(នេប៉ាល់)៖ យោងតាមសារព័ត៌មាននេប៉ាល់ថាម ចេញផ្សាយនៅមុននេះបន្ដិចបានឲ្យដឹងថា មនុស្ស​នៅលើយន្តហោះ Tara Air ទាំងអស់ ត្រូវបានស្លាប់ បន្ទាប់ពីយន្តហោះបានធ្លាក់នៅក្នុងស្រុក មីយ៉ាកឌី (Myagdi) ភាគកណ្តាលប្រទេសនេប៉ាល់។

សារព័ត៌មានក្នុងស្រុកនេប៉ាល់ថាម បានបញ្ជាក់ថា មនុស្ស ២៣នាក់ ក្នុងនោះមានសហនាវិក និងអ្នកបើកបរយន្តហោះ ត្រូវបានគេរាយការណ៍មកថា បានស្លាប់នៅក្នុងគ្រោះថ្នាក់ធ្លាក់យន្តហោះខ្នាត់តូច ដែលបាន​បាត់ដាន​ពី​ប្រព័ន្ធតារា នៅព្រឹកថ្ងៃនេះ។

នៅលើយន្តហោះនោះ មានមនុស្ស ជិះសរុប២៣នាក់ ក្នុងនោះបីនាក់ជាពីឡុត និងអ្នកបម្រើការងារ, ជនជាតិចិនម្នាក់, អាមេរិកម្នាក់, និង ១៨នាក់ទៀតជាជនជាតិនេប៉ាល់។

គួរបញ្ជាក់ផងដែរថា នៅវេលាម៉ោង ៧៖០៥នាទី ព្រឹកថ្ងៃទី២៤ ខែកុម្ភៈនេះ ប៉ូលិសនេប៉ាល់ បានរាយការណ៍ឲ្យដឹងទៀតថា យន្តហោះខ្នាតតូចរបស់អាកាសចរណ៍ តារា (Tara) ទំនងជាបាន ធ្លាក់បាត់ទៅហើយ ព្រោះប្រជាពលរដ្ឋនៅក្នុងតំបន់ រ៉ូបស៍ (Rupse) របស់ស្រុក មីយ៉ាកឌី ដែលមានចម្ងាយ ៣០០ គីឡូម៉ែត្រពីរដ្ឋធានីកាត្មាន់ឌូ (Kathmandu) នោះ បានរាយការណ៍ពីករណីអគ្គីភ័យ ដែលកំពុងឆាបឆេះ នៅក្នុងព្រៃមួយតំបន់នោះ៕