(តូក្យូ)៖ ក្រសួងសុខាភិបាល, កម្មករ និងសុខុមាលភាពជប៉ុន នៅថ្ងៃសុក្រម្សិលមិញ បានអះអាងថា មានករណីអ្នកជំងឺម្នាក់ទៀត ដែលបានឆ្លងមេរោគ ជាមួយនឹងវីរ៉ុស Zika បន្ទាប់ពីវិលត្រឡប់​មកកាន់ជប៉ុន ក្រោយបញ្ចប់ដំណើរកម្សាន្ត នៅក្នុងប្រទេសប្រេស៊ីល នេះបើតាមសារព័ត៌មានស៊ិនហួ ចេញផ្សាយនៅយប់ថ្ងៃទី១០ ខែមីនា ឆ្នាំ២០១៦នេះ។

ក្រសួងបន្តថា ករណីនេះបានកើតឡើងលើស្រ្តីមា្នក់ មានអាយុជាង៣០ឆ្នាំ ដែលត្រូវបានគេ​ជឿជាក់ថា បានឆ្លងមេរោគ ដែលកើតឡើងចេញ​ពីសត្វមូសនេះ ក្នុងអំឡុងពេលដំណើរ​កម្សាន្ត​រយៈពេល២​សប្តាហ៍ ទៅកាន់ប្រទេស​ប្រេស៊ីល ហើយបានបញ្ចប់​ដំណើរកម្សាន្ត កាលពីខែមុន។

ស្រ្តីនេះជាប្រជាជនរស់នៅក្នុងខេត្ត Aichi ភាគកណ្តាល ប្រទេសជប៉ុន មានសញ្ជាតិបរទេស ហើយបានបញ្ជាក់ថា ករណីនេះត្រូវបានអះអាងឡើង បន្ទាប់ពីនាងឲ្យដឹងថា មានបញ្ហាផ្តាសាយ និងជំងឺសន្លាក់ឆ្អឹង នេះបើតាមការឲ្យដឹង​ពីក្រសួសុខាភិបាល ប៉ុន្តែមិនបានឲ្យដឹងថា នាងមានសញ្ញាតិអ្វី ឬក៏នាងជាស្រ្តីមានផ្ទៃពោះឬអត់នោះទេ។

សូមជម្រាបថា ករណីថ្មីនេះ​បានកើតឡើង បន្ទាប់ពីកាលពីខែមុន ក្រសួងសុខាភិបាលបានបញ្ជាក់ថា ក្មេងប្រុសវ័យជំទង់ម្នាក់ រស់នៅក្នុង​ខេត្ត Kawasaki ជិតទីក្រុង Tokyo បានឆ្លង​មេរោគជា​មួយនឹង​វីរ៉ុស Zika បន្ទាប់ពីធ្វើដំណើរ​កម្សាន្តទៅកាន់​ប្រទេស​ប្រេស៊ីល៕