(​ប៉េកាំង​)៖ ក្រុមហ៊ុន Fast Food ដ៏​ធំ​របស់​សហរដ្ឋអាមេរិក​គឺ KFC បាន​បើក​ដំណើរការ​លក់​ជា​លើកដំបូង នៅក្នុង​ទីក្រុង Lhasa តំបន់​ទី​បេ បន្ទាប់​ពី​រង់ចាំ​អស់​រយៈពេល​ជាង​១​ទសវត្ស​ន៍ នៃ​ការគ្រោង​បើក​ដំណើរការ​លើកដំបូង ត្រូវ​បាន​លុបចោល​វិញ ដោយសារ​ភាពចម្រូងចម្រាស់ នេះ​បើ​យោងតាម​ការចេញផ្សាយរ​បស់​សារព័ត៌មាន Channel News Asia នៅ​ថ្ងៃ​ទី​១១ ខែ​មីនា​។​

​ការបើក​ហាង​នេះ​ផងដែរ បាន​ធ្វើឲ្យ​ព្រះសង្ឃ​ព្រះអង្គ Dalai Lama ជា​មេដឹកនាំ​ព្រះពុទ្ធសាសនា និង​ម្ចាស់​ពានរង្វាន់ Nobel នៅ​តំបន់​ទី​បេ មិន​សប្បាយចិត្ត ព្រោះតែ​ការ​សម្លាប់សត្វ​មាន់ បាន​រំលោភ​បំពានទៅ​នឹង​បំរាម​ក្នុង​តំបន់ ប៉ុន្តែ​សម្រាប់​ក្រុម​អ្នកជំនួញ​វិញ​មិន​យល់​ឃើញ​ដូច្នេះ​ទេ ព្រោះ KFC ជា​ក្រុមហ៊ុន Fast Food ដ៏​ល្បី ហើយ​ការ​បើកហាង​នៅ​ទី​បេ គឺជា​ការបើកទ្វា​រស្វាគមន៍​ពិភពលោក​។​

​ក្រុមហ៊ុន KFC បាន​ចូល​ទៅ​កាន់​ទីផ្សា​រចិន​ក្នុង​ឆ្នាំ​១៩៨៧ ហើយ​បច្ចុប្បន្ន​មាន​ហាង​ជាង ៥,០០០​ហាង ក្នុង​តំបន់​ជាង​១,១០០​តំបន់ នៅ​ទូទាំង​ប្រទេស​។​

​គួរ​បញ្ជាក់​ផង​ដែរ​ថា ចិន​បាន​គ្រប់គ្រង​តំបន់​ទី​បេ តាំងពី​អំឡុង​ឆ្នាំ​១៩៥០ ខណៈ​ក្រុម​អង្កេត​សិទ្ធិមនុស្ស បាន​ចោទប្រកាន់​ថា បាន​គាបសង្កត់​នូវ​គោលនយោបាយ និង​សាសនា​នៅក្នុង​តំបន់ ខណៈ​រដ្ឋាភិបាល​ទីក្រុង​ប៉េកាំង បានបញ្ជាក់​ថា ប្រជាជន​តំបន់​ទី​បេ​ទទួលបាន​សេរីភាព​ពេញលេញ ហើយ​ថា​ខ្លួន​បាន​នាំឲ្យ មាន​កំណើន​សេដ្ឋកិច្ច​នៅក្នុង​តំបន់ ព្រមទាំង​បាន​ចោទប្រកាន់ ព្រះអង្គ Dalai Lama ជា​អ្នក​បំបែក​ខ្លួន​និយម​៕