(​ហ្សា​ការតា​)៖ មន្ត្រី​តាមដាន និង​ចាត់ចែង​ពេល​មាន​គ្រោះមហន្តរាយ​ឥណ្ឌូនេស៊ី បាន​ប្រកាស​ឲ្យដឹង​នៅ​ថ្ងៃ​ព្រហស្បតិ៍ ទី​០៣ ខែ​មីនា ឆ្នាំ ២០១៦ នេះ​ថា គ្រោះធម្មជាតិ​រញ្ជួយ​ផែនដី​កម្រិតធ្ងន់ ៧,៨ រ៉ិ​ចទ័​រ ដែល​បាន​វាយប្រហារ​ភាគ​ខាងលិច​កោះ​ស៊ូ​ម៉ា​ត្រា កាលពី​យប់​ថ្ងៃ​ពុធ នោះ​មិន​បាន​បណ្តាលឲ្យ​មនុស្ស​ណា​ម្នាក់​បាត់បង់​ជីវិត ឬ​រងរបួស​ឡើយ​។ នេះ​បើ​តាម​ការផ្សាយ​របស់ ទីភ្នាក់ងារ​ព័ត៌មាន​ចិន​ស៊ិន​ហួរ​។​

​អភិបាលរង​ខេត្ត​ស៊ូ​ម៉ា​ត្រា​ខាងលិច លោក ណា​ស្រុល អា​ប៊ីត (Nasrul Abit) បាន​ប្រាប់​អ្នកសារព័ត៌មាន នៅ​ថ្ងៃ​នេះ​ទៀត​ថា «​ពុំ​មាន​មនុស្ស​ស្លាប់​នោះ​ទេ ក្រោយពី​យើង​តាមដាន​មកដល់​ថ្ងៃ​ព្រហស្បតិ៍​នេះ ចាប់តាំងពី គ្រោះ​រញ្ជួយ​ដី​បាន​កើតឡើង​យប់មិញ​។​» យ៉ាងណាក៏ដោយ អគារ​មួយ​ចំនួន​ក្នុង​ទីក្រុង​ភាគ​ខាងលិច​នោះ បាន​រលំ និង​ខូត​ខាច​បន្តិចបន្តួច តែ​មិន​បាន​បង្ក​គ្រោះថ្នាក់​ដល់​ជីវិត​មនុស្ស​ទេ​។​

​គួរបញ្ជាក់​ថា គ្រោះ​រញ្ជួយ​ដី​ខាងលើនេះ បាន​កើតឡើង​ពី​ក្នុង​ជម្រៅ ១០ គីឡូម៉ែត្រ ស្ថិតនៅ​ចម្ងាយ​ពី​ប្រជុំ​កោះ ម៉ាន​តា​វ៉ៃ (Mantawai) ក្បែរ​កោះ​ស៊ូ​ម៉ា​ត្រា ៦៣៦ គីឡូម៉ែត្រ កាលពី​វេលា​ម៉ោង ៧៖៣៩​នាទី យប់​ថ្ងៃ​ពុធ​។ រលក​យក្ស​ស៊ូណាមិ ពី​ដំបូង​ត្រូវបាន​គេ​ព្រមាន​ថា នឹង​អាច​កើតមាន ប៉ុន្តែ​រហូត​មកដល់​ព្រឹក​ថ្ងៃ​ព្រហស្បតិ៍ ការព្រមាន​ត្រូវបាន​លុបចោល​វិញ ដោយ​ក្រុម​អ្នកតាមដាន​៕​