(បន្ទាយមានជ័យ)៖ ឧបនាយករដ្ឋមន្ដ្រី កែ គឹមយ៉ាន សមាជិកគណៈអចិន្ត្រៃយ៍ គណៈកម្មាធិការកណ្ដាលគណបក្សប្រជាជនកម្ពុជា និងជាប្រធានក្រុមការងារ គណបក្សចុះមូលដ្ឋានខេត្តបន្ទាយមានជ័យ នៅព្រឹកថ្ងៃទី២០ ខែកុម្ភៈ ឆ្នាំ២០២១នេះ បានដឹកនាំក្រុមការងារទាំងនៅថ្នាក់ជាតិ ថ្នាក់ក្រោមជាតិ និងថ្នាក់មូលដ្ឋាន ខេត្តបន្ទាយមានជ័យ ប្រជុំផ្សព្វផ្សាយរបាយការណ៍គណៈកម្មាធិការកណ្តាល ស្តីពីសភាពការណ៍ទូទៅការងារគណបក្សឆ្នាំ២០២០ និងទិសដៅឆ្នាំ២០២១។
ឧបនាយករដ្ឋមន្ដ្រី កែ គឹមយ៉ាន បានសម្តែងនូវការនឹករលឹក និងនាំការផ្ដាំផ្ញើសួរសុខទុក្ខ និងជូនពរជ័យ ពីសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា, សម្ដេចពញាចក្រី ហេង សំរិន ប្រធានកិត្តិយសគណបក្ស, សម្ដេចក្រឡាហោម ស ខេង អនុប្រធានគណបក្ស, សម្ដេចវិបុលសេនាភក្ដី សាយ ឈុំ អនុប្រធានគណបក្ស ជូនចំពោះសមាជិក សមាជិកាគណបក្ស ជនរួមជាតិក្នុងខេត្តបន្ទាយមានជ័យទាំងអស់។
ក្នុងឱកាសនោះ ឧបនាយករដ្ឋមន្ដ្រី កែ គឹមយ៉ាន បានវាយតម្លៃខ្ពស់ចំពោះសមិទ្ធផលដែលគណបក្សបានទទួល នៅក្នុងកាលៈទេសៈដែលពិភពលោកទាំងមូល និងកម្ពុជា កំពុងប្រឈមនឹងការរីករាលដាល នៃជំងឺកូវីដ-១៩ ហើយក៏មិនភ្លេចសម្ដែងនូវការកោតសរសើរ និងវាយតម្លៃខ្ពស់ចំពោះគណបក្សគ្រប់ថ្នាក់ អាជ្ញាធរ ដែនដីសមត្ថកិច្ចគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ និងប្រជាជនខេត្តបន្ទាយមានជ័យទាំងមូល ដែលបានរួមចំណែកយ៉ាងធំធេង ក្នុងកិច្ចការពង្រឹងខឿនការ ពារជាតិ ការពារឯករាជ្យ អធិបតេយ្យ បូរណភាពទឹកដី នៃមាតុភូមិរក្សាបានស្ថិរភាពនយោបាយ សន្តិសុខ សណ្ដាប់ធ្នាប់សង្គម ទប់ស្តាត់បាននូវការឆ្លងរាលដាលនៃជំងឺកូវីដ-១៩, បញ្ហាគ្រឿងញៀនក្នុងសហគមន៍, ដោះស្រាយបានបញ្ហាគ្រោះទឹកជំនន់ទប់ស្កាត់បានរាល់ការ ប៉ុនប៉ងធ្វើបដិវត្តន៍ពណ៌ និងផ្ដួលរំលំរាជរដ្ឋាភិបាលស្របច្បាប់ពីពួកប្រឆាំង និងមជ្ឈដ្ឋានអគតិនានា ហើយជំរុញបានការអភិវឌ្ឍសេដ្ឋកិច្ចសង្គមមួយ ដែលធននឹងវិបត្តិដែលបណ្តាលមកពីជំងឺកូវីដ-១៩។
ឧបនាយករដ្ឋមន្ដ្រី កែ គឹមយ៉ាន បានថ្លែងអំណរគុណ ចំពោះសមាជិក សមាជិកាគណបក្ស និងប្រជាពលរដ្ឋទូទាំង ក្នុងខេត្តបន្ទាយមានជ័យ ដែលតែងតែផ្ដល់យុតិ្តធម៌ ផ្ដល់ជំនឿ និងផ្ដល់ការគាំទ្រយ៉ាងធំធេង ចំពោះការដឹកនាំរបស់គណបក្សប្រជាជនកម្ពុជា នៅគ្រប់កាលៈទេសៈ និងសូមគោរពដឹងគុណ ចំពោះកម្មាភិបាលយុទ្ធជន យុទ្ធនារី អ្នកស្នេហាជាតិគ្រប់ជំនាន់ ដែលបានប្រយុទ្ធតស៊ូធ្វើពលិកម្មយ៉ាងអង់អាចក្លាហានបំផុត ដើម្បីឯករាជ្យ សន្តិភាព សេរីភាព អធិបតេយ្យភាព បូរណភាព ទឹកដី និងវឌ្ឍនភាពនៃមាតុភូមិកម្ពុជា៕
