(ភ្នំពេញ)៖ រថយន្ត Camry បាឡែនមួយគ្រឿង បើកបរដោយបុរសស្រវឹងស្រាម្នាក់ ទើបនឹងចេញពីហាង ផឹកស៊ីយីហោ «ទីក្រុងខ្មែរ» បើកត្រឡប់ទៅផ្ទះវិញ ខណៈពេលដែលកំពុងតែបើក តាមបណ្តោយផ្លូវសហព័ន្ធរុស្ស៊ី ខាងកើតព្រលានយន្តហោះអន្តរជាតិភ្នំពេញ ក៏បានរ៉េចង្កូតទៅបុករនាំងដែកចែកទ្រូងផ្លូវ បាក់អស់៥ផ្ទាំងរាបដល់ដីតែម្តង ។
ហេតុការណ៍នេះ កាលពីវេលាម៉ោង ២៖៣០នាទីរំលងអាធ្រាត ឈានចូលថ្ងៃទី ១០ ខែមីនា ឆ្នាំ២០១៦ នៅតាមបណ្តោយផ្លូវសហព័ន្ធរុស្ស៊ី ខាងកើតព្រលានយន្តហោះពោធិ៍ចិនតុង ស្ថិតក្នុងភូមិក្បាលដំរី សង្កាត់កាកាប ខណ្ឌពោធិ៍សែនជ័យ ។
ប្រភពពីកន្លែងកើតហេតុបានប្រាប់ថា នៅម៉ោងខាងលើគេបានឃើញរថយន្ត Camry បាឡែនពណ៌ទឹកប្រាក់ ស្លាកលេខសៀមរាប 2A-1678 បើកដោយបុរសម្នាក់ ទិសដៅពីកើតទៅលិច ដែលស្ថិតក្នុងស្ថានភាពស្រវឹង លុះបើកមកដល់ចំណុចកើតហេតុ ក៏បានរេចង្កូតទៅបុករនាំង ដែលដែលដាក់ខណ្ឌចែកទ្រូងផ្លូវ បណ្តាលឲ្យបាក់អស់៥ផ្ទាំង បន្ទាប់ពីបុកហើយអ្នកបើកបរស្រវឹងរូបនោះ មិនបានឈប់ទេ គឺព្យាយាមបើករថយន្តរត់ ទៅដល់រង្វង់មូលចោមចៅ ទើបត្រូវបានកម្លាំងសមត្ថកិច្ច របស់ខណ្ឌពោធិ៍សែនជ័យ ដែលយាមនៅគោលដៅនោះឃាត់បាន ។
បន្ទាប់ពីឃាត់បាន អ្នកបើកបររួមជាមួយរថយន្ត ត្រូវបានបញ្ជួនទៅកាន់ការិយាល័យចរាចរណ៍ផ្លូវគោក នៃស្នងការដ្ឋាននគរបាលក្រុងភ្នំពេញ ដើម្បីដោះស្រាយសងសំណងនៃ គ្រោះថ្នាក់ដែលបណ្តាលឲ្យខូចទ្រព្យសម្បត្តិ របស់រដ្ឋនេះ៕
