(កណ្តាល)៖ ប្រជាពលរដ្ឋដែលរស់នៅតាមបណ្តោយដងទន្លេបាសាក់ក្នុងឃុំឈើទាល ស្រុកកៀនស្វាយ បើបានឃើញ បែរត្រី ឬទូកផ្ទះបណ្តែតទឹក ដែលមកឈប់ចត នៅតាមបណ្តោយមាត់ទន្លេ សូមរាយការណ៍ទៅអាជ្ញាធរ។ នេះបើតាមសេចក្តីជូនដំណឹង របស់រដ្ឋបាលស្រុកកៀនស្វាយ ដែលបណ្តាញព័ត៌មាន Fresh News ទទួលបានៅរសៀលថ្ងៃទី១០ ខែមិថុនានេះ។

រដ្ឋបាលស្រុកកៀនស្វាយ បានបញ្ជាក់យ៉ាងដូច្នេះ៖ «សូមជូនដំណឹងដល់បងប្អូនប្រជាពលរដ្ឋ ដែលរស់នៅតាមបណ្តោយដងទន្លេបាសាក់ក្នុងឃុំឈើទាល បើសិនបងប្អូនបានឃើញ បែរត្រី ឬទូកផ្ទះបណ្តែតទឹក ដែលមក ឈប់ចត នៅតាមបណ្តោយមាត់ទន្លេ សូមបងប្អូនចូលរួមសហការណ៍ ជួយផ្តល់ព័ត៌មាន មកកាន់អាជ្ញាធរ ឬកម្លាំងប៉ុស្តិ៍ ដើម្បីឲ្យក្រុមការងារចុះសួរនាំ ទប់ស្តាត់នឹងវិធានការបន្ត»។

បន្ថែមលើសេចក្តីជូនដំណឹងរបស់ខ្លួនលោក អ៊ូ ឈាង អភិបាលស្រុកកៀនស្វាយ ក៏បានថ្លែងប្រាប់មកកាន់ភ្នាក់ងារ Fresh News ប្រចាំខេត្តកណ្ដាលនៅរសៀលថ្ងៃទី១០ ខែមិថុនា ឆ្នាំ២០២១នេះថា លោកមិនអនុញ្ញាតជាដាច់ខាត ចំពោះសកម្មភាពទាំងឡាយណា ដែលចល័តបែរចូលទឹកដីស្រុកកៀនស្វាយ ហើយប្រាប់ដល់ពលរដ្ឋស្រុកកៀនស្វាយទាំងអស់ ត្រូវរាយការណ៍មកកាន់សមត្ថកិច្ច ឬអាជ្ញាធរជាបន្ទាន់ បើសិនឃើញបទល្មើសនេះនៅក្នុងមូលដ្ឋានខ្លួន។

លោក អ៊ូ ឈាង បន្តថា «បើសិនពួកគេទាំងនោះមានបំណងមកសុំស្នាក់អាស្រ័យ គឺលោកមិនអនុញ្ញាតជាដាច់ខាត ប៉ុន្តែបើសិនជាឆ្លងកាត់គឺអាចឆ្លងបាន ហើយទៅឲ្យហួសពីដែនទឹកដីស្រុកកៀនស្វាយ»។

លោកថា លោកបានចាត់ចែងក្រុមការងារឃ្លាំមើលតាមផ្លូវទឹករួចរាល់ហើយ និងបានបញ្ជាដល់អាជ្ញាធរមានសមត្ថកិច្ចគ្រប់លំដាប់តាមមូលដ្ឋានត្រូវធ្វើកិច្ចការនេះឲ្យបានម៉ត់ចត់បំផុត។

រដ្ឋបាលស្រុកបានបង្ហាញលេខទូរសព្ទ័ទំនាក់ទំនង រួមមាន៖ ០៩៧ ៨៧៣ ៩៩៩៣ និង ០១០ ៩៨៥ ៥៥៣ (នាយប៉ុស្តិ៍)។

