(ភ្នំពេញ)៖ សហភាពសហព័ន្ធសហជីពជាតិកម្ពុជា(CCTU) បានស្នើសុំរដ្ឋសភាជាតិមេត្តាយកសំណើមួយចំណុចរបស់ខ្លួន គឺការបង់វិភាគទាន១ភាគរយ របស់កម្មករចូលសហជីពទៅក្នងច្បាប់ស្តីពីសហជីព ដែលនឹងត្រូវអនុម័តក្នុងពេលឆាប់ៗខាងមុខនេះ ព្រោះសេចក្តីព្រាងច្បាប់ថ្មីបានកំណត់ឲ្យសហជីពរាយការណ៍ពីគណនេយ្យភាពសហជីពប្រចាំខែ ត្រីមាស ឆមាសនិងប្រចាំឆ្នាំ ដែលបង្ហាញពីតម្លាភាព ។
លោក ជួន មុំថុល ប្រធានCCTUបានថ្លែងនៅក្នុងសន្និសីទ កាសែតនាព្រឹកថ្ងៃទី១៤ខែមីនា ឆ្នាំ២០១៦នេះថា ក្នុងនាមតំណាងឲ្យសហភាពសហជីពទាំងមូលលោកសូមស្វាគមន៍ចំពោះសេចក្តីព្រាងច្បាប់ស្តីពីសហជីពដែល បានចាប់ផ្តើមពិភាក្សា ដែលរៀបចំសេចក្តីព្រាង ច្បាប់ដោយអ្នកជំនាញរបស់អង្គការអន្តរជាតិ (ILO) ក្រសួងការងារបណ្តុះបណ្តាល និងវិជ្ជាជីវៈ តាំងពី ឆ្នាំ២០០៨មក ដោយបានចូលរួមពិភាក្សាជាច្រើនលើកច្រើនសារ លើខ្លឹមសារនៃសេចក្តីព្រាងច្បាប់ ដែលមាន ទម្រង់ស្របទៅនឹងច្បាប់រដ្ឋធម្មនុញ្ញ ច្បាប់ស្តីអំពីការងារ និងអនុសញ្ញាអន្តរជាតិលេខ ៨៧ និងលេខ៩៨។
លោកជួន មុំថុល បានបន្តទៀតថា ក្នុងកិច្ចពិភាក្សាថ្មីៗនេះ នៅក្រុមការងារនៅរដ្ឋសភាភាគីទាំងអស់ បានយល់ស្របបញ្ជូលការថង់វិភាគទាន១ភាគរយ ចូលក្នងសហជីពដើម្បីទ្រទ្រង់សកម្មភាពរបស់សហជីព ប៉ុន្តែត្រូវបានភាគី ILO សុំដកចេញ។
លោកនៅតែទទូចសុំឲ្យរដ្ឋសភាជាតិមេត្តាពិនិត្យចំណុចនេះឡើងវិញ ហើយអនុម័តចូលក្នុងច្បាប់សហជីព ដើម្បីអនុវត្តទាំងអស់គ្នា ។
ទាក់ទិននឹងបញ្ហានេះដែរលោកជួន មុំថល បានអះអាងថា ក្រោយពីច្បាប់ស្តីពីសហជីពបាន យកមកអនុវត្តហើយនោះ នឹងមានអ្នកវិនិយោគថ្មីៗ មកបណ្តាក់ទុនរកស៊ីបន្ថែមទៀតដោយសារតែច្បាប់ថ្មីបានការពារផលប្រយោជន៍ដល់ភាគីទាំងអស់។
លោកសូមស្នើឲ្យ ក្រសួងការងារនិង អង្គការ អន្តរជាតិ (ILO) រួមជាមួយស្ថាប័នពាក់ព័ន្ធទាំងអស់បង្កើត យន្តការនានាលើការផ្សព្វផ្សាយច្បាប់នេះឲ្យបានទូលាយ ដល់ក្រុមអង្គភាពវិជ្ជាជីវៈគ្រប់ស្រទាប់កម្មករនិយោជិត ដើម្បីធានាការ អនុវត្តមានប្រសិទ្ធភាព និងតម្លាភាពស្របតាមការវិវឌ្ឍន៍រីកចម្រើនក្នុងវិស័យការងារនាពេលបច្ចុប្បន្ន និងទៅអនាគត៕
