការក្លែងក្លាយឯកសារ នឹងត្រូវបញ្ជូនទៅកាន់តុលាការដោះ​ស្រាយតាមផ្លូវច្បាប់។ ការចុះចាប់នេះដឹកនាំដោយកម្លាំងគយចល័ត សហការជាមួយកម្លាំងអាវុធហត្ថលើផ្ទៃប្រទេស ហើយកម្លាំងគយចល័ត នឹងបន្តចុះចាប់ដូចភ្លៀងរលឹម​ជាបន្តបន្ទាប់ទៀត៕