(ម៉ានីល)៖ អាជ្ញាធរហ្វីលីពីន បានសម្រេច​ចាប់ឃាត់ នាវាដឹកទំនេញមួយគ្រឿងរបស់​ប្រទេសកូរ៉េខាងជើង នៅកំពង់ផែ ស៊ូប៊ិច (Subic) នៃខេត្ត ហ្សាមបាលស៍ (Zambales) ភាគខាងជើងប្រទេស តប​ទៅនឹង ដំណោះស្រាយរបស់ក្រុមប្រឹក្សា​សន្តិសុខ​នៃអង្គការសហប្រជាជាតិ (UNSC) ប្រឆាំងនឹងទីក្រុង​ព្យុងយ៉ាង។ នេះបើតាមការផ្សាយពីទីភ្នាក់ងារព័ត៌មាន​ចិនស៊ិនហួរ នៅថ្ងៃសៅរ៍ ទី០៥ ខែមីនា ឆ្នាំ២០១៦។

ចំពោះដំណោះស្រាយ​លេខ 2270 របស់ក្រុមប្រឹក្សា​សន្តិសុខ ប្រទេសហ្វីលីពីន បានអះអាងថាខ្លួន​មានសិទ្ធិនៅក្នុង ការឃាត់ទុករាល់នាវា​ដឹកទំនេញកូរ៉េខាងជើង ដែលក្នុងនោះរួមមានទាំងនាវាឈ្មោះ ហ្ស៊ីន តេង (Jin Teng) ផងដែរ ព្រោះ នាវានេះស្ថិតនៅក្នុង បញ្ជីរាយនាមនៃទ្រព្យសម្ព័ន្ធកូរ៉េខាងជើង ដែលត្រូវបានអន្តរជាតិសម្រេចបង្កកទុក។

ក្រៅពីការឃាត់នាវាខាងលើនេះ កាពីទែន និង អ្នកបម្រើការងារនៅលើនាវាទាំងអស់សរុបចំនួន ២១នាក់ ក៏នឹងត្រូវគេនិរទេស ត្រឡប់ទៅកូរ៉េខាងជើងវិញផងដែរ។ នេះជាការអនុវត្តន៍ទណ្ឌកម្មដំបូងគេ របស់ប្រទេស ហ្វីលីពីន ទៅលើកូរ៉េខាងជើង បន្ទាប់ពីទណ្ឌកម្មធ្ងន់ធ្ងររបស់អន្តរជាតិ បានចេញជាផ្លូវការ ឆ្លើយតបនឹង កម្មវិធីនុយក្លេអ៊ែរ ឬ អាវុធប្រល័យលោករបស់របបដឹកនាំទីក្រុង កាលពីថ្ងៃពុធ កន្លងទៅនេះ៕