(ភ្នំពេញ)៖ បុគ្គលិក បុរី ប៉េង ហួត ជាង ១០០នាក់ បានបរិច្ចាគឈាមស្ម័គ្រចិត្តជូនដល់ មជ្ឈមណ្ឌលជាតិផ្តល់ឈាម សម្រាប់ផ្តល់ជូន មន្ទីរពេទ្យនានានៅទូទាំងប្រទេស ដែលកំពុងខ្វះឈាម ដើម្បីជួយសង្គ្រោះបន្ទាន់នូវជីវិតអ្នកជំងឺ និងអ្នករបួសធ្ងន់ធ្ងរ ជាពិសេសអ្នកគ្រោះថ្នាក់ចរាចរណ៍ ដែលត្រូវការឈាមជាចាំបាច់។
សកម្មភាពបរិច្ចាគឈាមស្ម័គ្រចិត្ត របស់ បុគ្គលិក បុរី ប៉េង ហួត បានធ្វើឡើ នៅថ្ងៃទី២០ ខែកុម្ភៈ ឆ្នាំ២០១៦ នៅការិយាល័យកណ្តាល បុរី ប៉េង ហួត ស្ថិតនៅអគារលេខ២៦៦ ផ្លូវលេខ ៥៩៨ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
លោកស្រី ទឺម ច័ន្ទបូរ៉ាវី តំណាងឲ្យបុរី ប៉េង ហួត បានមានប្រសាសន៍ថា នេះជាលើកទី១ ហើយដែលបុគ្គលិកបុរី ប៉េង បានចូលរួម បរិច្ចាគឈាម ហើយលោកស្រីបន្តសន្យាថា ព្រឹត្តិការណ៍នេះ នឹងមានជារៀងរាល់ឆ្នាំផងដែរ។ លោកស្រីបន្តថា ការបរិច្ចាគឈាមនេះ មិនមែនធ្វើទៅដោយម្នាក់ឯងបាននោះទេ គឺត្រូវរួមសាមគ្គីគ្នា ក្នុងការបរិច្ចាគឈាម ជួយដល់អ្នករងគ្រោះនៅទូទាំងប្រទេស។
លោកវេជ្ជបណ្ឌិត ខៃ សុខហេង តំណាងមជ្ឈមណ្ឌលជាតិ ផ្ដល់ឈាមបានមានប្រសាសន៍ថា «សព្វថ្ងៃនេះយើង មិនទាន់មានឈាម គ្រប់គ្រាន់ សម្រាប់ជួយសង្គ្រោះជីវិតមនុស្ស ដែលត្រូវការឈាមបន្ទាន់នៅឡើយទេ។ ក្នុងមួយថ្ងៃគ្រាន់តែនៅរាជធានីភ្នំពេញ ត្រូវការ ឈាមចន្លោះពី ៨០ទៅ១០០ប្លោក សម្រាប់ជួយសង្គ្រោះ ជនរងគ្រោះផ្សេងៗ ហើយទូទាំងប្រទេសត្រូវការឈាមប្រមាណ១៥០ប្លោក រៀងរាល់ថ្ងៃ។ ដូចនេះយើងត្រូវការឈាម បន្ថែមទៀត ដើម្បីសង្គ្រោះជីវិតមនុស្សបន្ទាន់ »។
ប្រធានមជ្ឈមណ្ឌលជាតិ ផ្ដល់ឈាម បានថ្លែងបញ្ជាក់ថា បើសិនជាគ្មានការចូលរួម ចំណែកពីសប្បុរសជនទាំងឡាយនោះ មជ្ឈមណ្ឌល ក៏មិនអាចទ្រទ្រង់ និងផលិតឈាម ដោយខ្លួននោះឡើយដូច្នេះការចូលរួមរបស់បងប្អូន ពិតជាមានសារសំខាន់យ៉ាងខ្លាំង ។
លោកវេជ្ជបណ្ឌិត បានថ្លែងអំណរគុណយ៉ាងជ្រាលជ្រៅ ចំពោះលោក លោកស្រី អ្នកនាងកញ្ញា នៃបុរី ប៉េង ហួត ដែលបាន បរិច្ចាគឈាម ជូនមជ្ឈមណ្ឌលជាតិ ផ្តល់ឈាម ដើម្បីជួយសង្រ្គោះ ដល់ជនរងគ្រោះ ដែលត្រូវ ការឈាមជាចាំបាច់៕
