(ភ្នំពេញ)៖ ក្នុងសន្និសីទអន្តរជាតិលើកទី២៦ ស្តីពី «អនាគតរបស់អាស៊ី» ដែលរៀបចំឡើងដោយក្រុមហ៊ុននីកេ (Nikkei) របស់ជប៉ុនតាមរយៈប្រព័ន្ធវីដេអូ នៅថ្ងៃទី២០ ខែឧសភា ឆ្នាំ២០២១នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានគូសបញ្ជាក់ជាថ្មីថា កម្ពុជាមិនទាមទារនូវភាពអនុគ្រោះពន្ធប្រមាណ ២០ភាគរយ ពីសហភាពអឺរ៉ុបនោះឡើយ។

ឆ្លើយតបសំណួរអ្នកសម្របសម្រួលកម្មវិធីពីផលប៉ះពាល់ដោយការដកភាពអនុគ្រោះពន្ធ២០ភាគរយនេះ សម្តេចតេជោ ហ៊ុន សែន បានថ្លែងថា បើគ្មានការរាតត្បាតជំងឺកូវីដ១៩ ការដកភាពអនុគ្រោះពន្ធធ្វើឱ្យប៉ះពាល់បន្តិចបន្តួចដល់សេដ្ឋកិច្ចកម្ពុជា។ ក៏ប៉ុន្តែក្រោយពេលមានវិបត្តិជំងឺកូវីដ១៩ ភាពអនុគ្រោះពន្ធ ២០ភាគរយ ដែលសហភាពអឺរ៉ុប បានដកនេះ អនុភាពអ្វីលើសេដ្ឋកិច្ចកម្ពុជានោះឡើយ។

ក្នុងសន្និសីទអន្តរជាតិ ដែលមានការចូលរួមពីបណ្តាមេដឹកនាំ និងអង្គការពាក់ព័ន្ធនៅក្នុងតំបន់អាស៊ីនេះ សម្តេចតេជោ ហ៊ុន សែន បានចាត់ទុកការសម្រេចរបស់សហភាពអឺរ៉ុប គឺជារឿងដ៏អយុត្តិធម៌ ហើយមិនឆ្លុះបញ្ចាំងពីតថភាពពិតនៅក្នុងប្រទេសកម្ពុជានោះឡើយ។

សម្តេចតេជោ បានគូសបញ្ជាក់ថា «ខ្ញុំមិនជំទាស់ ហើយក៏មិនទាមទារត្រឡប់មកវិញនូវភាពអនុគ្រោះ ២០ភាគរយនោះទេ។ កម្ពុជា បានត្រៀមខ្លួនរួចរាល់សម្រាប់ការមិនវិលត្រឡប់មកវិញនូវភាពអនុគ្រោះពីសហភាពអឺរ៉ុប ដោយមិនធ្វើការចរចា មិនប្រឆាំងតវ៉ា ឬជំទាស់ការអនុវត្តសេចក្តីសម្រេចរបស់ពួកគេទេ»។

សម្តេចតេជោ បន្ថែមថា «យើង បន្តនាំចេញទំនិញ២០ភាគរយទៅកាន់សហភាពអឺរ៉ុប ដោយធ្វើការបង់ពន្ធជាធម្មតា។ យើងមានការលំបាក ក៏ប៉ុន្តែយើងមិនអាចទទួលយកបាន នូវការដែលប្រទេសមួយមិនអាចអនុវត្តច្បាប់របស់ខ្លួនឯងបាន។ តើយើងជារដ្ឋទេ រដ្ឋឯករាជ្យ និងអធិបតេយ្យ គឺជារដ្ឋដែលត្រូវអនុវត្តច្បាប់ដោយខ្លួនឯងបាន។ បើយើងមិនអាចអនុវត្តច្បាប់ដោយខ្លួនឯងបាន យើងគួរតែរំលាយរដ្ឋនឹងចោល ហើយដាក់ចំណុះប្រទេសដទៃទៅ»។

ឆ្លៀតក្នុងឱកាសនេះសម្តេចតេជោ ហ៊ុន សែន បានថ្លែងបញ្ជាក់ថា កម្ពុជានៅតែបន្តរក្សានូវរបបនយោបាយរបស់ខ្លួន គឺរបបប្រជាធិបតេយ្យ សេរី ពហុបក្ស ហើយការបោះឆ្នោតនៅឆ្នាំ២០២២ និង២០២៣ ខាងមុខ នឹងមានគណបក្សនយោបាយជាច្រើនចូលរួម។

សម្តេចតេជោ ក៏បានឆ្លៀតផ្តាំទៅកាន់សហភាពអឺរ៉ុបដែរថា ក្នុងបរិការណ៍នៃការរាតត្បាតដោយជំងឺកូវីដ១៩នេះ ប្រទេសទាំងអស់ត្រូវរួមគ្នាដោះស្រាយបញ្ហា ជាជាងការប្រកាន់ឥរិយាបថគាំពារនិយម ហើយយកបញ្ហានេះទៅកៀបសង្កត់ប្រទេសដទៃ៕