(ភ្នំពេញ)៖ កម្លាំងរាជអាវុធហត្ថខណ្ឌពោធិ៍សែនជ័យ បានបញ្ជាក់ឲ្យដឹងថា នៅម៉ោង៧៖៤០នាទីយប់ ថ្ងៃទី១១ ខែកុម្ភៈ ឆ្នាំ២០២១ នៅចំណុចមុខហាងលក់ទូរសព្ទ័ពន្លកថ្មី ក្នុងបុរីប៊ុនហួរ ភូមិព្រៃព្រីងខាងត្បូង១ សង្កាត់ចោមចៅ២ ខណ្ឌពោធិ៍សែនជ័យ មានករណីឃាតកម្ម (បាញ់សម្លាប់)បង្កឡើងដោយជនសង្ស័យ មិនស្គាល់អត្តសញ្ញាណមួយក្រុម។

ករណីបាញ់ប្រហារនេះ បណ្តាលឲ្យជនរងគ្រោះ២នាក់បានស្លាប់ និងម្នាក់ទៀតរងរបួសធ្ងន់កំពុងសង្គ្រោះបន្ទាន់នៅមន្ទីរពេទ្យរុស្ស៊ី។ ជនរងគ្រោះដែលស្លាប់មានឈ្មោះ សៀក លីម ភេទប្រុស អាយុ២៥ឆ្នាំ (ស្លាប់នៅពេទ្យលោកសង្ឃ) និងឈ្មោះ សុខ ស៉ីដេត ភេទប្រុស អាយុ៤០ឆ្នាំ (ស្លាប់នៅពេទ្យ លោកសង្ឃ)។ ចំណែកឈ្មោះ បូ រ៉ាភី ភេទប្រុស អាយុ៤៦ឆ្នាំ របួសធ្ងន់កំពុងសង្គ្រោះបន្ទាន់ នៅមន្ទីរពេទ្យរុស្ស៉ី។

អាវុធហត្ថខណ្ឌពោធិ៍សែនជ័យ បានបញ្ជាក់ថា តាមការបំភ្លឺរបស់ឈ្មោះ ឈីវ ហៃ ភេទស្រីអាយុ៣២ឆ្នាំ មុខរបរលក់ផ្លែឈើបានឲ្យដឹងថា នៅមុនពេលកើតហេតុ ប្តីរបស់គាត់ឈ្មោះ អាត់ ផា អាយុ៣៣ឆ្នាំ បានបើករថយន្តមកឈប់មុខផ្ទះបំណងយកកូនទៅពេទ្យ លុះឈប់បានបន្តិចក៏មានម៉ូតូកង់បីមួយគ្រឿង ពណ៌ស បើកមកទល់មុខឡាន ហើយស៉ីផ្លេពីរបីដងឲ្យប្តីគាត់ បើកឡានគេចចេញ ហើយប្តីគាត់បាននិយាយថា គាត់អែបខាងហើយ បងឯងបើកគេចទៅខាងណោះទៅ បន្ទាប់មកក៏មានទំនាស់គ្នា រួចក៏បែកគ្នាទៅ។

មួយសន្ទុះក្រោយមកជនបង្កបានបើកកង់បីត្រឡប់មកវិញ ដោយមានបក្ខពួកមកជាមួយផងរួមនឹងម៉ូតូ២គ្រឿង (មិនដឹងចំនួនមនុស្ស) បានបង្កទំនាស់ម្តងទៀតរហូតដល់មានការប្រតាយប្រតប់គ្នា ឈានដល់ការបាញ់ប្រហារគ្នាតែម្តង ដោយឡែកប្តីរបស់គាត់បានគេចចេញពីកន្លែងកើតហេតុ។

គួរជម្រាបថា ករណីនេះអ្នកមានទំនាស់ដំបូងជាមួយក្រុមខ្មាន់កាំភ្លើង រងរបួសបន្ដិចបន្តួចប៉ុណ្ណោះ ព្រោះបានគេចចេញពេលកំពុងប្រតាយប្រតប់គ្នា ខណៈអ្នកជនរងគ្រោះដែលស្លាប់២នាក់ និងរបួសធ្ងន់ម្នាក់នោះ ជាមិត្តភ័ក្ររបស់ជនរងគ្រោះ ដែលនៅជួបជុំគ្នានៅកន្លែងកើតហេតុ។

មន្ត្រីអាវុធហត្ថបន្តថា នៅកន្លែងកើតហេតុបន្សល់ទុក សំបកគ្រាប់កាំភ្លើងប្រភេទ៩មីលីម៉ែត្រចំនួន២គ្រាប់ (នគរបាលរក្សារទុក)។ បច្ចុប្បន្នកម្លាំងជំនាញកំពុងស្រាវជ្រាវ កំណត់មុខសញ្ញាជនសង្ស័យ៕