(ភ្នំពេញ)៖ កូនបំណុលក្នុងសំណុំរឿងរដ្ឋប្បវេណី បានចោទប្រកាន់លោក ហ្គូវ ឆេងលុយ ជាម្ចាស់បំណុល និងអាជ្ញាធរខណ្ឌសែនសុខ កំពុងបំពានសេចក្ដីសម្រេចរបស់តុលាការកំពូល។ កូនបំណុលស្នើឲ្យសមត្ថកិច្ចពាក់ព័ន្ធ និងអង្គភាពប្រឆាំងអំពើពុករលួយ ស៊ើបអង្កេតករណីនេះ ព្រោះអាចជាប់ពាក់ព័ន្ធនឹងអំពើពុករលួយ ។
តុលាការកំពូល កាលពីចុងឆ្នាំ២០១៤ កន្លងទៅ បានសម្រេច «ទុកដីទំនាស់ទំហំ AB=CD= ១១,៥ម , AD=CD=១១,៥ម នៃភូមិសេប៉េសេ សង្កាត់ទឹកថ្លា ខណ្ឌសែនសុខ សម្រាប់ប្រជាជន១៣គ្រួសារ និង ប្រជាពលរដ្ឋផ្សេងទៀត ប្រើប្រាស់ជាសមូហភាព» ។ ប៉ុន្តែការសម្រេចនេះ ត្រូវបាន លោក ប៉ែន ប៊ុនអេង ជាកូនបំណុល ដាក់ពាក្យបណ្ដឹងសុំជំនុំជម្រះសាជាថ្មី ហើយត្រូវបានតុលាការកំពូល បោះត្រាទទួលនៅថ្ងៃទី៦ ខែកក្កដា ឆ្នាំ២០១៥ ដែលបច្ចុប្បន្នសំណុំរឿងនេះពុំទាន់បញ្ចប់នៅឡើយទេ ពោលគឺកំពុងស្ថិតក្នុងចំណាត់ការរបស់តុលាការកំពូល។
ពាក់ព័ន្ធករណីនេះ លោក ប៉ែន ប៊ុនអេង អាយុ៤២ឆ្នាំ មានទីលំនៅផ្ទុះលេខ១៦៧ ផ្លូវលំ ភូមិសេប៉េសេ សង្កាត់ទឹកថ្លា ខណ្ឌសែនសុខ បាននិយាយថា នៅចន្លោះពេលដែលតុលាការកំពូល ពុំទាន់កំណត់ថ្ងៃបើកសវនាការសាជាថ្មីផង ស្រាប់តែលោក លី សាវេត អភិបាលខណ្ឌសែនសុខ បានចេញសេចក្តីជូនដំណឹងមួយ ចុះថ្ងៃទី១៨ ខែកុម្ភៈ ឆ្នាំ២០១៦ អញ្ជើញឈ្មោះ ហ្គូវ ឆេងលុយ និង ភាគីពាក់ព័ន្ធឲ្យចូលខ្លួន នៅព្រឹកថ្ងៃទី២ ខែមីនា ឆ្នាំ២០១៦ខាងមុខនេះ ដើម្បីបំពេញបែបបទតាមនីតិវិធីនៃការចុះបញ្ជីដីធ្លីជាធរមាន ។
ត្រង់ចំណុចនេះ ត្រូវបាន លោក ប៉ែន ប៊ុនអេង ចាត់ទុកថា មិនត្រឹមត្រូវនោះទេ ព្រោះរឿងក្ដីនេះកំពុងស្ថិតក្នុងចំណាត់ការរបស់តុលាការកំពូល ។ លោកសង្ស័យថា ការប្រញាប់ប្រញាល់ ចុះបញ្ជីដីធ្លីជូនឈ្មោះ ហ្គូវ ឆេងលុយ អាចពាក់ព័ន្ធអំពើពុករលួយ ។ លោកក៏បានស្នើឲ្យអាជ្ញាធរផ្អាកការចុះបញ្ជីដីធ្លីសិន រង់ចាំតុលាការកំពូលសម្រេចជាថ្មី និង ផ្ដល់យុត្តិធម៌ដល់រូបលោក កុំឲ្យជនខិលខូចមួយចំនួនបំពានច្បាប់ទាំងទទឹងទិសបែបនេះ ។
គួររំលឹកថា មនុស្សចំនួនដែលជាប់ពាក់ព័ន្ធនឹងរឿងក្ដីនេះ រួមទាំងឈ្មោះ ហ្គូវ ឆេងលុយ ផង ធ្លាប់ត្រូវបានតុលាការកំពូលសម្រេចជាស្ថាពរ ផ្តន្ទាទោស១ឆ្នាំតែទោសនេះ ត្រូវព្យួរ ពីបទបំផ្លិចបំផ្លាញរបងស័ង្កសីរបស់លោក ប៉ែន ប៊ុនអេង៕
