(ភ្នំពេញ)៖ «ខ្ញុំប្តេជ្ញាធ្វើជាគំរូដល់អ្នកជំនាន់ក្រោយ មិនឲ្យមានរឿងអាស្រូវដូចមេគណបក្សមួយចំនួនកន្លងមក ដោយប្រព្រឹត្តអសីលធម៌លើនារីភេទ» នេះជាការលើកឡើងរបស់លោក ពេជ្រ ស្រស់ ប្រធានគណបក្សយុវជនកម្ពុជា នៅព្រលប់ថ្ងៃទី០៣ ខែមីនា ឆ្នាំ២០១៦នេះ ប្រាប់អង្គភាព Fresh News ឲ្យដឹងយ៉ាងដូច្នេះ។ លោកបានបញ្ជាក់ថា លោកបានទទួលការអប់រំដ៏ធំធេងពី ព្រះតេជគុណ គ្រូសូត្រឆ្វេងនៅវត្តនាគវ័ន អំពីសីលធម៌ និង សាងអំពើល្អ ធ្វើល្អចំពោះប្រជាពលរដ្ឋ មិនប្រព្រឹត្តអំពើអាក្រក់ចំពោះបងប្អូនប្រជាពលរដ្ឋ ជាពិសេសលើនារីភេទតែម្តង។
ការលើកឡើងរបស់ប្រធានគណបក្សយុវជនកម្ពុជារូបនោះ ធ្វើឡើងស្របពេលស្ថានភាពរឿងអាស្រូវរបស់លោក កឹម សុខា ជាមួយស្រីស្នេហ៍ បាននឹងកំពុងធ្ងន់ធ្ងរទៅៗ នឹងដោយគ្មានការចេញមុខបំភ្លឺជុំវិញបញ្ហានេះ។
លោក ពេជ្រ ស្រស់ បានអះអាងបន្តទៀតថា «ខ្ញុំឈានជំហានមកដល់ថ្ងៃនេះ គឺដោយសារគុណូបការៈដ៏ធំធេង បន្ទាប់ពីលោកឳពុក និងអ្នកម្តាយ គឺព្រះតេជគុណព្រះនាម ស៊ឹម សន ព្រះគ្រូសូធ្យឆ្វេងគង់នៅវត្តនាគវ័ន ដោយរូបលោកមានសំណាងបានជ្រកក្រោមដំបូលដ៏ត្រជាក់ត្រជុំរបស់ ព្រះតេជគុណ មិនត្រឹមតែផ្តល់កន្លែងស្នាក់នៅ ដល់ខ្ញុំបាទទេ ព្រះតេជគុណបានអប់រំ និងផ្តល់ឱវាទ និងយុទ្ឋសាស្រ្តដ៏មានតម្លៃ សម្រាប់សម្រេចគោលដៅក្នុងឆាកជីវិត ព្រមទាំងបានផ្តល់មនសិកា ស្នេហាជាតិ និងជួយដល់ជនខ្សត់ខ្យោយផងដែរ។ ខ្ញុំបានរស់នៅក្រោមការ គ្រប់គ្រង របស់ព្រះតេជគុណ ស៊ឹម សន បានទទួលនូវពន្លឺដ៏ភ្លឺបំផុត សម្រាប់រស់នៅក្នុងឆាកជីវិត។ ហើយនៅពេលបើក គណបក្សយុវជនកម្ពុជា ព្រះតេជគុណបានផ្តាំផ្ញើថា ការសាងអំពើល្អ និងធ្វើល្អ ត្រូវមានភាពតស៊ូ និងពុះពារគ្រប់ឧបសគ្គ ហើយត្រូវចាំថា គ្មានបុគ្គលណាមួយ សម្រេចដល់គោលដៅ ក្នុងរយៈពេលមួយថ្ងៃបានឡើយ។
សូមជំរាបថា នៅល្ងាចថ្ងៃទី០៣ ខែមីនា ឆ្នាំ២០១៦នេះ ម្ចាស់ Facebook «រឿងពិត CNRP» បានបន្តទម្លាយសារសំឡេងឆ្លងឆ្លើយលោក កឹម សុខា ដល់វគ្គទី៩ហើយ៕
