(បន្ទាយមានជ័យ)៖ រថយន្តយីឌុបដឹកដំឡូងមីពេញទ្រុងមួយគ្រឿង ខណៈពេលដាក់ដូយដូរកង់ ស្រាប់តែក្រឡាប់ចាក់ដំឡូងពេញថ្នល់ជាតិ តែសំណាងណាស់គ្មានមនុស្សរងរបួស នៅព្រឹកថ្ងៃទី២៣ ខែកុម្ភៈ ឆ្នាំ២០១៦ នៅលើដងផ្លូវជាតិលេខ៥ ត្រង់ចំណុចខាងលិចមុខសាលារៀនសម្តេចឪប្រហែល១០០ម៉ែត្រ ស្ថិតក្នុងភូមិតារាងបាល់ សង្កាត់កំពង់ស្វាយក្រុងសិរីសោភ័ណ ខេត្តបន្ទាយមានជ័យ។
លោក សន គឹមសួគ៍ នាយការិយាល័យចរាចរណ៍ផ្លូវគោក បានឲ្យដឹងថា មុនពេលកើតហេតុ មានរថយន្តយីឌុបមួយគ្រឿងចំរុះពណ៌ ពាក់ស្លាកលេខ សៀមរាប 3A-1217 ដឹកដំឡូងមីពេញបើកចេញពីសៀមរាម ឆ្ពោះទៅស្រុកម៉ាឡៃ ដើម្បីយកទៅលក់នៅពីនោះ លុះបើកមកដល់ចំណុចកើតហេតុដោយសារតែរថយន្តយីឌុបនោះដាក់ដំឡូងខ្ពស់ពេក ធ្វើឲ្យរថយន្តនោះបែកកង់តែងម្តង រួចដោះដូរកង់ថ្មី មិនទាន់ដូរផងក្រឡាប់តែម្តង សំណាងណាស់គ្មានអ្នកណារងរបួស ក្នុងហេតុការណ៍។ ម្ចាស់រថយន្តដឹកដំឡូងឈ្មោះប៊ុត ដប អាយុ៤៩ឆ្នាំ រស់នៅក្នុងភូមិគោកដូងថ្មី ឃុំគោកដូង ស្រុកអង្គរជុំ ខេត្តសៀមរាប។ ក្រោយពីកើតហេតុនគរបាលចរាចរណ៍ខេត្តមកដល់បានធ្វើកំណត់ហេតុ ដោយពុំមានមនុស្សរងរបួស សមត្ថកិច្ចក៏សម្រួលឲ្យម្ចស់ដំឡូង ស្ទូចយករថយន្ត ទើបឲ្យបន្តដំណើរទៅមុខទៀត៕
