(វ៉ាស៊ីនតោន)៖ កងកម្លាំងប្រតិបត្តិការពិសេសអាមេរិក ដែលមានឈ្មោះថា Delta Force បានប្រកាសថា នឹងកំណត់ទីតាំងចាប់ខ្លួន ឬសម្លាប់មេដឹកនាំចលនាកំពូលៗរបស់ក្រុមសកម្មប្រយុទ្ធ ISIS នៅក្នុងប្រទេសអ៊ីរ៉ាក់ តែម្តងក្នុងប្រតិបត្តិការរបស់ខ្លួន ដែលបានចាប់ផ្តើមនៅដើមសប្តាហ៍នេះ។ នេះបើតាមការផ្សាយរបស់សារព័ត៌មាន CNN នៅថ្ងៃអង្គារ ទី០១ ខែមីនា ឆ្នាំ២០១៦។
នៅរយៈពេលពីរទៅបី សប្តាហ៍ចុងក្រោយនេះក្រុមប្រតិបត្តិការ Delta បានធ្វើការរៀបចំ និងត្រៀមតភ្ជាប់បណ្តាញរបស់ខ្លួនយ៉ាងមមាញឹក ដើម្បីបំពេញប្រតិបត្តិការជាមួយនឹងកម្លាំងពិសេសនៅអ៊ីរ៉ាក់ផ្ទាល់ ព្រមទាំងធ្វើការកំណត់ទីតាំង ដែលត្រូវដាក់ពង្រាយកម្លាំង ដើម្បីវាយប្រហារលើក្រុម ISIS ប្រកបដោយប្រសិទ្ធភាព។
យ៉ាងណាក៏ដោយ មន្ត្រីក្រសួងការពារជាតិនៅឯមន្ទីរបញ្ចកោណ ក្នុងរដ្ឋធានីវ៉ាស៊ីន មិនបានឆ្លើយលម្អិតទៅនឹង សំណួរដោយភ្នាក់ងារ CNN នោះឡើយ ប៉ុន្តែកាលពីថ្ងៃចន្ទ ដើមសប្តាហ៍នេះរដ្ឋមន្ត្រីការពារជាតិអាមេរិក លោក Ash Carter បានប្រកាសថា កងកម្លាំងពិសេសខាងលើនេះ បានចាប់ផ្តើមប្រតិបត្តិការរបស់ខ្លួនហើយ។ កងកម្លាំងខាងលើនេះ ក៏មានជំនាញខាង រំដោះចំណាប់ខ្មាំង និងអ្នកទោស ចេញពីពួក ISIS ប្រកបដោយសុវត្ថិភាពផងដែរ៕
