(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា បានអំពាវនាវដល់ក្រសួងស្ថាប័នពាក់ព័ន្ធ រួមនិងអង្គការសង្គមស៊ីវិល ជាដៃគូផងដែរឲ្យរួមគ្នាលើកកម្ពស់សិទ្ធិស្រ្តីកម្ពុជា និងបានដាក់ចេញនូវផែនការចំនួន ៧ចំណុច ឲ្យក្រសួងស្ថាប័ន និង អង្គការសង្គម ស៊ីវិលជាដៃគូអនុវត្តន៍ ដើម្បីជួយឲ្យស្ថានភាព​រស់នៅរបស់ស្រ្តីកម្ពុជា បានកាន់តែល្អប្រសើរ។

ការថ្លែងអំពាវនាវរបស់សម្តេចតេជោ បានធ្វើឡើងក្នុងឱកាស ដែលសម្តេចអញ្ជើញជាអធិបតី​ក្នុងពិធីអបអរសាទរ​ទិវានារីអន្តរជាតិ ៨ មីនា ខួបលើកទី១០៥ នៅវិមានសន្តិភាពនាព្រឹកមិញនេះ។ សម្តេចនាយករដ្ឋមន្រ្តីកម្ពុជា បានរំពឹងថា ក្រសួងស្ថាប័នពាក់ព័ន្ធ ជាពិសេសក្រសួងកិច្ចការនារី នឹងប្រឹងប្រែងរួមគ្នាធ្វើការលើកកម្ពស់សិទ្ធិ និងការងាររបស់ស្ត្រីកម្ពុជា ឲ្យមានប្រសិទ្ធភាព។

ផែនការ ៧ចំណុច ដែលសម្តេចតេជោ បានដាក់ចេញ ដើម្បីជាប្រយោជន៍សម្រាប់ស្រ្តីកម្ពុជានេះ រួមមាន៖
១. ក្រសួងស្ថាប័នពាក់ព័ន្ធត្រូវបញ្ចូលសកម្មភាព ដែលបានឯកភាពគ្នាក្នុងផែនការនារីរតនៈទី៤ និង ផែនការជាតិស្តីពីការទប់ស្កាត់អំពើហិង្សាលើស្រ្តី ទៅក្នុងផែនការយុទ្ធសាស្រ្តរបស់ខ្លួន ហើយត្រូវបែងចែកថវិកា​សម្រាប់អនុវត្តន៍ និង ពិនិត្យតាមដានការងារនេះ ឲ្យមានប្រសិទ្ធភាព។
២. នៅពេលរៀបចំផែនការយុទ្ធសាស្រ្តថវិកា និង ផែនការប្រចាំឆ្នាំក្រសួងសេដ្ឋកិច្ច និងហិរញ្ញវត្ថុ ត្រូវណែនាំដល់គ្រប់ក្រសួងស្ថាប័នទាំងអស់ ឲ្យបញ្ជាក់ពីលទ្ធផលក្នុងឆ្នាំ និងលទ្ធផលចុង​ក្រោយនីមួយៗ​អំពីអត្ថប្រយោជន៍ ដែលស្រ្តី និងក្រុមជនងាយរងគ្រោះបានទទួល។
៣. អង្គការសង្គមស៊ីវិល និងដៃគូអភិវឌ្ឍន៍ សូមបន្តរៀបចំផែនការសកម្មភាពរបស់ខ្លួនឲ្យស្របទៅនិងផែនការយុទ្ធសាស្រ្តអភិវឌ្ឍន៍ជាតិ ផែនការនារីរតនៈទី៤ និងផែនការសកម្មភាព​ជាតិស្តីពីការទប់​ស្កាត់​អំពើហិង្សាលើស្រ្តី ជាពិសេសអភិក្រមគ្រប់គ្រងទូទាំងកម្មវិធីសម្រាប់សមភាពយេនឌ័រ ដែលដាក់ចេញដោយរាជរដ្ឋាភិបាល ដើម្បីទទួលបានប្រសិទ្ធភាពរួមគ្នា។
៤. គណនយោបាយគួរដាក់បេក្ខភាពស្រ្តីនៅលំដាប់លេខរៀង ដែលអាចជាប់ក្នុងការបោះឆ្នោត ជាពិសេសការបោះឆ្នោតជ្រើសរើសក្រុមប្រឹក្សាឃុំ សង្កាត់ និងការបោះឆ្នោត​ជ្រើសរើសតំណាង​រាស្រ្​តនៅពេលខាងមុខ។
៥. ក្រសួងស្ថាប័ន ពាក់ព័ន្ធត្រូវបន្តអប់រំ បណ្តុះបណ្តាល និងកសាងសមត្ថភាពធនធានស្រ្តី ដែលត្រូវបន្តពង្រឹងគុណភាព នៃការអប់រំ ពិសេសការអប់រំស្រ្តីវ័យក្មេង និងក្មេងស្រី ដើម្បីធ្វើឲ្យ​ប្រសើរឡើងនូវភាពអង់អាចក្លាហានផ្នែកសេដ្ឋកិច្ចរបស់ស្រ្តី ឲ្យកាន់តែប្រសើរឡើង និងពង្រឹងសម្ព័ន្ធភាពរវាងមាតា បិតា និងគ្រឹះស្ថានសិក្សា ឲ្យកាន់តែមានប្រសិទ្ធភាព។
៦. យុវជន យុវនារី ត្រូវខិតខំរៀនសូត្រប្រកាន់ខ្ជាប់នូវសិលធម៌  និងត្រូវប្រែក្លាយចំណេះដឹង ជំនាញ និងបទពិសោធន៍ទាំងឡាយឲ្យផលិតភាពខ្ពស់ ទទួលបាននូវការងារមានតម្លៃបន្ថែម ដែលអាចប្រ​កួត​ប្រជែងជាមួយទីផ្សារនៅក្នុងតំបន់ស្របទៅនឹងបរិការ និងបច្ចុប្បន្នភាព នៃសមាហរណកម្មសេដ្ឋកិច្ចអាស៊ាន ដើម្បីជាប្រយោជន៍សម្រាប់ខ្លួនឯង គ្រួសារ សហគមន៍ និងសង្គមជាតិ។
៧. វិស័យឯកជនសូមបន្តចូលរួមចំណែកជួយលើកកម្ពស់សមភាពយេនឌ័រ និងមានភាពបត់បែនឲ្យមានតុល្យភាពរវាងការងារ និងគ្រួ សារ ព្រមទាំងសហការជា​មួយស្ថាប័នចាត់វិធាន​ការក្នុងការ​បង្កបរិយាកាស​ការងារ និងបង្កើតលក្ខខណ្ឌការងារសមរម្យសម្រាប់ស្រ្តី៕

https://www.facebook.com/profile.php?id=100006751770755