(ព្រៃវែង)៖ ព្រះបរមសារីរិកធាតុ ដែលដង្ហែមកពីប្រទេសសិរីលង្កា និងប្រទេសថៃ ត្រូវបានដង្ហែចូលទៅតម្កល់ទុកជាទីសក្ការៈបូជានៅ វត្តជោតិវ័ន្ត ហៅវត្តជាច ស្ថិតក្នុងទឹកដីខេត្តព្រៃវែង នៅព្រឹកថ្ងៃទី១៥ ខែមីនា ឆ្នាំ២០១៥។
ពិធីដង្ហែព្រះបរមសារីរិកធាតុ អមជាមួយពិធីបុណ្យផ្កានេះ ត្រូវបានធ្វើឡើងដោយមានការអញ្ជើញជាអធិបតីភាពពី វង សូត រដ្ឋមន្ត្រី ក្រសួងសង្គមកិច្ច អតីតយុទ្ធជន និងយុវនីតិសម្បទា និងភរិយា ព្រមទាំងមានការនិមន្ត និង អញ្ជើញចូលរួមពីព្រះសង្ឃ និង ប្រជាពុទ្ធ បរិស័ទ។
លោក វង សូត បានសម្តែងក្តីសោមនស្សរីករាយក្រៃលែង ចំពោះពុទ្ធបរិស័ទ្ធជិតឆ្ងាយ ដែលបានលះបង់ពេលវេលាមកចូលរួមក្នុងកម្ម វិធីបុណ្យយ៉ាងច្រើនកុះករ ប្រកបដោយភាពសប្បាយរីករាយ ដោយបានដង្ហែព្រះបរមសារីរិកធាតុទុកនៅក្នុងវត្តដែលជាទីសក្ការៈបូជា តាមទំនៀមទម្លាប់ប្រពៃណីព្រះពុទ្ធសាសនា។
ជាពិសេស ការលះបង់កម្លាំងកាយចិត្ត និងបច្ច័យ ដោយសទ្ធាជ្រះថ្លា ដើម្បីចូលរួមចាប់មគ្គផលកសាងសមិទ្ធិផលនានា ក្នុងវត្តជាច ដែលជាតំបន់ដាច់ស្រយាលនៅកៀកនឹងព្រំដែនប្រទេសវៀតណាម។
លោករដ្ឋមន្រ្តី បានលើកឡើងទៀតថា «សព្វថ្ងៃ មានវត្តអារាម ផ្លូវថ្នល់ សាលារៀន មន្ទីរពេទ្យ ប្រព័ន្ធធារាសាស្រ្ត និង សមិទ្ធិផលជា ច្រើនទៀតរាប់មិនអស់ ក៏ដោយសារតែប្រទេសជាតិមានសុខសន្តិភាព ស្ថេរភាពនយោបាយ ប្រាសចាកពីរបបប្រល័យពូជសាសន៍ ប៉ុល ពត បានបំផ្លិចបំផ្លាញជីវិតមនុស្ស សត្វ ហេដ្ឋារចនាសម្ព័ន្ធ គ្មានសិទ្ធិសេរីភាព បន្សល់ទុកស្លាកស្នាមដ៏ជូរចត់ដល់ពេលបច្ចុប្បន្ន។ ប៉ុន្តែក្រោយថ្ងៃរំដោះ ០៧ មករា ១៩៧៩ ក្រោមការដឹកនាំរបស់ប្រមុខរាជរដ្ឋាភិបាល ប្រទេសជាតិត្រូវបានកសាងឡើងពីបាតដៃទទេ រហូតមានការអភិវឌ្ឍលើគ្រប់វិស័យដូចពេលនេះ»។
លោករដ្ឋមន្រ្តី បន្តថា វិស័យព្រះពុទ្ធសាសនា ក៏ត្រូវបានយកចិត្តទុក្ខដាក់យ៉ាងខ្លាំង ដោយបានកសាងវត្តអារាមជាច្រើនពាសពេញផ្ទៃ ប្រទេស មិនថាទីប្រជុំជន ឬ ជនបទដាច់ស្រយាលឡើយ លើសពីនេះទីអារាមគឺជាកន្លែងដែលផ្តល់នូវចំណេះដឹងដល់កូនចៅជំនាន់ ក្រោយមិនថាទាំងវិស័យអាណាចក្រ ឬពុទ្ធចក្រក៏ដោយ ព្រោះថា ព្រះពុទ្ធសាសនា គឺជាសាសនារបស់រដ្ឋ។
លោករដ្ឋមន្រ្តី បានអំពាវនាវដល់ប្រជាប្រជាពលរដ្ឋ ពុទ្ធបរិស័ទ្ធ ខិតខំរួមគ្នាថែរក្សា សមិទ្ធផលដែលមាន និងទំនៀមទំលាប់ប្រពៃណី តាមរយៈការគោរពវិន័យធ៌មអារជាដើម ។
លោក វង សូត រដ្ឋមន្រ្តី និងភរិយា បានប្រគេនបច្ច័យ ចំនួន ៥លានរៀល ដល់វត្តជាច ដើម្បីទុកចាត់ចែងកសាងសមិទ្ធិផលផ្សេង ទៀត និងឧបត្ថម្ភថវិកាមួយចំនួនជូនដល់យាយជីតាជី លោកគ្រូអ្នកគ្រូ សិស្សានុសិស្សផងដែរ ។ បន្ទាប់មកលោករដ្ឋមន្រ្តី និង ភរិយា ព្រមទាំងថ្នាក់ដឹកនាំ ពុទ្ធបរិស័ទ្ធ បានដង្ហែព្រះបរមសារីរិកធាតុ ទៅដាក់នូវទីសក្ការៈបូជា តាមប្រពៃណី នៃព្រះពុទ្ធសាសនា៕
