(ភ្នំពេញ)៖ សមត្ថកិច្ចបានអំពាវនាវដល់អ្នកដែលធ្លាប់បានទៅ ឬធ្លាប់មានការពាក់ព័ន្ធ ជាមួយអ្នកធ្វើការនៅហាង «Lotteria» ស្ថិតនៅផ្លូវមុន្នីវង្សកែង ផ្លូវ២៤០ សង្កាត់ចតុមុខ ខណ្ឌដូនពេញ ចាប់ពីថ្ងៃទី១៨ ខែមីនា ឆ្នាំ២០២១ (ម៉ោង១៦៖៥០) នាទីតទៅ សូមទៅយកសំណាកពិនិត្យសុខភាពរកជំងឺកូវីដ១៩ និងដាក់ខ្លួននៅដាច់ដោយឡែក។

ការអំពាវនាវបែបនេះ បន្ទាប់ពីហាង «Lotteria» នេះ មានជាប់ពាក់ព័ន្ធនឹងអ្នកជំងឺកូវីដ១៩។ ក្នុងសេចក្តីជូនដំណឹងរបស់អនុគណៈកម្មការស្រាវជ្រាវអ្នកសង្ស័យកូវីដ បានគូសបញ្ជាក់ថា អ្នកដែលត្រូវទៅយកសំណាក ពិនិត្យសុខភាពនេះ គឺសម្រាប់អ្នកចេញរោគសញ្ញាដូចជាគ្រុនក្តៅ ក្អក កណ្តាស់ ឈឺបំពង់ក ឬដកដង្ហើមខ្លីៗ។

អ្នកមានអការៈទាំងនេះ អាចទៅយកសំណាកនៅវិទ្យាល័យបាក់ទូក វិទ្យាល័យបឹងត្របែក មណ្ឌលសុខភាពចាក់អង្រែ មន្ទីរពេទ្យមិត្តភាពខ្មែរ-សូវៀត ឬនៅមន្ទីរពេទ្យបង្អែកខេត្ត ដោយឥតគិតថ្លៃ។

សមត្ថកិច្ចក៏បានអំពាវនាវដល់អ្នកបានចូលក្នុងហាង «Lotteria» ហើយមិនទាន់ចេញរោគសញ្ញា សូមធ្វើចត្តាឡីស័កនៅផ្ទះ និងតាមដានសុខភាពរយៈពេល១៤ថ្ងៃ៕