(តាកែវ)៖ ខណៈដែលសពលោក ឃុន ណូ កំពុងធ្វើបុណ្យតាមប្រពៃណី នៅឃុំត្រាំកក់ ស្រុកត្រាំកក់ ខេត្តតាកែវ, នៅរសៀលថ្ងៃទី២៤ ខែកុម្ភៈនេះ លោក ឃឹម ជា ឳពុកក្មេកសពលោក ឃុន ណូ បានថ្លែងប្រាប់ឲ្យដឹងថា សពកូនរបស់គាត់​មិនត្រូវបានអនុញាត​ឲ្យបើកមើលមុខនោះទេ ព្រោះខ្លាចឆ្លង ដោយនេះជាការហាម​ឃាត់ដោយមន្រ្តីក្រសួងសុខាភិបាល។

ក្រៅពីការហាមឃាត់បើកមើលមុខកូន, លោក ឃឹម ជា បានឲ្យដឹងទៀតថា នៅក្នុងរយៈពេល៤ថ្ងៃ​នៃការព្យាបាលជំងឺ ចាប់ពីថ្ងៃទី២០ ដល់ថ្ងៃទី២៤នេះ ក្រុមគ្រួសាររបស់លោក បានចំណាយលុយជាង​៣០០០ដុល្លារ ដោយក្នុងនោះលោកបានខ្ចីបុលគេខ្លះទៀតផង។ លោកបានបញ្ជាក់ថា ដោយថ្ងៃខ្លះចំណាយ៤០០ដុល្លារ ថ្ងៃខ្លះចំណាយ៣០០ដុល្លារ មិនមានការបន្ធូរបន្ថយនោះទេ បើទោះបីជា​ប្រភេទ​ជំងឺ​ដ៏កម្រ ជំងឺផ្តាសាយជ្រូកនេះក៏ដោយ ក៏មន្ទីរពេទ្យនៅតែយកតម្លៃពេញដដែល។

ឱពុកក្មេកសពលោក ឃុន ណូ បានរៀបរាប់ថា នៅថ្ងៃដំបូងចូលព្យាបាលនៅមន្ទីរពេទ្យរុស្ស៊ី មានការយកចិត្តទុកដាក់ សូម្បីមន្រ្តីអង្គការសង្គមស៊ីវិលមួយចំនួន ក៏បានចុះទៅពិនិត្យមើលស្ថានភាពជំងឺ និងជ្រោមជ្រោងផងដែរ។ នៅយប់ថ្ងៃទី២២-២៣ ស្ថានភាពជំងឺមានសភាពធម្មតា កំដៅធម្មតា​ ប៉ុន្តែចូលដល់ព្រឹកថ្ងៃទី២៤ បែរជាធ្លាក់ធ្ងន់ភ្លាមៗរហូតដល់ស្លាប់តែម្តង។

សូមជំរាបថា លោក ឃុន ណូ អ្នកបញ្ជាកាមេរ៉ាថតពីលើអាកាស (Drone) របស់​ស្ថានីយ៍ទូរទស្សន៍ CNC-CTN-My TV ដែលបានទទួលមរណភាពក្នុងវ័យ២៩ឆ្នាំ នៅវេលាម៉ោងប្រមាណ ៤៖០០នាទី ទៀបភ្លឺ ថ្ងៃទី២៤ ខែកុម្ភៈ ឆ្នាំ២០១៦ ដោយរោគាពាធ។ លោក ឃុន ណូ គឺជាអ្នកសារព័ត៌មានកម្ពុជា ដ៏មានស្នាដៃមួយរូប ហើយបានចូលរួមចំណែក​យ៉ាង​សំខាន់ ​នៅក្នុងការ​លើកកម្ពស់​សេរីភាព​សារព័ត៌មាន និង​លទ្ធិប្រជាធិបតេយ្យ​នៅកម្ពុជា។

សូមជំរាបថា សព លោក ឃុន ណូ ត្រូវបានតំកល់ទុកធ្វើបុណ្យតាមប្រពៃណី នៅគេហដ្ឋាននៃសព ក្នុងភូមិកល់គម ឃុំត្រាំកក់ ស្រុកត្រាំកក់ ខេត្តតាកែវ (ជិតផ្សាត្រាំកក់) ។ សពនឹងត្រូវបូជា វេលាម៉ោង​ ៨៖០០នាទីយប់ ថ្ងៃទី២៤ ខែកុម្ភៈ ឆ្នាំ២០១៦៕