(ភ្នំពេញ)៖ នៅយប់ថ្ងៃទី២៩ ខែកុម្ភៈ ឆ្នាំ២០១៦ ប៉ូលិសដាក់ប៉ុស្តិ៍ត្រួតពិនិត្យគ្រឿងស្រវឹង ចំនួន៥ គោលដៅ នៅ ​រាជ​ធានីភ្នំពេញ និង២ទីតាំង នៅ​ជាយរាជធានីភ្នំពេញ ក្រៅពីនោះ ក៏មានការពង្រឹង នៅតាមបណ្តាខេត្តមួយចំនួនទៀត ដើម្បី​សុវ​ត្ថិភាពចរាចរណ៍ របស់បងប្អូនប្រជាពលរដ្ឋ ចាប់ពីម៉ោង៩យប់ដល់ម៉ោង៣ទៀបភ្លឺ។

លោកឧត្តមសេនីយ៍ផ្កាយ៣ រ៉ុន រ័ត្នវាសនា  នាយកដ្ឋាននគរបាល​ចរាចរណ៍ និងសណ្តាប់ធ្នាប់សាធារណៈ បាន​ថ្លែង​ប្រាប់អង្គភាពព័ត៌មាន Fresh News នៅព្រលប់នេះថាប៉ុស្តិ៍ត្រួតពិនិត្យ៥ ទីតាំងដែលស្ថិតនៅរាជធានីភ្នំពេញ មានដូចជា ខណ្ឌសែន សុខ ខណ្ឌ ចំការមន ខណ្ឌដូនពេញ ខណ្ឌ៧មករា ខណ្ឌជ្រោយចង្វារ ។ចំនែក នៅតំបន់ជាយក្រុង កម្លាំងសមត្ថកិច្ច នឹងត្រួតពិនិត្យ នៅតាមបណ្តោយផ្លូវជាតិលេខ ៤ និងផ្លូវជាតិលេខ៥។

ក្រៅពីនោះ កម្លាំងសមត្ថកិច្ច ក៏បានពង្រាយកម្លាំងបន្ថែម នៅតាមបណ្តាខេត្តមួយចំនួនផងដែរ ដោយដាក់ពង្រាយ តាមគោលដៅផ្សេងៗគ្នា ដើម្បីត្រួតពិនិត្យគ្រឿងស្រវឹង។ កងកម្លាំងសមត្ថកិច្ច សូមអំពាវ​នាវឲ្យ បងប្អូនប្រជាពលរដ្ឋ កុំបើកបរពេលស្រវឹង និងគោរព​ច្បាប់​ចរាចរណ៍ ទាំងអស់គ្នា ដើម្បីសុវត្ថិភាពជាចំបង៕