(ភ្នំពេញ)៖ លោក សុខ សូកេន បានលើកឡើងថា យុវជនមួយភាគធំដែលរស់នៅតាមបណ្តាប្រទេសកំពុងអភិវឌ្ឍន៍ ទំនងជាគ្មានការងារធ្វើ ឬរកការងារធ្វើមិនទៀងទាត់ ឬការរៀបចំការងារដែលខ្វះការគាំពារសង្គមគ្រប់គ្រាន់។ លោកបន្តថា យុវជនក៏ប្រឈមនឹងហានិភ័យខ្ពស់ក្នុងការបោះបង់ការអប់រំដោយសារមិនមានបច្ចេកវិទ្យាឌីជីថល និងការទទួលបានមិនស្មើភាព ដែលជំរុញទៅរកការបាត់បង់សេដ្ឋកិច្ច និងឱកាសជាច្រើន។

ការលើកឡើងបែបនេះធ្វើឡើងខណៈពេលដែល លោក សុខ សូកេន រដ្ឋលេខាធិការនៃក្រសួងការបរទេស និងសហប្រតិបត្តិការអន្តរជាតិ និងជាតំណាងគណបក្សប្រជាជនកម្ពុជា នៅក្នុងសម្ព័ន្ធយុវជន ICAPP អញ្ជើញចូលរួមកិច្ចប្រជុំពិសេសតាមប្រព័ន្ធវីដេអូ ក្រោមមូលបទ «ការអប់រំ និងយន្តការកិច្ចគាំពារសង្គមសម្រាប់យុវជនក្នុងអំឡុង និងក្រោយកូវីដ-១៩» ដែលរៀបចំឡើងដោយសម្ព័ន្ធយុវជនICAPP និង លេខាធិការដ្ឋាន ICAPP នៅរសៀលថ្ងៃទី៣ ខែកុម្ភៈ ឆ្នាំ២០២១។

គួរបញ្ជាក់ផងដែរថា គោលបំណងនៃកិច្ចប្រជុំខាងលើនេះ ត្រូវបានធ្វើឡើងទាន់ពេលវេលា ស្របពេលដែលមានការរំខានយ៉ាងខ្លាំងក្នុងវិស័យអប់រំ និងការងារដោយសារកូវីត-១៩។ ដូចនេះ មេដឹកនាំគណបក្សនយោបាយ ត្រូវចាត់វិធានការ ដើម្បីការពារផលប៉ះពាល់យូរអង្វែង និងការខូចខាតដល់យុវជន។

ជាមួយគ្នានេះផងដែរ ដើម្បីលើកកម្ពស់ការយល់ដឹងអំពីបញ្ហាប្រឈមបច្ចុប្បន្នរបស់យុវជន និងដើម្បីលើកកម្ពស់ការឆ្លើយតបគោលនយោបាយដែលសមស្រប កិច្ចប្រជុំផ្តោតជាសំខាន់ទៅលើ ២ចំណុច រួមមាន៖

* ១៖ ការអប់រំ៖ ធ្វើឲ្យមានដំណើបន្តនៃការសិក្សា
* ២៖ ការងារ៖ ពង្រីកយន្តការគាំពារសង្គមសម្រាប់យុវជនដែលបានបាត់បង់ការងារ ឬបានជួបប្រទះការកាត់បន្ថយចំណូល។

ក្នុងបទអន្តរាគមន៍របស់ លោក សុខ សូកេន បានលើកឡើងពីការរាតត្បាតនៃជំងឺកូវីដ-១៩ ដែលបាននិងកំពុងជះឥទ្ធិពលយ៉ាងខ្លាំងទៅលើជីវិតរបស់យុវជន។ លោកបន្តថា យុវជនមួយភាគធំដែលរស់នៅតាមបណ្តាប្រទេសកំពុងអភិវឌ្ឍន៍ទំនងជាគ្មានការងារធ្វើ ឬរកការងារធ្វើមិនទៀងទាត់ ឬការរៀបចំការងារដែលខ្វះការគាំពារសង្គមគ្រប់គ្រាន់។ យុវជនក៏ប្រឈមនឹងហានិភ័យខ្ពស់ ក្នុងការបោះបង់ការអប់រំដោយសារមិនមានបច្ចេកវិទ្យាឌីជីថល និងការទទួលបានមិនស្មើភាព ដែលជំរុញទៅរកការបាត់បង់សេដ្ឋកិច្ច និងឱកាសជាច្រើន។

