(ភ្នំពេញ)៖ ក្រសួងសុខាភិបាល នៅព្រលបង់ថ្ងៃទី០២ ខែមេសា ឆ្នាំ២០២១នេះ បានចេញសេចក្តីប្រកាសព័ត៌មានផ្លូវការ បញ្ជាក់ពីការស្លាប់អ្នកជំងឺកូវីដ១៩ ចំនួនពីរនាក់ទៀត។ ក្នុងនោះម្នាក់ស្លាប់ដោយសារជំងឺកូវីដ១៩ និងម្នាក់ទៀតស្លាប់ដោយសារការស្ទះសរសៃឈាម។

ក្នុងសេចក្តីប្រកាសព័ត៌មាននេះ ក្រសួងបានបញ្ជាក់ថា អ្នកជំងឺដែលស្លាប់ដោយសារអាការៈរោគនៃជំងឺកូវីដ១៩ ជាស្ត្រីជនជាតិខ្មែរ អាយុ ៦១ឆ្នាំ មានអាសយដ្ឋាននៅសង្កាត់និរោធន៍ ខណ្ឌច្បារអំពៅ។ ស្ត្រីរូបនេះ បានស្លាប់បាត់បង់ជីវិតនៅថ្ងៃទី០១ ខែមេសា ឆ្នាំ២០២១ វេលាម៉ោង ២២៖៣០នាទី។

ក្រសួងសុខាភិបាលបានបញ្ជាក់ថា ស្ត្រីរូបនេះ បានយកសំណាកនៅមន្ទីរពេទ្យ ខេមាអន្តរជាតិ បឹងកេងកង១ និងទទួលបានលទ្ធផលថា មានវិជ្ជមានវីរុសកូវីដ១៩ ដោយមន្ទីរពិសោធន៍សុខភាពសាធារណៈ នៅថ្ងៃទី៣១ ខែមីនា ឆ្នាំ២០២១ ហើយត្រូវបានបញ្ជូនទៅព្យាបាលជំងឺនៅមន្ទីរពេទ្យ «ហ្លួងម៉ែ» នៅថ្ងៃដដែល។

អ្នកជំងឺមានស្ថានភាពធ្ងន់ធ្ងរតាំងពីថ្ងៃចូលសម្រាកដំបូង ក្រុមគ្រូពេទ្យបានខិតខំយកចិត្តទុកដាក់ជួយសង្គ្រោះ តាមបច្ចេកទេស។ តែដោយអ្នកជំងឺមានសភាពកាន់តែធ្ងន់ធ្ងរឡើង តម្រូវឱ្យគ្រូពេទ្យប្រើប្រាស់ម៉ាស៊ីនជំនួយដង្ហើមដើម្បីជួយសង្គ្រោះ ប៉ុន្តែមិនអាចជួយសង្គ្រោះបាន អ្នកជំងឺបានស្លាប់បាត់បង់ជីវិតនៅថ្ងៃទី០១ ខែមេសា វេលាម៉ោង ២២៖៣០នាទីយប់។

ជាការសន្និដ្ឋានរបស់គ្រូពេទ្យជំនាញ អ្នកជំងឺរូបនេះ បានស្លាប់ដោយសារវិបត្តិផ្លូវដង្ហើធ្ងន់ធ្ងរ និងរលាកសួតសងខាងធ្ងន់ធ្ងរបណ្តាលមកពីវីរុសកូវីដ១៩។

ដោយឡែកអ្នកជំងឺកូវីដ១៩ ដែលបានស្លាប់ដោយសារការស្ទះសរសៃឈាមបេះដូង គឺជាជនជាតិខ្មែរអាយុ ៥៩ឆ្នាំ មានលំនៅឋានក្នុងសង្កាត់ស្រះចក ខណ្ឌដូនពេញ។ អ្នកជំងឺរូបនេះ បានស្លាប់នៅថ្ងៃទី០១ ខែមេសា ឆ្នាំ២០២១ វេលាម៉ោង ១២៖០០នាទីថ្ងៃត្រង់ នៅគេហដ្ឋាន។

