(ភ្នំពេញ)៖ ឆ្នាំ២០១៥កន្លងទៅ ចំណូលថវិកាជាតិ ដែលប្រមូលដោយគយ មានចំនួន ១,៥៨១លានដុល្លារអាមេរិក កើន ១៧,៤ ភាគរយ បើធៀបទៅនឹងឆ្នាំ២០១៤ ខណៈពីរខែដើមឆ្នាំ២០១៦ ប្រមូលចំណូលបាន ២៩៣លានដុល្លារ កើនជាង ២៥ភាគរយ បើ ធៀបរយៈពេលដូចគ្នាទៅនិងឆ្នាំ២០១៥។ នេះបើយោងតាមរបាយការណ៍ ដែលបានបង្ហាញក្នុងកិច្ចប្រជុំបូកសរុបការងារគយ និងរដ្ឋា ករប្រចាំឆ្នាំ២០១៥ ដែលដឹកនាំដោយរដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ លោកបណ្ឌិត អូន ព័ន្ធមុនីរ័ត្ន នាព្រឹកថ្ងៃទី០៧ ខែមីនា ឆ្នាំ២០១៦នេះ។
អគ្គនាយក នៃអគ្គដ្ឋានគយ និងរដ្ឋាករកម្ពុជា លោក គុណ ញឹម បានបញ្ជាក់នៅក្នុងកិច្ចប្រជុំនោះថា ចំណូល ដែលប្រមូលបាន បើ ប្រៀបធៀបនឹងផែនការឆ្នាំ២០១៥ គឺមានកម្រិតប្រមាណ ១២១,២៨ភាគរយ នៃផែនការ។ ក្នុងកិច្ចប្រជុំនេះ លោក គុណ ញឹម ក៏ បានលើកឡើងផងដែរ នូវសមិទ្ធផល ដែលសម្រេចបាន ដូចជា ការងារគោលនយោបាយ បច្ចេកទេស កិច្ចសម្រួលពាណិជ្ជកម្ម និង ការងារពាក់ព័ន្ធគយផ្សេងទៀត។
លោកបណ្ឌិត អូន ព័ន្ធមុនីរ័ត្ន បានវាយតម្លៃខ្ពស់ចំពោះកិច្ចខិតខំប្រឹងប្រែងប្រកបដោយស្មារតីទទួលខុសត្រូវ និងការលះបង់របស់មន្រ្តី គយ និងរដ្ឋាករគ្រប់រូប។ លោករដ្ឋមន្រ្តី ក៏បានទទួលស្គាល់នូវបញ្ហាប្រឈមនានា ដែលជាកត្តាប៉ះពាល់ដល់ប្រតិបត្តិការប្រមូល ចំណូល និងបានលើកទឹកចិត្តឲ្យមន្រ្តីគយ និងរដ្ឋាករត្រូវខិតខំបន្ថែមទៀត សម្រាប់ការងារនាពេលខាងមុខ។
ក្នុងកិច្ចប្រជុំនេះ លោករដ្ឋមន្រ្តី អូន ព័ន្ធមុនីរ័ត្ន បានដាក់ចេញទិសដៅចំនួន ៨ចំណុច ដើម្បីជំរុញឲ្យការប្រមូលចំណូលចូលជាតិរបស់ អគ្គដ្ឋានគយ និងរដ្ឋាករកម្ពុជា កាន់តែទទួលបានលទ្ធផលល្អប្រសើរថែមទៀតក្នុងឆ្នាំ២០១៦។ ទិសដៅទាំង ៨ចំណុចនោះរួមមាន៖
១. បន្តលើកកម្ពស់អភិបាលកិច្ចក្នុងអង្គភាពគយ តាមក្រមសីលធម៌វិជ្ជាជីវៈ និងត្រូវប្រកាន់ខ្ជាប់អភិក្រមការងារទាំងបួនប្រការរបស់ ក្រសួងសេដ្ឋកិច្ច និងហិរញ្ញវត្ថុ
២. ពង្រឹងប្រសិទ្ធភាប នៃការអនុវត្តផែនការសកម្មភាពនានា ដែលបានលើកឡើង ដោយត្រូវមានយន្តការតាមដាន និងវាយតម្លៃការ អនុវត្តច្បាស់លាស់
៣. ពង្រឹងសមត្ថភាពផ្នែកគោលនយោបាយគយ ការងារបច្ចេកទេសគយ និងកិច្ចសម្រួលពាណិជ្ជកម្ម រួមទាំងការជំរុញគម្រោងបញ្ជរ តែមួយ ដើម្បីឈានទៅសម្រេចគោលដៅ នៃប្រព័ន្ធបញ្ជរតែមួយអាស៊ាន
៤. បណ្តុះផ្នត់គំនិត វប្បធម៌រស់នៅ និងអាកប្បកិរិយាថ្មី ដោយត្រូវបំពេញភារកិច្ចក្នុងនាមជាអ្នកផ្តល់សេវា ហើយត្រូវចាត់ទុកអ្នកបង់ ពន្ធ គឺជាអតិថិជន
៥. បន្តពង្រឹងប្រសិទ្ធភាព នៃការបង្ការ និងបង្រ្កាបអំពើរត់គេចពន្ធនៅគ្រប់ភូមិសាស្រ្ត និងមុខសញ្ញា ឲ្យបានជាប់ជាប្រចាំតាមរូបភាព ភ្លៀងរលឹម ជាពិសេសការបង្កើនការពង្រឹងអនុលោមភាពនៅដើមទី
៦. បង្កើនការពង្រឹងកាតព្វកិច្ចពន្ធអាករលើទំនិញគ្រប់ប្រភេទ ជាពិសេសលើទំនិញចម្រុះ ផលិតផលតេលសិលា សម្ភារៈសំណង់ និង យានយន្ត
៧. បន្តពង្រឹងកិច្ចសហប្រតិបត្តិការជាមួយស្ថាប័នពាក់ព័ន្ធ
៨. ពង្រឹងអង្គភាពទំនាក់ទំនងជាមួយសាធារណជន តាមរយៈការឆ្លើយបំភ្លឺ និងដោះស្រាយកង្វល់របស់ធុរជន និងប្រជាពលរដ្ឋឲ្យ បានទាន់ពេលវេលា៕
