(ភ្នំពេញ)៖ រដ្ឋបាលខណ្ឌ៧មករា សូមជូនដំណឹងដល់បងប្អូនប្រជាពលរដ្ឋទាំងអស់ដែលមាន អាសយដ្ឋានស្នាក់នៅអចិន្ត្រៃយ៍ និងបណ្តោះអាសន្នទាំងអស់នៅក្នុងមូលដ្ឋានខណ្ឌ៧មករា បានជ្រាបថា យុទ្ធនាការ

ជាតិចាក់វ៉ាក់សាំងការពារជម្ងឺកូវីដ១៩ នៅក្នុងមូលដ្ឋានខណ្ឌ៧មករា បានចាប់ផ្តើមដំណើរការចាក់វ៉ាក់សាំងប្រភេទស៊ីណូវ៉ាក់ ជូនប្រជាពលរដ្ឋអាយុ១៨ឆ្នាំឡើង ពីថ្ងៃទី២៥ ខែឧសភា រហូតដល់ថ្ងៃទី៧ ខែមិថុនា ឆ្នាំ២០២១ សម្រាប់
ដូសទី១ និងដូសទី២ ចាប់ពីថ្ងៃទី៨ ដល់ថ្ងៃទី២១ ខែមិថុនា ឆ្នាំ២០២១។

រដ្ឋបាលខណ្ឌបានបញ្ជាក់ថា រយៈពេល៦ថ្ងៃ នៃដូសទី១ ចាប់ពីថ្ងៃទី២៥ ដល់ថ្ងៃទី៣០ ខែឧសភា ឆ្នាំ២០២១នេះ មានប្រជាពលរដ្ឋក្នុងសង្កាត់ទាំង៨ នៃខណ្ឌ៧មករាចំនួន ១៧,៩០៥នាក់ បានមកទទួលវ៉ាក់សាំងដូសទី១រួចហើយ។ ដូច្នេះចំពោះបងប្អូនប្រជាពលរដ្ឋក្នុងមូលដ្ឋានខណ្ឌ៧មករាដែលមិនទាន់ បានមកទទួលការចាក់វ៉ាក់សាំងដូសទី១ សូមមេត្តាអញ្ជើញមកទំនាក់ទំនងជាមួយក្រុមការងារសម្របសម្រួលការងារ
ចាក់វ៉ាក់សាំងនៅមណ្ឌលសាលាបឋមសិក្សាសំពៅមាស និងមណ្ឌលសាលាបឋមសិក្សាបាក់ទូក។

ដើម្បីទទួលការចាក់វ៉ាក់សាំងការពារជម្ងឺកូវីដ១៩ ដោយភ្ជាប់មកជាមួយឯកសារពាក់ព័ន្ធដូចជា អត្តសញ្ញាណប័ណ្ណសញ្ជាតិខ្មែរ ឬលិខិតឆ្លងដែន ឬសៀវភៅគ្រួសារ ឬសៀវភៅស្នាក់នៅ ឬសំបុត្រកំណើត ឬលិខិតបញ្ជាក់របស់រដ្ឋបាល សង្កាត់ដែលខ្លួនកំពុងរស់នៅ ទៅតាមពេលវេលាដូចខាងក្រោម៖

*ពេលព្រឹក ចាប់ពីម៉ោង ៧,៣០នាទី ដល់ម៉ោង ១២,០០នាទី

*ពេលល្ងាច ចាប់ពីម៉ោង ១៣,៣០នាទី ដល់ម៉ោង ១៧,០០នាទី។

អាជ្ញាធរសូមឲ្យបងប្អូនដែលមិនទាន់បានទទួលការចាក់វ៉ាក់សាំងដូសទី១ មេត្តាជ្រាបជាព័ត៌មាន និងមេត្តារួសរាន់មកទទួលការចាក់វ៉ាក់សាំងការពារជម្ងឺកូវីដ១៩ ឲ្យបានគ្រប់ៗគ្នា ព្រមទាំង យកចិត្តទុកដាក់អនុវត្ត វិធានការ «៣ការពារ ៣កុំ» របស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា និងវិធានការណែនាំរបស់ក្រសួងសុខាភិបាល ដើម្បីចូលរួមទប់ ស្កាត់ការចម្លងជម្ងឺកាចសាហាវនេះ ប្រកបដោយប្រសិទ្ធិភាពខ្ពស់ និងទទួលបានលទ្ធផលល្អប្រសើរ៕