សេចក្តីប្រកាសបានបញ្ជាក់ថា ស្ត្រីរូបនេះ ជាអ្នកធ្វើចត្តាឡីស័កនៅផ្ទះផ្ទាល់ខ្លួន តាំងពីថ្ងៃទី២២ ខែមីនា ឆ្នាំ២០២១។ អ្នកជំងឺមានជំងឺលើសសម្ពាធឈាប្រចាំប្រចាំកាយ កំពុងប្រើប្រាស់ថ្នាំជាប្រចាំ។ នៅថ្ងៃទី០១ ខែមេសា ឆ្នាំ២០២១ វេលាម៉ោង ១១៖៣០នាទីថ្ងៃ ពេលកំពុងពិសារបាយ ស្រាប់តែសន្លប់បាត់បង់ស្មារតីភ្លាមៗ។ ក្រុមគ្រួសារ បានជួយសង្គ្រោះ ដោយធ្វើចលនាបេះដូងមួយសន្ទុះគាត់បានស្លាប់បាត់បង់ជីវិតនៅវេលាម៉ោង ១២៖០០នាទីថ្ងៃត្រង់នៅគេហដ្ឋាន។

ក្រោយមរណភាពក្រុមគ្រូពេទ្យឆ្លើយតបបន្ទាន់បានចុះទៅយកសំណាករបស់សពភ្លាមៗ ហើយលទ្ធផលសំណាកបង្ហាញថា សពមានវិជ្ជមានជំងឺកូវីដ១៩។ ការសន្និដ្ឋានរបស់ក្រុមគ្រូពេទ្យបានគូសបញ្ជាក់ថា ស្ត្រីរូបនេះ បានស្លាប់ដោយសារស្ទះសរសៃឈាមបេះដូង មិនមែនស្លាប់ដោយសារជំងឺកូវីដ១៩នោះទេ។

យោងតាមរបាយការណ៍ផ្លូវការរបស់ក្រសួងសុខាភិបាល គិតត្រឹមយប់ថ្ងៃទី០២ ខែមេសារ អ្នកជំងឺកូវីដ១៩ ដែលបានស្លាប់បាត់បង់ជីវិតមានចំនួនសរុប ២២នាក់ហើយ។ ក្នុងនោះ ១៧នាក់ស្លាប់ដោយសារជំងឺកូវីដ១៩ និងអ្នកជំងឺ ៥នាក់ ស្លាប់ដោយសារអាការៈនៃជំងឺផ្សេង។

