(ភ្នំពេញ)៖ សាលាភូមិន្ទរដ្ឋបាល និងវិទ្យាស្ថានស្រាវជ្រាវកូរ៉េ នៃសាកលវិទ្យាល័យ New southwale ប្រទេសអូស្ត្រាលី នៅព្រឹកថ្ងៃទី២៥ ខែកុម្ភៈ ឆ្នាំ២០២១ បានរួមគ្នារៀបចំសន្និសីទកំណែទម្រង់គោលនយោបាយអន្តរជាតិ សម្រាប់ឆ្នាំ២០២១ ក្រោមប្រធានបទស្តីពី «សមត្ថភាពរដ្ឋសម្រាប់ការអភិវឌ្ឍជាតិក្នុងស្ថានភាពក្រោយកូវីដ១៩, ឱកាស និងបញ្ហាប្រឈមសម្រាប់កិច្ចសហប្រតិបត្តិការរវាងកូរ៉េ-អាស៊ាន»។
សន្និសីទនេះ បានធ្វើឡើងក្រោមអធិបតីភាព លោក យក់ ប៊ុនណា រដ្ឋលេខាធិការប្រចាំការនៃក្រសួងមុខងារសាធារណៈ លោក Seung-Ho Kwon នាយកវិទ្យាស្ថានស្រាវជ្រាវកូរ៉េ លោក Geun Lee ប្រធានមូលនិធិកូរ៉េ សាស្ត្រាចារ្យ វាគ្មិន និងសិក្ខាកាមមកពីប្រទេសអូស្ត្រាលី កូរ៉េ ប្រទេសជាសមាជិកអាស៊ាន ព្រមទាំងថ្នាក់ដឹកនាំ មន្ត្រីរាជការនៃសាលាភូមិន្ទរដ្ឋបាលសរុបប្រមាណ៧០០នាក់ តាមរយៈប្រព័ន្ធអនឡាញ ដើម្បីរក្សាគម្លាតសុវត្ថិភាព ក្នុងអំឡុងពេលនៃជំងឺកូវីដ១៩។
គោលបំណងសំខាន់នៃការរៀបចំសន្និសីទនេះ គឺផ្តោតលើ៖ (១) ពិភាក្សា និងស្វែងយល់អំពីវិធីសាស្ត្រដែលរដ្ឋាភិបាលនៃបណ្តាប្រទេសសមាជិកអាស៊ាន និងប្រទេសកូរ៉េ ក្នុងការឆ្លើយតបនិងការរីករាលដាលនៃជំងឺកូវីដ១៩, (២) ស្វែងរកបញ្ហាប្រឈម និងឱកាសសម្រាប់អភិវឌ្ឍប្រទេសជាតិក្នុងស្ថានភាពក្រោយវិបត្តិកូវីដ១៩, និង (៣) បន្តពង្រឹងកិច្ចសហប្រតិបត្តិការខាងសេដ្ឋកិច្ច និងនយោបាយរវាងបណ្តាប្រទេសសមាជិកអាស៊ាន ក៏ដូចជាកូរ៉េសម្រាប់ជម្រុញកំណើនសេដ្ឋកិច្ចទៅវិញទៅមក។
លោក យក់ ប៊ុនណា បានលើកឡើងថា ក្នុងការដោះស្រាយជំងឺរាតត្បាតសកលបែបនេះ ការប្រឹងប្រែង និងជោគជ័យរបស់ប្រទេសនីមួយៗគឺមិនគ្រប់គ្រាន់ទេ ដែលទាមទារឱ្យមានកិច្ចសហប្រតិបត្តិការក្នុងកម្រិតខ្ពស់ដើម្បីទប់ទល់នឹងការរីករាលដាលនៃមេរោគ និងជួយឱ្យពិភពលោកងើបឡើងវិញ។
លោកបានបញ្ចាក់បន្តថា ហេតុដូច្នេះសន្និសីទថ្ងៃនេះត្រូវបានជឿជាក់ថា មិនត្រឹមតែផ្តល់កន្លែងសម្រាប់ការរៀនសូត្រ និងចែករំលែកបទពិសោធន៍និងបទពិសោធន៍ល្អ ៗ ក្នុងចំណោមវាគ្មិននិងប្រតិភូដ៏ល្បីរបស់យើងប៉ុណ្ណោះទេ ប៉ុន្តែថែមទាំងដើម្បីបង្កើតឱកាសសម្រាប់កិច្ចសហប្រតិបត្តិការនាពេលអនាគតរវាងកូរ៉េ និងអាស៊ានក្នុងស្ថានភាពក្រោយ-Covid-19 តាមរយៈថ្មី របៀបរស់នៅធម្មតាដើម្បីទ្រទ្រង់កំណើនទៅវិញទៅមកក៏ដូចជាកសាងសមត្ថភាពរបស់រដ្ឋយើងឱ្យកាន់តែមានភាពធន់ នឹងជំងឺរាតត្បាតជាសកលដើម្បីជាប្រយោជន៍ដល់ការអភិវឌ្ឍជាតិ។
សូមបញ្ចាក់ថា សន្និសីទអន្តរជាតិក្រោមកិច្ចសហប្រតិបត្តិការរវាងវិទ្យាស្ថានស្រាវជ្រាវកូរ៉េ និងសាលាភូមិន្ទរដ្ឋបាលនេះ បានរៀបចំជាលើកទី២ហើយ ដោយកាលពីលើកទី១នៅទីក្រុងភ្នំពេញ ពីថ្ងៃទី៤-៦ ខែធ្នូ ឆ្នាំ២០១៩ ប្រកបដោយជោគជ័យ និងមានអ្នកចូលរួមផ្ទាល់សរុបប្រមាណ២០០នាក់ ដែលជាមន្ត្រីជាន់ខ្ពស់ និងអ្នកស្រាវជ្រាវមកពីប្រទេសអូស្ត្រាលី កូរ៉េ និងប្រទេសសមាជិកអាស៊ាន៕
