(ភ្នំពេញ)៖ ក្នុងកិច្ចប្រជុំរដ្ឋមន្រ្តីទេសចរណ៍អាស៊ានលើកទី២៤ ដែលធ្វើឡើងនាព្រឹកថ្ងៃទី០៤ ខែកុម្ភៈ ឆ្នាំ២០២១នេះ ប្រទេសសមាជិកអាស៊ានបានបង្ហាញការគាំទ្រជាថ្មីឲ្យកម្ពុជារៀបចំវេទិកាទេសចរណ៍អាស៊ាន ឆ្នាំ២០២២ (ATF2022) កិច្ចប្រជុំរដ្ឋមន្រ្តីទេសចរណ៍អាស៊ាន និងកិច្ចប្រជុំពាក់ព័ន្ធបន្តទៀតនៅឆ្នាំ២០២២។
កិច្ចប្រជុំរដ្ឋមន្រ្តីទេសចរណ៍អាស៊ានលើកទី២៤ ដែលធ្វើឡើងនៅថ្ងៃនេះ ត្រូវបានដឹកនាំដោយលោក ថោង ខុន រដ្ឋមន្រ្តីក្រសួងទេសចរណ៍កម្ពុជា។
រដ្ឋមន្រ្តីទេសចរណ៍ នៃប្រទេសសមាជិកអាស៊ានទាំងអស់ បានបង្ហាញពីការអបអរសាទរកម្ពុជា ដែលជាប្រធាននៃកិច្ចប្រជុំរដ្ឋមន្រ្តីទេសចរណ៍អាស៊ានលើកទី២៤នេះ និងកិច្ចប្រជុំពាក់ព័ន្ធមួយចំនួនទៀត តាមរយៈប្រព័ន្ធវីដេអូ ទោះបីស្ថិតនៅក្នុងអំឡុងពេលនៃវិបត្តិជំងឺកូវីដ-១៩ យ៉ាងណាក្តី។
រដ្ឋមន្រ្តីទេសចរណ៍អាស៊ាន បានបង្ហាញនូវកង្វល់អំពីផលប៉ះពាល់នៃវិបត្តិជំងឺកូវីដ១៩ លើវិស័យទេសចរណ៍ វិស័យការងារ ពិសេសគឺវិស័យសេដ្ឋកិច្ច។
បន្ថែមពីនេះទៀត រដ្ឋមន្រ្តីទេសចរណ៍អាស៊ានក៏បានបង្ហាញពីការសោកស្តាយយ៉ាងខ្លាំង ចំពោះការធ្លាក់ចុះនៃចំនួនភ្ញៀវទេសចរអន្តរជាតិមកកាន់តំបន់អាស៊ាន ដោយនៅក្នុងឆ្នាំ២០២០ ចំនួនទេសចរអន្តរជាតិធ្វើដំណើរមកកាន់អាស៊ានមានត្រឹមប្រមាណ ២៦ លាននាក់ប៉ុណ្ណោះ ធា្លក់ចុះ ៨០.៥%។
ជាការឆ្លើយតប នាកិច្ចប្រជុំដ៏មានសារៈសំខាន់នេះ រដ្ឋមន្រ្តីទេសចរណ៍អាស៊ានទាំងអស់បានឯកភាពគ្នាអនុម័ត លើសកម្មភាពការងាររស្តារវិស័យទេសចរណ៍អាស៊ានឡើងវិញ ក្នុងផែនការយុទ្ធសាស្រ្តទេសចរណ៍អាស៊ាន ២០១៦-២០២៥ (ATSP 2016-2025) ដំណាក់កាលទី២។
គួរបញ្ជាក់ថា កិច្ចប្រជុំរដ្ឋមន្រ្តីទេសចរណ៍អាស៊ានលើកទី២៤ និងកិច្ចប្រជុំពាក់ព័ន្ធខាងលើ បាននិងកំពុងប្រព្រឹត្តទៅចាប់ថ្ងៃទី០៤-០៥ ខែកុម្ភៈ ឆ្នាំ២០២១ ដោយមានការចូលរួមពីរដ្ឋមន្រ្តីទេសចរណ៍អាស៊ាន និងរដ្ឋមន្រ្តីទេសចរណ៍ប្រទេសជាដៃគូផងដែរ៕