ខាងក្រោមជាទិន្នន័យអ្នកជំងឺដែលបានស្លាប់បាត់បង់ជីវិត បង្ហាញផ្លូវការដោយក្រសួងសុខាភិបាល៖
* ទី១៖ បុរសជនជាតិខ្មែរ អាយុ៥០ឆ្នាំ បានស្លាប់នៅមន្ទីរមិត្តភាពខ្មែរ-សូវៀត កាលពីថ្ងៃទី១១ ខែមីនា ឆ្នាំ២០២១។
* ទី២៖ ស្រ្តីជនជាតិខ្មែរ ឈ្មោះ ងឿន សុថានី អាយុ៦២ឆ្នាំ បានស្លាប់នៅមន្ទីរពេទ្យមិត្តភាពខ្មែរ-សូវៀត នៅថ្ងៃទី១៩ ខែមីនា ឆ្នាំ២០២១ (ភរិយា លោក ហួរ ឡាវី)
* ទី៣៖ បុរសជនជាតិខ្មែរ ឈ្មោះ គឹម ឃីស៊ុន អាយុ៤៦ឆ្នាំ បានស្លាប់នៅមន្ទីរពេទ្យមិត្តភាពខ្មែរ-សូវៀត នៅថ្ងៃទី១៩ ខែមីនា ឆ្នាំ២០២១។
* ទី៤៖ បុរសជនជាតិខ្មែរ អាយុ៧៥ឆ្នាំ ឈ្មោះ ស្តើង ជា បានស្លាប់នៅមន្ទីរពេទ្យមិត្តភាពខ្មែរ-សូវៀត ថ្ងៃទី២១ ខែមីនា ឆ្នាំ២០២១។
* ទី៥៖ ស្រ្តីជនជាតិខ្មែរ ឈ្មោះ អ៉ិន ម៉ានីតា ភេទស្រី អាយុ៦២ឆ្នាំ (ជាម្តាយតារាកំប្លែងស្រីពីន) រស់នៅក្រោយផ្សារសឡា ខណ្ឌមានជ័យ រាជធានីភ្នំពេញ។
* ទី៦៖ ឈ្មោះ ឈាន ប៊ុនធឿន ហៅឌីជេប៊ុម ជនជាតិខ្មែរ ភេទប្រុស អាយុ៣៨ឆ្នាំ ស្នាក់នៅភូមិកណ្តាល ឃុំមានជ័យ ស្រុកឧដុង្គ ខេត្តកំពង់ស្ពឺ ។
* ទី៧៖ ឈ្មោះ Wu Jiannan ជនជាតិចិន ភេទប្រុស ៤៣ឆ្នាំ ជាបុគ្គលិកកាស៊ីណូ នៅស្រុកកោះធំ ខេត្តកណ្តាល។
* ទី៨៖ ឈ្មោះ ថន ចាន់ធឿន អាយុ៥៥ឆ្នាំ មន្រ្តីនគរបាលចរាចរណ៍ ស្រុកកំណើត នៅស្រុកខ្សាច់កណ្តាល ខេត្តកណ្តាល។
* ទី៩៖ ស្ត្រីជនជាតិខ្មែរ ឈ្មោះ ប៉ែន ស៊ីណុន អាយុ៤៣ឆ្នាំ នៅខេត្តព្រះសីហនុ។
* ទី១០៖ ស្រ្តីជនជាតិខ្មែរ ឈ្មោះ Hou Houy នៅខណ្ឌប្ញស្សីកែវ រាជធានីភ្នំពេញ អាយុ៧២ឆ្នាំ។
* ទី១១៖ អ្នកជំងឺអាយុ៧៦ឆ្នាំ រស់នៅភូមិ២ ឃុំព្រែកខ្សាយ ស្រុកពាមរក៍ ខេត្តព្រៃវែង ស្លាប់នៅមន្ទីរពេទ្យរុស្ស៊ី ម៉ោង៧៖០៥នាទីយប់ ថ្ងៃទី២៧ ខែមីនា
* ទី១២៖ អ្នកជំងឺ ភេទស្រី អាយុ៥៦ឆ្នាំ រស់នៅសង្កាត់វាលវង់ ខណ្ឌ៧មករា រាជធានីភ្នំពេញ ស្លាប់នៅវេលាម៉ោង១០៖៣៧នាទី ថ្ងៃទី៣១ ខែមីនា ឆ្នាំ២០២០១ នៅមន្ទីរពេទ្យរុស្ស៉ី។
* ១៣៖ អ្នកជំងឺកូវីដ១៩ អាយុ២៨ឆ្នាំ រស់នៅខណ្ឌឫស្សីកែវ រាជធានីភ្នំពេញ បានស្លាប់បាត់បង់ជីវិត ថ្ងៃទី៣១ ខែមីនា ឆ្នាំ២០២១ ម៉ោង ១៤៖៤០នាទីរសៀលនៅមន្ទីរពេទ្យមិត្តភាពខ្មែរ-សូវៀត។
* ១៤៖ អ្នកជំងឺកូវីដ១៩ ភេទស្រី អាយុ៥៦ឆ្នាំ រស់នៅសង្កាត់បឹងព្រលិត ខណ្ឌ៧មករា រាជធានីភ្នំពេញ បានស្លាប់នៅល្ងាចថ្ងៃទី៣១ ខែមីនា ឆ្នាំ២០២១ នៅមន្ទីរពេទ្យរុស្ស៉ី។
* ១៥៖ អ្នកជំងឺកូវីដ១៩ ភេទស្រី អាយុ៧០ឆ្នាំ រស់នៅសង្កាត់ទន្លេបាសាក់ ខណ្ឌចំការមន រាជធានីភ្នំពេញ ស្លាប់នៅព្រឹកថ្ងៃទី០១ ខែមេសា ឆ្នាំ២០២១ នៅមន្ទីរពេទ្យរុស្ស៉ី។
* ទី១៦៖ អ្នកជំងឺអាយុ ៦៧ឆ្នាំ មានអាសយដ្ឋាននៅសង្កាត់ផ្សារថ្មី២ ខណ្ឌដូនពេញ រាជធានីភ្នំពេញ។ ស្លាប់នៅព្រឹកថ្ងៃទី០១ ខែមេសា ឆ្នាំ២០២១។
* ទី១៧៖ អ្នកជំងឺកូវីដ១៩ ភេទស្រី អាយុ ៦១ឆ្នាំ មានអាសយដ្ឋាននៅសង្កាត់និរោធន៍ ខណ្ឌច្បារអំពៅ។ ស្ត្រីរូបនេះ បានស្លាប់បាត់បង់ជីវិតនៅថ្ងៃទី០១ ខែមេសា ឆ្នាំ២០២១ វេលាម៉ោង ២២៖៣០នាទី។