លោកថែមទាំងបានធ្វើការអំពាវនាវដល់គណបក្សនយោបាយ និងសកម្មជននៅគ្រប់តំបន់ទាំងអស់ត្រូវធ្វើការជាមួយរដ្ឋាភិបាល និងអ្នកពាក់ព័ន្ធដទៃទៀត ដើម្បីអនុវត្តវិធានការសមស្របនិងធានានូវសកម្មភាពប្រកបដោយចីរភាព។ លោក សុខ សូកេន ថ្លែងទៀតថា «ក្នុងន័យនេះ យើងត្រូវផ្តល់ឱ្យយុវជនទាំងអស់នូវសេវាកម្មសុខភាពគ្រប់គ្រាន់ឱកាសស្មើគ្នាសម្រាប់ការអប់រំ និងការងារ និងលក្ខខណ្ឌការងារស្តង់ដារ»។

លោកបានគូសបញ្ជាក់បន្ថែមថា ទាំងនេះគឺជាការវិនិយោគដ៏សំខាន់សម្រាប់យុវជនដែលជាផ្នែកមួយដែលមិនអាចខ្វះបាននៃកម្លាំងពលកម្មពិភពលោក ហើយនិងជាតួអង្គសំខាន់ៗសម្រាប់ការផ្លាស់ប្តូរសង្គម កំណើនសេដ្ឋកិច្ច និងភាពច្នៃប្រឌិតខាងបច្ចេកវិទ្យា។

លោក សុខ សូកេន ក៏បានជម្រាបជូនកិច្ចប្រជុំផងដែរអំពី កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ដែលបាននិងកំពុងអនុវត្ត និងកំពុងបន្តកែសម្រួលក្របខ័ណ្ឌគោលនយោបាយគ្រប់ជ្រុងជ្រោយសម្រាប់ការអភិវឌ្ឍយុវជននៅកម្រិតសង្គមទាំងមូល ពោលគឺគោលនយោបាយជាតិស្តីពីការអភិវឌ្ឍយុវជន (NPYD) ដែលត្រូវបានបង្កើតឡើងក្នុងឆ្នាំ ២០១១ ដែលមានគោលបំណង លើកកម្ពស់សមត្ថភាពយុវជនតាមរយៈការអប់រំកម្រិតខ្ពស់ និងបណ្តុះបណ្តាលវិជ្ជាជីវៈ ដោយផ្តល់ឱ្យពួកគេនូវការងារមានស្ថិរភាព ដើម្បីធានាបាននូវជីវភាពសមរម្យ និងបង្កើនសក្តានុពលរបស់ពួកគេ។ ជាមួយគ្នានេះផងដែរ ដើម្បីឆ្លើយតបទៅនឹងកូវីដ-១៩ យុទ្ធសាស្ត្រពាក់ព័ន្ធផ្សេងៗត្រូវបានអនុវត្ត ដើម្បីដោះស្រាយរាល់ការរំខាននានាក្នុងដំណើរការអភិវឌ្ឍ ស្តារឡើងវិញ និងធានាអោយបាននូវការបន្តវឌ្ឍនភាព។

លោកបន្តថា ប្រទេសកម្ពុជាបានដាក់ចេញនូវវិធានការសារពើពន្ធ ហិរញ្ញវត្ថុ និងសង្គមមួយចំនួនរួមមាន ការលើកលែងពន្ធសម្រាប់ឧស្សាហកម្មដែលរងផលប៉ះពាល់ សហហិរញ្ញប្បទាន និងការចែករំលែកហានិភ័យជាមួយនឹងការផ្តល់ឥណទានគ្រប់ទំហំ ការបន្ថែមប្រាក់ចំណូល ក៏ដូចជាសាច់ប្រាក់សម្រាប់ការងារនិង កម្មវិធីប្រគល់សាច់ប្រាក់។ ក្នុងនោះ យុវជនដែលការងាររបស់ពួកគេកំពុងរងផលប៉ះពាល់ក៏ត្រូវបានផ្តល់ឱកាសដល់ការបន្កើន និងស្តារជំនាញឡើងវិញ ដើម្បីបង្កើនភាពមានការងារធ្វើ និងកាត់បន្ថយភាពលំបាកក្នុងទីផ្សារការងារក្នុងកំឡុងពេលនិងក្រោយពេលកូវីដ។

