(ពោធិ៍សាត់)៖ លោក ម៉ៅ ធនិន អភិបាលខេត្តពោធិ៍សាត់ នាថ្ងៃទី៥ ខែមីនា ឆ្នាំ២០២១នេះ បាននិងកំពុងប្រើប្រាស់ និងបំពេញតួនាទីជាអ្នកបម្រើប្រជាពលរដ្ឋ ដោយខិតខំសម្របសម្រួល និងដោះស្រាយនូវរាល់ទំនាស់ ក៏ដូចជាបញ្ហាប្រឈម ចំនួន៦ករណីផ្សេងគ្នា ជូនបងប្អូនពុកម៉ែប្រជាពលរដ្ឋ នៅវេទិកាក្នុងសាលាខេត្ត។
កិច្ចសម្របសម្រួលដោះស្រាយ តាមរយៈវេទិកាសាធារណៈខាងលើនេះ បានការចូលរួមពីលោក ម៉ក់ រ៉ា ប្រធានក្រុមប្រឹក្សាខេត្តពោធិ៍សាត់, សមាជិកក្រុមប្រឹក្សាខេត្ត, លោកស្រីអភិបាលរងខេត្ត, លោក លោកស្រី ប្រធាន អនុប្រធានការិយាល័យប្រជាពលរដ្ឋ, អាជ្ញាធរស្រុក/ក្រុង ឃុំ/សង្កាត់, ក្រុមលេខាកត់ត្រា និងភាគីពាក់ព័ន្ធផ្សេងទៀត។
លោក ម៉ៅ ធនិន បានឱ្យដឹងថា នេះគឺជាទម្លាប់ដែលឯកឧត្តមតែងតែជួបជាមួយពុកម៉ែប្រជាពលរដ្ឋ ដើម្បីចូលរួមចំណែកជាមួយសុខទុក្ខដោយផ្ទាល់ តាមរយៈវេទិកាដោះស្រាយនាពេលនេះ។ ពីមុនលោកបានចូលរួមដោះស្រាយ បញ្ហាទាំងអស់នោះ ចំនួន២ដង ក្នុងមួយសប្តាហ៍ ក៏ប៉ុន្តែបច្ចុប្បន្ននេះ ដោយសារតែជម្លោះក៏ដូចជាបញ្ហាប្រឈម កាន់តែថយចុះលោកបានចូលរួមដោះស្រាយ តែ២ ឬ៣សប្តាហ៍ មួយ១ដងតែប៉ុណ្ណោះ។
អភិបាលខេត្ត បានគូសបញ្ជាក់ថា ដោយសារតែស្ថានភាពការរីករាលដាលជំងឺកូវីដ១៩ កំពុងតែដាក់សម្ពាធយ៉ាងធ្ងន់ធ្ងរ ជាពិសេសក្នុងអំឡុងព្រឹត្តការណ៍សហគមន៍ ២០កុម្ភៈនោះ ឯកឧត្តមបានសម្រេចជ្រើសរើសសំណុំរឿងណា ដែលចាំបាច់បំផុត ក្នុងជីវភាពរស់នៅប្រចាំថ្ងៃ ធ្វើការសម្របសម្រួល និងដោះស្រាយមុនគេ ជាក់ស្តែងនាថ្ងៃនេះផ្ទាល់តែម្តង គឺមានចំនួន៦ករណី ដែលកិច្ចការនេះ ត្រូវអនុវត្តន៍តាមការណែនាំរបស់ក្រសួងសុខាភិបាល។
លោក ម៉ៅ ធនិន បានបន្តថា យន្តការដែលកំពុងតែដើរនេះ គឺជាយន្តការរបស់រាជរដ្ឋាភិបាល តាមរយៈវេទិកាសាធារណៈ ដែលបានចង្អុលបង្ហាញឱ្យថ្នាក់ខេត្ត ថ្នាក់មូលដ្ឋាន ផ្សារភ្ជាប់សុខទុក្ខជាមួយប្រជាពលរដ្ឋដោយផ្ទាល់ ទៅលើបញ្ហាប្រឈម និងតម្រូវការក្នុងជីវភាព រស់នៅប្រចាំថ្ងៃ។
ជានិច្ចជាកាលលោកតែងតែប្រើប្រាស់ឋានានុក្រម២ រួមមាន៖
*ទី១៖ ក្នុងនាមជាអភិបាលខេត្ត សម្រាប់សម្របសម្រួលដោះស្រាយបញ្ហា ប្រឈមជូនពុកម៉ែប្រជាពលរដ្ឋទៅលើផ្លូវច្បាប់
*ទី២៖ ក្នុងឋានៈជាគ្រួសារ មានតួនាទីជាបង ជាប្អូន ជាកូន ជាក្មួយ និងជាចៅមួយ ក្នុងគ្រួសារប្រជាពលរដ្ឋ ជាង៥០ម៉ឺននាក់ទូទាំងខេត្ត ដើម្បីចូលរួមសុខរួមទុក្ខជាមួយពួកគាត់គ្រប់ពេលវេលា។
ខាងក្រោមនេះ គឺជាការលើកឡើងរបស់ប្រជាពលរដ្ឋ ដែលទទួលបានការសម្របសម្រួល និងដោះស្រាយដ៏មានប្រសិទ្ធភាព ពីសំណាក់លោក ម៉ៅ ធនិន អភិបាលនៃគណៈអភិបាលខេត្តពោធិ៍សាត់៖
