(ភ្នំពេញ)៖ មន្រ្តីសមត្ថកិច្ចជាន់ខ្ពស់ បានឱ្យដឹងថា ការហៅកញ្ញា ខុម ចាន់ដារ៉ាទី ហៅ«ស្រីមុំ» ដើម្បីចូលបំភ្លឺនៅ នាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន នៃអគ្គស្នងការដ្ឋាននគរបាលជាតិ នៅម៉ោង៩៖០០ព្រឹកថ្ងៃទី១១ ខែមីនា ស្អែកនេះ គឺមានការពាក់ព័ន្ធជាមួយ បណ្តឹងរបស់កញ្ញា ធី សុវណ្ណថា អតីតសកម្មជនគណបក្សសង្រ្គោះជាតិ។

កាលពីល្ងាចថ្ងៃទី០១ ខែមីនា ឆ្នាំ២០១៦ កញ្ញា ធី សុវណ្ណថា បានដាក់ពាក្យបណ្ដឹងទៅសាលាដំបូងរាជធានីភ្នំពេញ ប្តឹងចំពោះសារសំឡេងបរិហាកេរ្តិ៍នាង ចេញពីខ្សែអាត់សំឡេងមួយ​ដែលគេចោទ​ថាជាសម្លេងលោក កឹម សុខា និងស្រ្តីវ័យក្មេងម្នាក់ឈ្មោះ «ស្រីមុំ» ដែលបែកធ្លាយនៅលើបណ្តាញសង្គម Facebook និងសារព័ត៌មាន។ នៅក្នុងបណ្តឹងនោះ ធី សុវណ្ណថា បានអះអាងថា អ្នកទាំងពីរ​នោះ​បានមួលបង្កាច់ និងជាការបំផ្លើសការពិត ដែលបានធ្វើឲ្យប៉ះពាល់ ដល់កិត្តិយស និងសេចក្តីថ្លៃថ្នូរបស់នាង។

លោក នី សុខា ប្រធានផ្នែកស៊ើបអង្កេតនៃសមាគមអាដហុក បានប្រាប់ Fresh News ឱ្យដឹងថា ការចូលបំភ្លឺ របស់កញ្ញា ខុម ចាន់ដារ៉ាទី ហៅ«ស្រីមុំ» នៅថ្ងៃស្អែកនោះ នឹងមានមេធាវីរបស់សមាគម​អាដហុក​ទៅជាមួយផងដែរ។ លោកថា មេធាវីម្នាក់នោះគឺលោកស្រី ទ្រី ឈូន ដែលទៅចូលរួមស្តាប់ក្នុងការសាកសួរដោយសមត្ថកិច្ច។

លោកថា «យើងអត់អាចជួយអ្វីបានទេ ព្រោះនីតិវិធីនៅកន្លែងប៉ូលិស យើងគ្រាន់តែធ្វើយ៉ាងម៉េចឱ្យគាត់(មេធាវី) បានទៅចូលរួមស្តាប់ការសាកសួរ ជាធម្មតាទេអ្នកដែលមាន​បញ្ហាអីចឹងគាត់មានសិទ្ធិ​​ក្នុងការមានមេធាវី​ដើម្បី​ចូលរួមស្តាប់ការសាកសួរ»

មន្រ្តីសង្គមស៊ីវិលរូបនេះ បានអះអាងថា ចំពោះរឿងនេះ អាដហុកមិនបានចូលរួមក្នុងការជំរុញឱ្យ កញ្ញា ខុម ចាន់ដារ៉ាទី ចេញមុខបកស្រាយនោះទេ ហើយថានាងបានមករកអាដហុកដោយខ្លួនឯង ដើម្បីស្វែងរកយុត្តិធម៌។ លោកថា «ចំពោះរឿងនេះ អាដហុកមិនបានធ្វើការណែនាំគាត់ ឬក៏បញ្ចេះគាត់ឱ្យមកដាក់ពាក្យបណ្តឹង គឺថាគាត់បានមករកសមាគមយើងដោយខ្លួនឯង ហើយគាត់បានយក​បណ្តឹងនោះមកខ្លួនឯង»

សូមបញ្ជាក់ថា កាលពីល្ងាចម្សិលមិញ យុវតីម្នាក់ឈ្មោះ ខុម ចាន់ដារ៉ាទី ដែលអះអាងថាខ្លួនមានឈ្មោះ «ស្រីមុំ» ហើយជាម្ចាស់ Facebook ឈ្មោះ «Mon Srey» បានចូលខ្លួនស្វែងរកអន្តរាគមន៍​ពីសមាគមអាដហុក ដើម្បីឱ្យជួយរកយុត្តិធម៌ដល់រូបនាង។ កញ្ញា ខុម ចាន់ដារ៉ាទី បានផ្តល់បទសម្ភាសដល់វិទ្យុអាស៊ីសេរី និងវិទ្យុសំឡេងសហរដ្ឋអាមេរិកថា សំឡេងនៅក្នុងខ្សែអាត់ដែលផ្សាយថា រឿងអាស្រូវផ្លូវភេទនោះ មិនមែនជាសម្លេងរបស់នាងទេ។

នាងនិយាយថា នាងធ្លាប់ស្គាល់ លោក កឹម សុខា ពេលទៅទទួលសេវាកាត់សក់ កក់សក់នៅហាងដែលនាងបម្រើការ នៅភ្នំពេញ និងធ្លាប់បាននិយាយទូរស័ព្ទតិចតួចជាមួយគ្នា ប៉ុន្តែនាងថា នាងមិនដែល​មានទំនាក់ទំនង ស្នេហាជាមួយ លោក កឹម សុខា នោះទេ៕