(ហ្វីជី)៖ យ៉ាងហោចណាស់មានមនុស្ស ១៧ នាក់បានស្លាប់ បន្ទាប់ពីមានព្យុះត្រូពិចដ៏សាហាវមួយបានបោកបក់ចំប្រទេសដែនកោះហ្វីជី (Fifi) នៅយប់ថ្ងៃអាទិត្យម្សិលមិញនេះ ហើយនៅខណៈនេះ អាជ្ញាធរប្រចាំតំបន់កំពុងតែចេញប្រតិបត្តិការជួយសង្គ្រោះ នេះបើយោងតាមការចេញផ្សាយរបស់សារព័ត៌មាន CNN នៅថ្ងៃទី២២ ខែកុម្ភៈ។
អាជ្ញាធរនៃប្រទេសហ្វីជី បានឲ្យដឹងថា ព្យុះត្រូពិច Cyclone Winston បានឥទ្ធិពលខ្លាំង ជាពិសេសគឺកម្លាំងខ្យល់ ដោយវាបានគ្រប់ដណ្ដប់ជាងពាក់កណ្ដាលនៃផ្ទៃប្រទេស ប៉ុន្តែមកដល់ពេលនេះ នៅមិនទាន់ទទួលបានព័ត៌មានពីផលប៉ះពាល់ និងខូចខាតនោះទេ គ្រាន់តែដឹងថា មានមនុស្ស ១៧នាក់បានស្លាប់។
បន្ទាប់ពីទទួលរងការវាយប្រហារពីសំណាក់ព្យុះមួយនេះ អាជ្ញាធរបានចេញបញ្ជាឲ្យសាលាទាំងអស់នៅក្នុងប្រទេសបិទទ្វារមួយសប្ដាហ៍ ចំណែកជើងហោះហើរចំនួនបានចាប់ផ្ដើមដំណើរការឡើងវិញ បន្ទាប់ពីផ្អាស់អស់រយៈពេលជាច្រើនម៉ោង។
គួរបញ្ជាក់ផងដែរថា នេះជាព្យុះមួយនៅក្នុងប្រវត្តិសាស្ត្រសម្រាប់ប្រទេសប្រជុំដោយកោះជាង ៣០០នេះ ព្រោះថាកន្លងមក ប្រទេសនេះ ត្បិតតែជាប្រទេសដែនកោះក៏ពិតមែន ប៉ុន្តែមិនធ្លាប់នទទួលរងការវាយប្រហារពីព្យុះដ៏កាចសាហាវបែបនេះឡើយ៕
