(កំពង់ចាម)៖ ប្រធានសាខាកាកបាទក្រហមកម្ពុជាខេត្តកំពង់ចាម លោក អ៊ុន ចាន់ដា នៅព្រឹកថ្ងៃទី៨ ខែកុម្ភៈ ឆ្នាំ២០២១ បានដឹកនាំក្រុមការងារចុះសំណេះសំណាល និងអំណោយមនុស្សធម៌របស់សាខាកាកបាទក្រហមខេត្ត ចែកជូនប្រជាពលរដ្ឋខ្វះខាតជីវភាពចំនួន ៩៨គ្រួសារ មកពីភូមិបឹងបាសាក់ ៤៥គ្រួសារ ភូមិកំពង់រលីង ១៥គ្រួសារ និងភូមិតាណេង ៣៨គ្រួសារ ដែលពិធីនេះធ្វើឡើងនៅក្នុងបរិវេណវត្តបឹងបាសាក់ សង្កាត់សំបួរមាស ក្រុងកំពង់ចាម។

ស្ថិតក្នុងឱកាសនោះ លោក អ៊ុន ចាន់ដា បានផ្ដាំផ្ញើសួរសុខទុក្ខពីសំណាក់លោក ហ៊ុន ណេង ប្រធានកិត្តិយសសាខាជាពិសេស ពីសំណាក់សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់បងប្អូន ទាំងអស់ ដោយក្តីនឹករលឹកបំផុត ដែលជានិច្ចកាល សម្ដេចប្រធានតែងតែបារម្ភគិតគូរ ចំពោះសុខទុក្ខប្រជាពលរដ្ឋគ្រប់រូប ដោយមិនរើសអើង មិនប្រកាន់វណ្ណៈ ឬនិន្នាការនយោបាយអ្វីឡើយ ហើយតែងបានចាត់តំណាង ឲ្យចុះអន្តរាគមន៍ដោះស្រាយ ផ្តល់អំណោយមនុស្សធម៌ ជួយសម្រាលទុក្ខលំបាក ជូនជនរងគ្រោះ និងងាយរងគ្រោះ បានទាន់ពេលវេលា ស្របតាមទិសស្លោក «កាកបាទក្រហមកម្ពុជា មាននៅគ្រប់ទីកន្លែង សម្រាប់យើងគ្រប់ៗគ្នា ដោយមិនទុកនរណាម្នាក់ចោល»។

ជាមួយគ្នានេះ ប្រធានគណៈកម្មាធិការសាខា បានអំពាវនាវដល់បងប្អូនប្រជាពលរដ្ឋទាំងអស់ សូមបន្តការប្រុងប្រយ័ត្នអោយកាន់តែខ្ពស់ថែមទៀត ក្នុងការទប់ស្កាត់ការឆ្លងរាលដាលនៃជម្ងឺកូវិដ១៩ តាមរយៈ នៃការថែទាំសុខភាព សុវត្ថិភាពផ្ទាល់ខ្លួន ដោយផ្តើមពីយើងម្នាក់ៗ ហើយកត្តាដែលសំខាន់នោះ គឺត្រូវរស់នៅធម្មតា តាមបែបគន្លងថ្មី ត្រូវប្រកាន់ខ្ជាប់នូវអនាម័យ រស់នៅស្អាត ហូបស្អាត ផឹកស្អាត, បរិភោគអាហារដែលចម្អិនឆ្អិនល្អ ជាពិសេស ត្រូវអនុវត្តឲ្យបានខ្ជាប់ខ្ជួន តាមអនុសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន នូវយុទ្ធសាស្ត្រ «៣ការពារ និង ៣កុំ» រួមជាមួយវិធានការនានាតាមសារអប់រំរបស់ក្រសួងសុខាភិបាល ដើម្បីបង្ការទប់ស្កាត់ កុំឲ្យជំងឺកូវីដ១៩ ដ៏កាចសាហាវមួយនេះ ឆ្លងចូលក្នុងសហគមន៍របស់យើង។

សូមបញ្ជាក់ថា អំណោយមនុស្សធម៌ ដែលផ្តល់ជូនប្រជាពលរដ្ឋងាយរងគ្រោះទាំង ៩៨គ្រួសារ, ក្នុង ១គ្រួសារ ទទួលបាន៖ អង្ករ ២៥ គ.ក្រាម, ទឹកត្រី ១យួរ, មីយើង ១កេស, ទឹកស៊ីអ៊ីវ ១យួរ, ត្រីខ ១០កំប៉ុង, ឃីត ១កញ្ចប់, អាវយឺត២ និងថវិកា ២០,០០០រៀល៕