(ត្បូងឃ្មុំ)៖ លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និយុវនីតិសម្បទា និងជាអនុប្រធាន ស.អ.ក បាមអញ្ជើញជាអធិបតីភាព បើកយុទ្ធនាការចាក់វ៉ាក់សាំងបង្ការជំងឺកូវីដ១៩ ឈ្មោះស៉ីណូវ៉ាក់ ជូនដល់អតីតយុទ្ធជនកម្ពុជា ជនពិការ និវត្តន៍ជន និងជនបាត់បង់សមត្ថភាពនៅស្រុកពញាក្រែក ខេត្តត្បូងឃ្មុំ ចំនួនជាង៦៥៥នាក់ នៅមន្ទីរពេទ្យបង្អែកស្រុកពញាក្រែក នៅថ្ងៃទី៩ ខែមេសា ឆ្នាំ២០២១នេះ។
យុទ្ធនាការចាក់វ៉ាក់សាំងការពារជំងឺកូវីដ-១៩ ជូនដល់អតីតយុទ្ធជន នាពេលនេះស្របពេលដែលដំណើរការ នៃការចាក់វ៉ាក់សាំងការពារជំងឺកូវីដ-១៩ ជូនដល់មន្ត្រីរាជការ កងកម្លាំងប្រដាប់អាវុធ អ្នកសារព័ត៌មាន និងប្រជាពលរដ្ឋទូទាំងប្រទេស នៅតាមបណ្តា រាជធានី ខេត្ត ក្រុង ផងដែរ។
ថ្លែងបើកយុទ្ធនាការចាក់វ៉ាក់សាំងការពារជំងឺកូវីដ-១៩ ជូនដល់អតីតយុទ្ធជន នៅមន្ទីរពេទ្យបង្អែកស្រុកពញាក្រែក នាពេលនោះ លោក វង សូត បានឲ្យដឹងថា យុទ្ធនាការចាក់វ៉ាក់សាំងជូនដល់អតីតយុទ្ធជនកម្ពុជា គឺដោយសារតែមានការយកចិត្តទុកដាក់ពីសំណាក់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា អំពីសុខមាលភាពរបស់បងប្អូនអតីតយុទ្ធជន ដែលពួកគាត់បានពលីជួយជាតិមាតុភូមិ ឱ្យមានសុខសន្តិភាព និងការអភិវឌ្ឍរហូតដល់សព្វថ្ងៃនេះ។
លោកបន្តទៀតថា ការចាក់វ៉ាក់សាំងការពារនេះ គឺអនុវត្តតាមបទបញ្ជារបស់ប្រមុខរាជរដ្ឋាភិបាល ប្រធានសមាគមអតីតយុទ្ធជនកម្ពុជា ដើម្បីផ្តល់ការចាក់វ៉ាក់សាំងការពារជំងឺកូវីដ-១៩ ជូនដល់អតីតយុទ្ធជននៅទូទាំងប្រទេសនោះ ក្រុមការងារ អនុគណៈកម្មការចាក់វ៉ាក់សាំងរបស់សមាគមអតីតយុទ្ធជនកម្ពុជា ក៏បានរៀបចំទីកន្លែង និងក្រុមគ្រូពេទ្យជំនាញចាក់វ៉ាក់សាំងការពារជំងឺកូវីដ១៩ ជូនដល់សមាជិកអតីតយុទ្ធជននៅទូទាំងប្រទេសផងដែរ។ ម្យ៉ាងទៀត អតីតយុទ្ធជននៅទូទាំងប្រទេស ២៥រាជធានី-ខេត្ត មានចំនួនជាង៨ម៉ឺននាក់ នៅពេលនេះ ត្រូវបានក្រុមគ្រូពេទ្យនៅតាមបណ្តាខេត្តមួយចំនួន បានទទួលការអនុញ្ញាតឱ្យចាក់វ៉ាក់សាំងបង្ការជំងឺកូវីដ១៩ ដល់អតីតយុទ្ធជននិងក្រុមគ្រួសារនៅតាមបណ្តាខេត្តឱ្យបានគ្រប់ៗគ្នា។
លោករដ្ឋមន្ត្រី វង សូត បានបញ្ជាក់ទៀតថា ការចាក់វ៉ាក់សាំងការពារជំងឺកូវីដ១៩នេះ គឺផ្ដល់នូវអត្ថប្រយោជន៍ជាច្រើន មិនថាប្រជាពលរដ្ឋទូទៅ ឬសមាជិកអតីតយុទ្ធជននោះទេ គឺការចាក់វ៉ាក់សាំងនេះ ដើម្បីការពារការឆ្លងរាលដាលជំងឺកូវីដ-១៩មកក្នុងសហគមន៍។ លោកបន្តថា
ចំពោះសមាជិកអតីតយុទ្ធជន ការរៀបចំចាក់វ៉ាក់សាំងជូនដល់បងប្អូននេះ ដោយមើលឃើញថា បងប្អូនសមាជិកអតីតយុទ្ធជន គឺជាក្រុមគោលដៅមួយអាចប្រឈមមុខ ងាយរងគ្រោះ ដូច្នេះប្រមុខរាជរដ្ឋាភិបាល បានកំណត់ថា សមាជិកអតីតយុទ្ធជនក៏មាន អាទិភាព ក្នុងការចាក់វ៉ាក់សាំង ការពារជំងឺកូវីដ១៩ ដែលនេះគឺជាការគិតគូរខ្ពស់ របស់ប្រមុខរាជរដ្ឋាភិបាលកម្ពុជា ចំពោះសុខមាលភាពសម្រាប់បងប្អូនសមាជិកអតីតយុទ្ធយើង។
ចប់ការសំណេះសំណាល់នាឱកាសនោះ លោករដ្ឋមន្ត្រី បានឧបត្ថម្ភរថយន្តសង្គ្រោះចំនួន ០១គ្រឿង ដល់មន្ទីរពេទ្យបង្អែកស្រុកពញាក្រែក និងប្រគល់ថវិការជូនអតីតយុទ្ធជននៅក្នុងមណ្ឌលចាក់វ៉ាក់សាំងចំនួន ១៧០ នាក់ ម្នាក់ទទួលបានថវិកា ៥ម៉ឺនរៀល លោកគ្រូ-អ្នកគ្រូពេទ្យ និងបុគ្គលិកសុខាភិបាល មានចំនួន១៥៦នាក់ ក្នុងម្នាក់ៗទទួលបានថវិកាចំនួន១០០,០០០រៀល អ្នកជំងឺម្រាកព្យាបាលនៅក្នុងមន្ទីរពេទ្យចំនួន៤០នាក់ ក្នុងម្នាក់ៗទទួលបានថវិកាចំនួន ៥ម៉ឺនរៀល និងឧបត្ថម្ភជូនអធិការដ្ឋាននគរបាលស្រុកថវិកា ១លានរៀលផងដែរ៕
