(ភ្នំពេញ)៖ អភិបាលខណ្ឌពោធិ៍សែនជ័យ លោក ហែម ដារិទ្ធិ បានអំពាវនាវដល់ប្រជាពលរដ្ឋទូទាំងខណ្ឌពោធិ៍សែនជ័យ មានការប្រុងប្រយ័ត្នឱ្យអស់លទ្ធភាព ចំពោះការឆ្លងរីករាលដាល ជំងឺកូវីដ-១៩។ លោកសំណូមពរដល់ប្រជាពលរដ្ឋ ត្រូវអនុវត្តឱ្យបាន ៣កុំ និង៣ការពារ ហើយអ្វីដែលមិនចាំបាច់កុំទៅ កុំចេញក្រៅ និងកាត់បន្ថយការជួបជុំគ្នា។
លោកអភិបាលខណ្ឌ ថ្លែងបែបនេះ ក្នុងឱកាសនាំយកអំណោយទៅឧបត្តម្ភដល់ អង្គការជីវិតរស់នៅដោយឯករាជ្យនៃជនពិការភ្នំពេញ នៅភូមិចំការឪឡឹក សង្កាត់កាកាបទី១ ខណ្ឌពោធិ៍សែនជ័យ រសៀលថ្ងៃទី២៦ ខែមិនា ឆ្នាំ២០២១។
លោក ហែម ដារិទ្ធិ បានបញ្ជាក់ថា «បើមិនស្រឡាញ់អាយុជិវិតរបស់ខ្លួនទេ ក៏ត្រូវគិតពីកូនប្រពន្ធ ម៉ែឪម្តាយ និងអ្នករស់នៅជាមួយ កុំនាំទុក្ខឱ្យអ្នកទាំងនោះដែលមិនដឹងអី ឆ្លងរោគពីយើង ពិសេសកុំនាំកូវីដ ចូលផ្ទះ»។
លោក ហែម ដារិទ្ធិ បានលើកឡើងថា រយៈពេលចុងក្រោយនេះ ចាប់ពីព្រឹត្តិការណ៍ ២០កុម្ភៈមក ស្ថានភាពនៃការឆ្លងរីករាលដាល ជំងឺកូវីដ-១៩ កាន់តែធ្ងន់ធ្ងរទៅៗ រហូតធ្វើឱ្យមានមនុស្សបាត់បង់ជីវិតជាបន្តបន្ទាប់ ដែលក្នុងនោះសំរាប់មូលដ្ឋានខណ្ឌពោធិ៍សែនជ័យ មានកន្លែងធ្វើចត្តាឡីស័ក ចំនួន២៩ទីតាំង , មានមនុស្សសរុប ១១៥៥នាក់ ក្នុងនោះស្រី ៣១១នាក់។ ហើយក្នុងចំនួននេះ ក្រសួងសុខាភិបាល បានរកឃើញ អ្នកមានវិជ្ជមាន កូវីដ -១៩ ចំនួន៤៣នាក់ ក្នុងនោះ ចំនួន ២នាក់បានបាត់បង់ជីវិត។
ទាក់ទឹនឹងបញ្ហាអំណោយ លោកប្រធានកិត្តិយសអនុសាខាកាកបាទក្រហមខណ្ឌពោធិ៍សែនជ័យ ក៏បានបញ្ជាក់ថា នេះជាអំណោយដែលឧបត្តម្ភពីសម្តេច កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា តាមរយៈអនុសាខាខណ្ឌ ដើម្បីជួយសម្រាប់បន្ទុកខ្វះខាត ក្នុងជីវភាពប្រចាំថ្ងៃរបស់ប្អូន ក្មួយៗជនពិការ។
ជាមួយនេះ លោកក៏សូមផ្តាំផ្ញើឱ្យប្អូនៗ ក្មួយៗទាំងអស់ ត្រូវខិតខំតស៊ូឡើង ព្រោះក្នុងនាមជាជនពិការ បើគ្មានចំណេះដឹង គ្មានសមត្ថភាពទេ ពិបាកនឹងរកការងាធ្វើណាស់។ ទន្ទឹមនឹងនេះ លោកសូមឱ្យបន្តការប្រុងប្រយ័ត្ន ការពារកុំឱ្យឆ្លងកូវីដ ព្រោះជំងឺនេះ វាមិនលើកលែងទេ ទោះជនពិការក៏ដោយ។
គួរបញ្ជាក់ថា អង្គការជីវិតរស់នៅដោយឯករាជ្យនៃជនពិការភ្នំពេញ កំពុងគ្រប់គ្រង បណ្តុះបណ្តាល និងអភិវឌ្ឍន៍ធនធាន់មនុស្ស ចំនួន២២នាក់។ ក្នុងចំណោមនេះ មានអ្នកខ្លះបានចេញទៅបំរើការងារនៅតាមរោងចក្រ និងកន្លែងផ្សេងៗ តែដោយស្ថានភាព ជំងឺកូវីដ-១៩ វាយលុកខ្លាំងពេល ពួកគាត់បានត្រូវផ្អាកការងារ ដែលធ្វើឱ្យបាត់បង់ប្រាក់ចំណូល និងប៉ះពាល់ដល់ជីវភាពប្រចាំថ្ងៃជាខ្លាំងផងដែរ។
អំណោយដែលអភិបាលខណ្ឌផ្តល់ជូនរួមមាន គ្រឿងឧបភោគបរិភោគ មានអង្ករ ចំនួន២០បាវ មី ៥កេស ទឹកសុទ្ធ១០កេស ទឹកក្រូច ៣កេស ម៉ាស់ ៣កេសធំ ត្រី៥យួរ សាច់ជ្រូក ១គីឡូក្រាម ត្រីងៀត ៣គីឡូក្រាម ត្រីចំហុយ ១គីឡូក្រាម ស្ពៃក្តោប ២០គីឡូក្រាម និងថវិកា ចំនួន ១លានរៀល៕