អ្នកជំងឺកូវីដ១៩ ដែលស្លាប់ដោយសារអាការរោគផ្សេងមាន៥នាក់រួមមាន៖

* ១៖ បុរសជនជាតិចិន ឈ្មោះ ឡាយ ប៊ីនស៊ាង អាយុ ៣៣ឆ្នាំ។ ស្លាប់នៅថ្ងៃទី០៤ ខែមីនា ឆ្នាំ២០២១ ដោយសារការរើមេថ្នាំញៀនធ្ងន់ធ្ងរបណ្តាលឱ្យគាំងបេះដូង។
* ២៖ បុរសជនជាតិខ្មែរអាយុ ៦៩ឆ្នាំ នៅភូមិជ័យឧត្តម ឃុំព្រែកខ្សាយ «ខ» ស្រុកពាមរក៍ ខេត្តព្រៃវែង។ ស្លាប់នៅថ្ងៃទី១៤ ខែមីនា ឆ្នាំ២០២១ ដោយសារជំងឺស្ទះសរសៃឈាមបេះដូង។
* ៣៖ ស្ត្រីជនជាតិខ្មែរអាយុ ៤៣ឆ្នាំ មានអាសយដ្ឋាននៅខេត្តព្រះសីហនុ។ ស្លាប់នៅថ្ងៃទី២៦ ខែមីនា ឆ្នាំ២០២១ ដោយសារបាត់បង់ឈាមច្រើនយ៉ាងគំហុក។
* ៤៖ បុរសជនជាតិខ្មែរអាយុ ៣៩ឆ្នាំ នៅលំនៅឋាននៅឧទ្យានទន្លេបាសាក់ ខណ្ឌចំការមន រាជធានីភ្នំពេញ។ ស្លាប់នៅថ្ងៃទី២៨ ខែមីនា ឆ្នាំ២០២១ ដោយសារជំងឺស្ទះសរសៃឈាមបេះដូង។
* ៥៖ ស្ត្រីជនជាតិខ្មែរអាយុ ៥៩ឆ្នាំ មានលំនៅឋានក្នុងសង្កាត់ស្រះចក ខណ្ឌដូនពេញ។ អ្នកជំងឺរូបនេះ បានស្លាប់នៅថ្ងៃទី០១ ខែមេសា ឆ្នាំ២០២១ វេលាម៉ោង ១២៖០០នាទីថ្ងៃត្រង់ នៅគេហដ្ឋាន៕