(កណ្ដាល)៖ លំនៅដ្ឋានថ្មី និងស្អាត ចំនួន១៧១ខ្នងសាងសង់ឡើងតាមលក្ខណៈស្តង់ដារបច្ចេកទេស ប្រកបដោយផាសុខភាព ជាអំណោយដ៏ថ្លៃថ្លារបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តាមរយៈអ្នកឧកញ៉ា ពុង ឃាវសែ ប្រធានក្រុមប្រឹក្សាភិបាលនៃក្រុមហ៊ុន Cambodia Airport Investment បានប្រគល់ជូនពលរដ្ឋចំនួន១៧១គ្រួសារហើយ ក្រោមការអបអរសាទរយ៉ាងក្លៀវក្លាពីសំណាក់បងប្អូនប្រជាពលរដ្ឋ ។
ពិធីប្រគល់ផ្ទះជូនពលរដ្ឋទាំង១៧១គ្រួសារនេះ ប្រព្រឹត្តិទៅនៅថ្ងៃសុក្រ ទី២១ ខែឧសភា ឆ្នាំ២០២១នេះ ក្រោមអធិបតីលោក បេងហុង សុជាតិខេមរ៉ូ អគ្គនាយក នៃអគ្គនាយកដ្ឋានលំនៅឋាន តំណាងដ៏ខ្ពង់ខ្ពស់លោក ជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី និងនគរូបនីយកម្ម ព្រមទាំងលោកបណ្ឌិត ម៉ៅ ភិរុណ ប្រធានក្រុមប្រឹក្សាខេត្ត និងលោកគង់ សោភ័ណ្ឌ អភិបាលខេត្តកណ្ដាល និងមន្ត្រីជាច្រើននាក់ផ្សេងទៀតផងដែរ ។
លោក បេងហុង សុជាតិខេមរ៉ូ អគ្គនាយក នៃអគ្គនាយកដ្ឋានលំនៅឋាន បានលើកឡើងថា នេះជាការយកចិត្តទុកដាក់ដ៍ខ្ពង់ខ្ពស់របស់សម្ដេចតេជោ ដែលតែងតែគិតគូររាល់ទុក្ខលំបាករបស់ពលរដ្ឋ ។ ពិសេសគឺការសាងសង់លំនៅដ្ឋានជូនពលរដ្ឋទាំង១៧១គ្រួសារនេះ ក៍ជាការឆ្លើយតបនឹងការដោះដូរពីផលប៉ះពាល់របស់ពួកគាត់ ។
ស្ថិតក្នុងឱកាសនេះដែរ លោកគង់ សោភ័ណ្ឌ អភិបាលខេត្តកណ្ដាលបានលើកឡើងថា នេះជាកាដូដ៏តម្លៃមហិមា ដែលមិនអាចកាត់ថ្លៃបាន ដែលប្រមុខរាជរដ្ឋាភិបាលកម្ពុជា បានសម្រេចជ្រើសរើសភូមិសាស្រ្តខេត្តកណ្តាល និងមួយផ្នែកទៀត នៃខេត្តតាកែវ ដើម្បីធ្វើជាទីតាំងសម្រាប់ដំណើការសាងសង់អាកាសយានដ្ឋានអន្តរជាតិថ្មីលំដាប់4F នៅលើផ្ទៃដីទំហំសរុប ២៦០០ហិកតា ដែលក្នុងនោះស្ថិតក្នុងភូមិសាស្រ្តខេត្តកណ្តាល មានទំហំ ២ ២១២.៣ហិកតា ឆ្លងកាត់ស្រុកចំនួនពីរ គឺស្រុកកណ្តាលស្ទឹង និងស្រុកស្អាង។
គួរជម្រាបថា លំនៅដ្ឋានអចិន្ត្រៃយ៍ជូនគ្រួសារប្រជាពលរដ្ឋចំនួន១៧១គ្រួសារ ដែលរស់នៅក្នុងសំណង់បណ្តោះអាសន្នលើខ្នងទំនប់ ៥៤, ៩២ និង៩៤ ស្ថិតក្នុងទីតាំងគម្រោងសាងសង់អាកាសយានដ្ឋានអន្តរជាតិភ្នំពេញថ្មី ស្ថិតនៅភូមិសាលាតាព្រហ្ម ឃុំបឹងខ្យាង ស្រុកកណ្តាលស្ទឹង។
លំនៅដ្ឋានអចិន្ត្រៃយ៍នេះមានទំហំ ៥ម៉ែត្រ x ៨ម៉ែត្រ ដែលសាងសង់តាមប្លង់ស្ថាបបត្យកម្មដោយរក្សាគម្លាតផ្នែកខាងមុខ ៥,៥ម៉ែត្រ និងគម្លាតខាងក្រោយ ៦,៥ម៉ែត្រ ដើម្បីឱ្យគ្រួសារប្រជាពលរដ្ឋអាចសាងសង់សំណង់បន្ថែមនៅលើទីតាំងដីឡូតិ៍ផ្នែកក្រោយក្នុងទំហំអតិប្បរមា ៣,៥ម៉ែត្រ x ៤,៥ម៉ែត្រដែលមានគម្លាតពីរបងដីខាងក្រោយ១ម៉ែត្រ ការសាងសង់លំនៅឋាននេះ គឺមានការចុះតាមដានត្រួតពិនិត្យជាប្រចាំពីក្រុមការងារបច្ចេកទេស នៃអគ្គនាយកដ្ឋានបច្ចេកទេសលំនៅឋាន ដើម្បីធានានូវគុណភាព និងសុវត្ថិភាពផងដែរ។
សូមជម្រាបជូនថាកាលពីខែមករា ឆ្នាំ២០១៨ កន្លងទៅ ប្រមុខរាជរដ្ឋាភិបាលកម្ពុជា បានអនុញ្ញាតឱ្យមានការសាងសង់អាកាសយានដ្ឋានអន្តរជាតិថ្មី ដើម្បីជំនួសអាកាសយានដ្ឋានអន្តរជាតិភ្នំពេញពោធិ៍ចិនតុង ដែលមានផ្ទៃក្រឡាត្រឹមតែ ៤០០ហិកតា ដែលទទួលអ្នកដំណើរបានត្រឹមប្រមាណ៥លាននាក់ តែប៉ុន្នោះ។
អាកាសយានដ្ឋានអន្តរជាតិថ្មីនេះ នឹងមានសមត្ថភាពទទួលអ្នកដំណើរបានរហូតដល់ ៤៥លាននាក់ នៅពេលបញ្ចប់ការសាងសង់ទាំងស្រុងនៅក្នុងឆ្នាំ២០៥០ ៕