លោក សុខ សូកេន ក៏បានបញ្ចាក់ជូនកិច្ចប្រជុំអំពីការប្តេជ្ញាចិត្តបន្តខិតខំឲ្យអស់ពីសមត្ថភាពដោយតាមដានស្ថានការណ៍ និងចាត់វិធានការចាំបាច់ទាំងអស់ដើម្បីកែលំអសុខុមាលភាព និងជីវភាពរស់នៅរបស់យុវជន និងប្រជាពលរដ្ឋទាំងអស់។

ជាងនេះទៅទៀត លោក សុខ សូកេន បានចូលផ្តល់នូវធាតុចូល ដើម្បីដាក់បញ្ចូលទៅក្នុងសេចក្តីថ្លែងការណ៍របស់សម្ព័ន្ធយុវជន ដោយបានសង្កត់ធ្ងន់ទៅលើតម្រូវការចាំបាច់ និងជាបន្ទាន់សម្រាប់ភាពជាដៃគូអន្តរជាតិ និងសាមគ្គីភាពក្នុងចំណោមសមាជិករបស់ ICAPP ក្នុងការប្រយុទ្ធប្រឆាំងនឹងកូវីដ-១៩ និងបានអំពាវនាវឱ្យរដ្ឋាភិបាល និងគណបក្សដែលមានការទទួលខុសត្រូវចែករំលែកនូវឧត្តមានុវត្តន៍ បទពិសោធន៍ល្អៗ ក៏ដូចជាឧបករណ៍ និងវិធីសាស្រ្តអប់រំដែលមានតម្លៃទាបក្នុងចំណោមក្រុមគ្រួសារ ICAPP ដើម្បីជួយដោះស្រាយបញ្ហាពិភពលោកដែលបណ្តាលមកពីកូវីដ-១៩ និងជម្រុញស្មារតីកសាងសហគមន៍នៃអនាគតរួមគ្នាសម្រាប់មនុស្សជាតិតាមរយៈការធានាការអប់រំយុវជន សន្តិសុខសុខភាព ឱកាសការងារគ្រប់គ្រាន់ និងគុណភាពជីវិត។ ជាចុងបញ្ចប់ កិច្ចប្រជុំនេះបានអនុម័តជាឯកច័្ឆននូវសេចក្តីថ្លែងការណ៍សម្ព័ន្ធយុវជនសម្រាប់ការអប់រំ និងយន្តការកិច្ចគាំពារសង្គមសម្រាប់យុវជនក្នុងអំឡុង និងក្រោយកូវីដ-១៩។

គួររំលឹកផងដែរថា សម្ព័ន្ធយុវជន ICAPP ត្រូវបានបង្កើតឡើងក្នុងអំឡុងពេលមហាសន្និបាតលើកទី ៧ របស់ ICAPP នៅទីក្រុងបាគូ ប្រទេសអាហ្ស៊ែបៃហ្សង់ នៅឆ្នាំ២០១២ ដើម្បីជួយជំរុញមេដឹកនាំនយោបាយ ដែលជាយុវជនឲ្យចូលរួមកាន់តែសកម្មនៅក្នុងសកម្មភាពរបស់អង្គការ ICAPP ព្រមទាំងជួយយុវជនឲ្យស្វែងយល់ និងពង្រឹងសមត្ថភាពដឹកនាំរបស់ពួកគេក្នុងផ្នែកនយោបាយ ក្នុងនោះរចនាសម្ព័ន្ធនៃសម្ព័ន្ធយុវជន ICAPP មានប្រទេស ម៉ាឡេស៉ី និងអាហ្ស៊ែបៃហ្សង់ជាសហប្រធាន និងអនុប្រធានមាន ម៉ុងហ្គោលី កម្ពុជា នេប៉ាល់ ប៉ាគីស្ថាន និងម៉ាឡេស៉ី៕