(កណ្តាល)៖ នៅក្នុងពិធីនៃការប្រកាសផ្ទេរ តំណែងប្រធានមន្ទីរមុខងារសាធារណៈខេត្តកណ្តាល លោក ព្រុំ សុខា រដ្ឋមន្ត្រីក្រសួងមុខងារសាធារណៈ បានថ្លែងជម្រាបអ្នកចូលរួមនៃកិច្ចប្រជុំថា យើងត្រូវជម្រុញអនុវត្តកម្មវិធីកំណែទម្រង់រដ្ឋបាលសាធារណៈ របស់រាជរដ្ឋាភិបាល ឱ្យបន្តដំណើរការយ៉ាងសកម្មសមស្របជាមួយស្ថានភាព ជាក់ស្តែងនាពេលបច្ចុប្បន្ន ពិសេសគឺត្រូវសម្របជាមួយរបៀបរស់នៅ និងការបំពេញការងាររបស់មន្ត្រីរាជការ តាមគន្លងនៃប្រក្រតីភាពថ្មីក្នុងបរិបទកូវីដ-១៩។

ពិធីនេះបានប្រព្រឹត្តទៅ នៅព្រឹកថ្ងៃទី១៦ ខែមិថុនា ឆ្នាំ២០២១ នាសាលប្រជុំសាលាខេត្តកណ្តាល ដោយមានការចូលរួមពីសំណាក់លោក ម៉ៅ ភិរុណ ប្រធានក្រុមប្រឹក្សាខេត្តកណ្តាល លោក គង់ សោភ័ណ្ឌ អភិបាលខេត្ត អស់លោក លោកស្រីអភិបាលរងខេត្ត ប្រធាន អនុប្រធានមន្ទីរជុំវិញខេត្ត រួមជាមួយមន្ត្រីរាជការនៃសាលាខេត្ត និងមន្ទីរមុខងារសាធារណៈខេត្ត សរុបចំនួនអ្នកចូលរួមមានប្រមាណ ១២០នាក់។

លោក រដ្ឋមន្ត្រី ព្រុំ សុខា ក៏បានថ្លែងនៅក្នុងឱកាសនោះផងដែរថា ការចូលរួមយ៉ាងសស្រាក់សស្រាំរបស់កងកំលាំងប្រដាប់អាវុធ កំលាំងសមត្ថកិច្ចគ្រប់ផ្នែក និងមន្ត្រីរាជការ ប្រជាពលរដ្ឋទូទាំងប្រទេស ក្នុងយុទ្ធនាការប្រយុទ្ធប្រឆាំងកូវីដ-១៩ ក្រោមមគ្គុទេសក៏ដឹកនាំដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា កំពុងក្លាយជាចលនាសាមគ្គីជាតិដ៏ខ្លាំងក្លាទ្រោលសភាពការណ៍ និងគ្រប់គ្រងបានស្ថានភាពកូវីដ-១៩។

យើងជឿជាក់យ៉ាងមុតមាំថា ជោគជ័យនៃចលនារួមគ្នាអនុវត្ត ដោយខ្ជាប់ខ្ជួននូវវិធានការសុខាភិបាល និងចលនាសម្រុកចាក់វ៉ាក់សាំងជាទ្រង់ទ្រាយធំ ដើម្បីកសាងគ្រឹះភាពស៊ាំ «Herd Immunity» នៃសុខភាពប្រជាជន ដើម្បីបង្ការទប់ស្កាត់ឱ្យបានឆាប់ការរាតត្បាតនៃជម្ងឺកូវីដ-១៩ រួមជាមួយបណ្តាសកម្មភាពជាក់ស្តែង នៃការពុះពារជំនះផលប៉ះពាល់ជាវិបត្តិសេដ្ឋកិច្ច សង្គម គឺពិតជានាំសង្គមជាតិយើងត្រឡប់ ទៅកាន់ប្រក្រតីភាពឡើងវិញយ៉ាងឆាប់រហ័ស បន្តជម្រុញបុព្វហេតុសុខសន្តិភាព វឌ្ឍនភាព វិបុលភាពសំរាប់អនាគតរុងរឿងរបស់មាតុភូមិ និងប្រជាជនយើង៕