សូមជម្រាបថា រដ្ឋបាលរាជធានីភ្នំពេញ ក៏ដូចជារដ្ឋបាលខណ្ឌច្បារអំពៅ កាលពីថ្ងៃទី០២ ខែមិថុនា ឆ្នាំ២០២១ ក៏បានចេញប្រកាសព័ត៌មានផងដែរថា កន្លងមកមានជនឱកាសនិយមមួយចំនួន បានលបលួចធ្វើបែចិញ្ចឹមត្រី ផ្ទះបណ្តែតទឹក ផ្ទះតូចៗ និងសំណង់មិនរៀបរយនៅលើផ្ទៃទន្លេ ហើយកន្លែងខ្លះ បានប្រែក្លាយជាកន្លែងស្នាក់នៅដោយខុសច្បាប់យ៉ាងអាណាធិបតេយ្យ ដែលបង្កឲ្យបាត់បង់សណ្តាប់ធ្នាប់ ប៉ះពាល់ដល់ផ្លូវនាវាចរ ប៉ះពាល់ដល់ប្រព័ន្ធអេកូឡូហ្ស៉ី មានចរន្តទឹកហូរ គោករាក់ ពិសេសការប្រើប្រាស់ចំណីសម្រាប់ចិញ្ចឹមត្រី និងការបញ្ចេញកាកសំណល់ ការបន្ទោបង់ពាសវាល ពាសកាលក្នុងទន្លេ ធ្វើឲ្យខូចខាតយ៉ាងធ្ងន់ធ្ងរដល់ជីវៈចម្រុះក្នុងទឹក ខូចគុណភាពទឹក បំពុលបរិស្ថាន និងប៉ះពាល់ដល់សោភ័ណភាពរាជធានីភ្នំពេញ ព្រមទាំងប៉ះពាល់ដល់សុខភាព នៃប្រជាពលរដ្ឋ ដែលបានប្រើប្រាស់ទឹកមិនស្អាតផងដែរ។

ចំពោះមុខដើម្បីរក្សាបរិស្ថាន ជីវៈចម្រុះ គុណភាពទឹក និងលុបបំបាត់បាតុភាពអសកម្មខាងលើ រដ្ឋបាលរាជធានីភ្នំពេញ តម្រូវឲ្យម្ចាស់បែចិញ្ចឹមត្រី ផ្ទះបណ្តែតទឹក ម្ចាស់ផ្ទះតូចៗ និងម្ចាស់សំណង់មិនរៀបរយនៅលើផ្ទៃទន្លេទាំងអស់ ត្រូវរុះរើ ឬចល័តចេញជាបន្ទាន់ ដោយទុករយៈពេល០១សប្ដាហ៍ គិតចាប់ពីកាលបរិច្ឆេទ ចេញសេចក្តីជូនដំណឹងនេះតទៅ។

ផុតរយៈពេលនេះ រដ្ឋបាលរាជធានីភ្នំពេញ នឹងចាត់វិធានការរដ្ឋបាលដោយពុំទទួលខុសត្រូវរាល់ការខូចខាត ឬការបាត់បង់ណាមួយឡើយ ហើយក្នុងករណីរឹងរូសអាជ្ញាធរមូលដ្ឋាន និងមន្ត្រីជំនាញនឹងកសាងសំណុំរឿងបញ្ជូន ទៅតុលាការតាមផ្លូវច្បាប់។ ទន្ទឹមនឹងនេះ រដ្ឋបាលរាជធានីភ្នំពេញ ស្នើឲ្យប្រជាពលរដ្ឋប្តូរទម្លាប់ពីការចិញ្ចឹមត្រីតាមបែលើផ្ទៃទន្លេ នៅភូមិសាស្ត្ររាជធានីភ្នំពេញ មកចិញ្ចឹមត្រីតាមស្រះវិញ៕