(ភ្នំពេញ)៖ បុរសម្នាក់ត្រូវបានប្រជាពលរដ្ឋជាច្រើននាក់ ព្រួតវាយស្ទើរស្លាប់ បន្ទាប់ពីដេញប្លន់យកម៉ូតូ Next ១គ្រឿងមិនបានសំរេចពីគូរសង្សារមួយគូ ហើយហេតុការណ៍នេះ បានកើតឡើងនាម៉ោង៩៖១០នាទីយប់ថ្ងៃ២០ ខែកុម្ភៈ ឆ្នាំ២០១៦ ស្ថិតនៅក្នុងភូមិស្លែងរលើង សង្កាត់ទឹកថ្លាខណ្ឌសែនសុខ។
បើតាមប្រភពពីជនរងគ្រោះពីរនាក់សង្សារបានប្រាប់ថា មុនកើតហេតុ គឺរូបគេទាំងពីរបានជិះម៉ូតូមួយគ្រឿងដែលជនសង្ស័យដេញប្លន់មិនបានសំរេច មកចេញពីហូបអីនៅម្តុំទួលគោក លុះហូបអីហើយក៏បាននាំគ្នាត្រឡប់ទៅផ្ទះវិញ លុះជិះមកដល់កន្លែងកើតហេតុក៏មានជនសង្ស័យ៣នាក់ជិះម៉ូតូ Viva មួយគ្រឿងបានមកវាយប្លន់យក ពេលនោះជនរងគ្រោះព្យាយាមជិះ ចូលទៅក្នុងភូមិដើម្បីឲ្យគេជួយ តែជនសង្ស័យទាំង៣នៅតែព្យាយាមជិះតាមទៀត ឲ្យជនរងគ្រោះស្រែកថា ចោរក៏ភ្ញាក់ផ្អើលដល់ប្រជាពលរដ្ឋជាច្រើននាក់ ចេញមកដេញចាប់បានជនសង្ស័យម្នាក់វាយស្ទើរស្លាប់ ខណៈដែលបក្ខពួក២នាក់ទៀតបានរត់រួច ។
បន្ទាប់ពីវាយស្ទើរស្លាប់ហើយ ត្រូវបាននគរបាលទឹកថ្លាដឹកយកទៅសង្គ្រោះអាយុជីវិតភ្លាមៗផងដែរ ។ ចំនែកជនរងគ្រោះទាំង២ត្រូវបានសមត្ថកិច្ចនាំយកទៅសាកសួរ ដើម្បីរករឿងហេតុពិត ៕
