(កំពង់ធំ)៖ តាមសេចក្ដីប្រកាសរបស់ក្រសួងសុខាភិបាល នាថ្ងៃទី២២ ខែមីនា ឆ្នាំ២០២១ ដែលបានបង្ហាញពីចំនួនអ្នកឆ្លងជំងឺកូវីដ១៩ចំនួន ៧៣នាក់នោះ ក៏មានអ្នករស់នៅស្រុកតាំងគោក ខេត្តកំពង់ធំ ៥នាក់ដែរ ប៉ុន្តែអ្នកទាំង៥នេះសុទ្ធតែស្ថិតក្នុងចំណោមអ្នកធ្វើចត្តាឡីស័កទាំងអស់ ពោលគឺមិនមានអ្នកនៅក្រៅមណ្ឌលចត្តាឡីស័កដែលអាជ្ញាធរកំពុងគ្រប់គ្រងនោះឡើយ។

ថ្លែងប្រាប់បណ្ដាញសារព័ត៌មាន Fresh News នាថ្ងៃទី២២ ខែមីនានេះ លោក ហាក់ ម៉ុងហួត អភិបាលស្រុកតាំងគោក បានឱ្យដឹងថា ក្នុងចំណោមអ្នកធ្វើចត្តាឡីស័កចំនួន ២៦នាក់ នៅមណ្ឌលចត្តាឡីស័កសាលាបឋមសិក្សា គិរីអណ្ដែត ត្រូវបានមន្ត្រីសុខាភិបាលយកសំណាកទៅធ្វើតេស្ដរកមេរោគកូវីដ១៩ ជាលើកទី៣ ខណៈលទ្ធផលតេស្តបានចេញមកថា មនុស្សចំនួន ៥នាក់ ត្រូវបានរកឃើញវិជ្ជមានមេរោគកូវីដ១៩ ចំណែកឯអ្នកដទៃទៀត មិនមានផ្ទុកមេរោគកូវីដនោះឡើយ។

លោក ហាក់ ម៉ុងហួត បានបន្តថា អ្នកទាំង៥នាក់នេះ គឺមានការពាក់ព័ន្ធដោយផ្ទាល់ជាមួយអ្នកជំងឺកូវីដម្នាក់ គឺប្អូនស្រី ឡេង មីងហួយ ដែលពាក់ព័ន្ធនឹងព្រឹត្តិការណ៍សហគមន៍ ២០ កុម្ភៈ ហើយមានសាវតាឆ្លងមេរោគកូវីដ១៩ ពីខេត្តព្រះសីហនុនោះមក ហើយពួកគាត់ក៏ត្រូវជាសាច់ញាតិរបស់ប្អូនស្រី ឡេង មីងហួយ ផងដែរ។

លោកអភិបាលស្រុកបានបន្តទៀតថា អ្នកដែលធ្វើតេស្តរកឃើញមេរោគកូវីដ១៩ ទាំង៥នាក់នោះ រួមមាន៖

*ឈ្មោះ ឡេង រតនា (ត្រូវជាប្អូនប្រុសរបស់ ឡេង មីងហួយ) អាយុ៩ឆ្នាំ នៅផ្ទះជាមួយ ឡេង មីងហួយ ដែលមានសមាជិក ៤នាក់។

*ឈ្មោះ អៀ សឺ ភេទស្រី អាយុ៤៨ឆ្នាំ, ឈ្មោះ សៀ ថង ភេទស្រី អាយុ២០ឆ្នាំ និងឈ្មោះ ឈិន ដានីត ភេទស្រី អាយុ១៩ឆ្នាំ ខណៈអ្នកទាំងបីនាក់នេះ ជាសមាជិកគ្រួសាររស់នៅក្នុងផ្ទះតែមួយដែលមានសមាជិក ៩នាក់។

*ឈ្មោះ ម៉ែន ចាន់ថូ ភេទស្រី អាយុ១៦ឆ្នាំ រស់នៅក្នុងផ្ទះមួយផ្សេងទៀតដែលមានសមាជិក ៥នាក់។

បន្ទាប់ពីធ្វើតេស្តរកឃើញមេរោគកូវីដ១៩នេះហើយ ក្រោមការណែនាំរបស់លោក សុខ លូ អភិបាលខេត្តកំពង់ធំ, មន្ត្រីជំនាញសុខាភិបាលបានបញ្ជួនអ្នកជំងឺ ៥នាក់ រួមទាំងកូនតូចរបស់ពួកគាត់ចំនួន ២នាក់ទៀត (សរុបទាំងអស់ ៧នាក់) ទៅសម្រាកព្យាបាលនៅមន្ទីរពេទ្យបង្អែកបារាយណ៍-សន្ទុក ដែលមានទីតាំងស្ថិតនៅស្រុកបារាយណ៍ ខេត្តកំពង់ធំ។

លោកអភិបាលស្រុក ហាក់ ម៉ុងហួត បានបញ្ជាក់ថា ចំពោះអ្នកដែលធ្វើតេស្តគ្មានមេរោគកូវីដ១៩ ដែលនៅសល់ចំនួន ១៩នាក់ទៀតនោះ ត្រូវបានអាជ្ញាធរដាក់ឱ្យបន្តធ្វើចត្តាឡីស័ករយៈពេល ១៤ថ្ងៃឡើងវិញ នៅមណ្ឌលចត្តាឡីស័កសាលាបឋមសិក្សាគិរីអណ្ដែតដដែល។

បើតាមលោក ហាក់ ម៉ុងហួត ក្នុងនាមជាអាជ្ញាធរស្រុក លោកនៅតែបន្តទំនុកបម្រុងតាមតម្រូវការជាក់ស្ដែង ដល់ប្រជាពលរដ្ឋដែលបន្តធ្វើចត្តាឡីស័កទាំងនោះ ទាំងគ្រឿងឧបភោគបរិភោគ សម្ភារបរិក្ខារការពារអនាម័យ សម្ភារប្រើប្រាស់ជាដើម ដោយមិនឱ្យមានការខ្វះខាតបន្តិចណាឡើយ។

លោកក៏បានអំពាវនាវដល់អ្នកធ្វើចត្តាឡីស័ក ក៏ដូចជាប្រជាពលរដ្ឋទូទៅត្រូវបន្តចូលរួមអនុវត្តវិធានការ «៣ការពារ» និង «៣កុំ» ដែលណែនាំដោយសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ក៏ដូចជាវិធានអនាម័យរបស់ក្រសួងសុខាភិបាលឱ្យបានខ្ជាប់ខ្ជួន ដើម្បីឈានទៅកាត់ផ្ដាច់ព្រឹត្តិការណ៍សហគមន៍ ២០ កុម្ភៈ នៅក្នុងមូលដ្ឋានរបស់ខ្លួន៕