(ភ្នំពេញ)៖ នៅវេលាម៉ោងប្រមាណ៧៖៥០នាទីព្រឹកថ្ងៃទី២៣ ខែកុម្ភៈ ឆ្នាំ២០១៦នេះ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងម្ចាស់ក្សត្រិយ៍ថៃ មហាចក្រី សិរិនថន (Maha Chakri Sirindhorn) បានធ្វើជាអធិបតីរួមគ្នា ក្នុងពិធីបញ្ចុះបឋមសីលាសាងសង់ «វិទ្យាស្ថានបច្ចេកវិទ្យាកំពង់ស្ពឺ» នៅក្នុងខេត្តកំពង់ស្ពឺ។

វិទ្យាស្ថានបច្ចេកវិទ្យាកំពង់ស្ពឺនេះ ត្រូវបានសាងសង់ឡើងក្រោមជំនួយឧបត្ថម្ភរបស់ ម្ចាស់ក្សត្រិយ៍ថៃ មហាចក្រី សិរិនថន ដើម្បីចូលរួមអភិវឌ្ឍវិស័យអប់រំរបស់កម្ពុជា។

សូមជំរាបថា ម្ចាស់ក្សត្រិយ៍ សិរិន្ទថន បានយាងមកដល់ប្រទេសកម្ពុជា នៅម៉ោង៨៖០០ព្រឹកមិញ ដើម្បីបំពេញព្រះរាជទស្សនកិច្ច រយៈពេល៣ថ្ងៃ នៅក្នុងប្រទេសកម្ពុជា ចាប់ពីថ្ងៃទី២២ ដល់ថ្ងៃទី២៤កុម្ភៈ ដែលក្នុងនោះព្រះម្ចាស់ក្សត្រិយ៍ នឹងសម្ពោធសមិទ្ធផលមួយចំនួន ពាក់ព័ន្ធនឹងវិស័យអប់រំ និងសុខាភិបាល។

សូមបញ្ជាក់ថា ក្រៅពីបានជួបសំណេះសំណាល និងសោយក្រយាជាមួយសម្តេចតេជោ ហ៊ុន សែន នៅវិមានសន្តិភាព នាថ្ងៃទី២២ ខែកុម្ភៈនេះ ម្ចាស់ក្សត្រិយ៍ថៃ មហាចក្រី សិរិនថន ក៏បានអញ្ជើញទៅសម្ពោធមណ្ឌលសុខភាព និងទស្សនាបឹងយក្សឡោម នៅខេត្តរតនគិរី ផងដែរ ដែលនៅក្បែរបឹងយក្សឡោមនេះ ម្ចាស់ក្សត្រិយ៍ សិរិនថន បានសាងសង់បន្ទប់ទឹកមួយដែលមានតម្លៃ៤ម៉ឺនដុល្លារ៕

 

Posted by Samdech Hun Sen, Cambodian Prime Minister on Monday, February 22, 2016